Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 66

Ezera Mwakangirirya Emighambo ya Nyamuhanga

Ezera Mwakangirirya Emighambo ya Nyamuhanga

Habya ihamathalhaba myaka 70, Abaisraeli bangyi balisubire e Yerusalemu, aliwe abandi babya ibakinikere omwa bitsweka muthina-muthina eby’Obuthabali bwe Persia. Omughuma w’okw’ibo abya ini muhereri Ezera, oyuwakangiriraya abandu b’Emighambo ya Yehova. Ezera mwaminya ngoku abandu be Yerusalemu babya isibakikwamire Emighambo, neryo mwanza eriyayo eriyabawathikya. Omwami Artasasta owe Persia mwamubwira athi: ‘Nyamuhanga mwakuha amenge nuku wukangiriraye Emighambo yiwe. Wughende, kandi wuthwale owosi-wosi oyukendyanza erighenda nawu.’ Ezera mwahindana haghuma n’abosi ababya banzire erisuba e Yerusalemu. Mubasaba Yehova y’obutheya omwa lhuyira lhuuli olhwa bakayaghenda, neryo mubahongoka.

Enyuma w’emyezi ini mubahika e Yerusalemu. N’abanya-mwami bayo mubabwira Ezera bathi: ‘Abaisraeli babirihalya oku Yehova kandi babirithahya abakali abakaramaya esyonyamuhanga sy’amabehi.’ Ezera mwakolhaki? Embere sy’abandu, Ezera mwakukama n’erisaba athi: ‘Yehova, wabirithukolera bingyi, aliwe thwabirikuhalyako.’ Abandu mubayisubamu, aliwe babya ibakinakolha ebithuwene. Ezera mwasombolha abasyakulhu n’abatsweri erilebya emyatsi eyi. Omw’awandi mezi asathu awakwamako, abaghana eriramya Yehova mubathibithwako.

Muhalhaba myaka ikumi n’ibiri. Aliwe omwa buthuku obo, olhuhimbo lhwe Yerusalemu mulhwabya ilhunemuthasyahimbwa. Neryo Ezera mwasorokya abandu b’omwa kibugha ky’omuyi busana n’eribasomera Emighambo ya Nyamuhanga. Ezera abere akasukulha ekitabu, abandu mubahangana. Mwapipa Yehova, n’abandu mubasumbira ebyalha byabu by’endatha bakalighirana nayu. Neryo Ezera mwasoma n’erisoborera Emighambo, n’abandu mubahulikirira ndeke. Mubaligha bathi babya ibabirisighania Yehova kandi, neryo mubalira. Ekindi kiro Ezera mwathasyabasomera eyindi Mighambo mingyi.  Mubaminya ngoku omwa buthuku obuthe bwahali batholere ibibuka Ekiro Kikulhu ky’Ebibbanda. Aho n’aho, mubatsuka eriyitheghekerakyo.

Omwa biro musanju by’omukonga oyo, abandu mubatsema n’erisima Yehova busana n’eryerya bingyi. Habya isihali hathabya Ekiro Kikulhu ky’Ebibbanda ng’eki erilhua omwa biro bya Yosua. Omukonga abere akahwamu, abandu mubahindana mubasaba bathi: ‘Yehova muwathulhamya omwa bukobe, muwathuha ebyalya omwa mbwarara, kandi muwathuha ekihugho ekyuwene eki. Aliwe mughulhu mungyi, ithukakusoberaya. Muwathuma abaminyereri erithukunga, aliwe isithuli bowa. Aliwe muwaghumisirizya. Muwaberererya emilhaghe yawu oku Abrahamu. Neryo lino thukayilhagha thuthi thukendi kowa.’ Mubahandika eriyilhagha lyabu, neryo abanya-mwami, Abalawi, n’abahereri mubahira kw’ekiminyisyo kyabo.

“Obutseme buli okwa bakowa ekinywe kya Nyamuhanga n’erikolhakyo!”​—Luka 11:28

Thasyaminya Bingyi

ESYOVIDIYO SY’ERIKANIA OKWA BITABU BYE BIBLIA

Erikania okwa kitabu kya Ezera

Yehova akabereraya emilhaghe yiwe ey’erilhusya abaghombe biwe omwa bunyewa mwe Babeli n’erisuba-subania eriramya ly’okwenene e Yerusalemu.