Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ESURA EY’ERIKUMI NA MUNANI

Olhubatizo n’Enkolangana Yawu na Nyamuhanga

Olhubatizo n’Enkolangana Yawu na Nyamuhanga

Olhubatizo lhw’Ekikrisitayo lhukakolhawa lhuthi?

Ni biika ki ebya wutholere erikwama imwa watholera eribatizibwa?

Omundu akayihayo athi oku Nyamuhanga?

Enzumwa nkulhu eyikaleka iwa batizibwa ni yahi?

LEBAYA, hano hali amaghetse! Ekyanga nyikakirya eribatizibwa ni kyahi kwehi?’ Omukulhu mughuma ow’omw’ibuyiro owe Etiopia yuwabulhaya ekibulyo ekyo omwa kighonye eky’erimbere. Omukristayo oyukahulhawa mwa Filipo abya inyabiri mukangania ngoku Yesu yuwabya Masiya oyuwalhaghanisibawa. Akatsemesibwa n’ebyabya inyabiri igha omw’Amasako, omunya Etiopia ono mwayira ekya akakolha. Mwakangania ngokwa anzire eribatizibwa!—Emibiri 8:26-36.

Omukulhu ow’omw’ibughiro owe Etiopia omwa kighonye ky’erimbere

2 Wamabya iwabiri igha ndeke esyasura esy’enyuma esy’ekitabu kino n’omughuma w’okw’Abema ba Yehova, wangana yowa iwukanza eribulya, ‘Ekikanyikakiraya eribatizibwa niki?’ Lino wamabiri igha okw’ilhagha lye Biblia ery’engebe y’erikotha omwa Paradiso. (Luka 23:43; Eribisulirwa 21:3, 4) Kandi wamabiri igha okwa mibere y’abaholi n’amaha w’erilhubuka. (Omugambuli 9:5; Yoane 5:28, 29) Obundi wune muhindana haghuma n’Abema ba Yehova okwa mihindano yabu y’ekithunga n’eriyilhangirira ngokwa bakwamire edini y’ekwenene. (Yoane 13:35) Ekikulhu kutsibu, obundi wabiritsuka erikulha-kulhania enkolangana yawu na Nyamuhanga Yehova.

3 Wanga kangania wuthi ngoku wanzire erikolera Nyamuhanga? Yesu mwabwira abigha biwe athi: ‘Mughende, muyire abigha okwa bihanda byosi; mubatizayebo.’ (Matayo 28:19) Yesu iyuwene-wene mwahiraho eky’erireberyako akabatizibwa omw’amaghetse. Mubatha mutsa-tsanga kw’amaghetse, kandi mubathakwama ky’eryutha okwa muthwe wiwe kw’amaghetse. (Matayo 3:16) Ekinywe “Eribatizya” kilhwire omwa kinywe kye Ekigiriki ekikamanyisaya “erilubba.” Kwesi, olhubatizo lhw’Ekikrisitayo lhukamanyisaya erilubbwa, kutse eridikirya ndeke omw’amaghetse.

4 Olhubatizo lhw’amaghetse ni kiyithawa okw’abosi abakayithagha eribya n’enkolangana na Nyamuhanga Yehova. Olhubatizo lhukakanganaya abandu b’eriyisunza lyawu ery’erikolera Nyamuhanga. Lhukakanganaya ngoku wanzire erikolha erisonda lya Yehova. (Esyonyimbo 40:7, 8) Aliriryo, eritholera eribatizibwa, wutholere iwakwama ebiika birebe.

ERIMINYA N’ERIKIRIRYA BIKAYITHAGHISABAWA

5 Wabiritsuka ekiika ky’erimbere. Wuthi? Omw’ibana eriminya lya Nyamuhanga Yehova na Yesu Kristo, obundi erilhabira omwa ndegheka eyithondekenie ey’erigha e Biblia. (Yoane 17:3) Aliriryo hakine bingi eby’erigha. Abakristayo bakanza ‘ibaminya ndeke-ndeke erisonda lya Nyamuhanga.’ (Abanya Kolosai 1:9) Erihindana okwa mihindano ey’Abema ba Yehova yikawathikaya kutsibu omwa mwatsi oyu. Ni kikulhu erihindana okwa mihindano ng’eyo. (Abaebrania 10:24, 25) Erihindana mughulhu wosi kikendi kuwathikya eryongera eriminya Nyamuhanga.

Eribana eriminya erihikire ery’Ekinywe kya Nyamuhanga ni kiika kikulhu eritholera eribatizibwa

Erigha e Biblia

6 Omwa kwenene, siwuli yithagha eriminya obuli kindu kyosi-kyosi omwa Biblia imwa wabatizibwa. Omukulhu ow’omw’ibuyiro owe Etiopia anabya asi bike, aliriryo mwayithagha obuwathikya eriyitheghererya ebitsweka birebe omw’Amasako. (Emibiri 8:30, 31) Kuthya, wukina withe bingi eby’erigha. Erithwalira haghuma, siwendi syaleka erigha oku Nyamuhanga. (Omugambuli 3:11) Aliriryo, wuthe wabatizibwa, wutholere iwaminya n’eriligha hakiri-hakiri esyangangirirya sy’eritsukirako esy’emisingi eye Biblia. (Abaebrania 5:12) Esyangangirirya ng’esyo mwamuli ekwenene eyihambire okwa mibere y’abaholi n’omubongo ow’erina lya Nyamuhanga n’Obwami bwiwe.

7 Nomwakine, eriminya lisa sikiri ghunza, kundi ‘ahathe erikirirya, omundu syangathoka eritsemesya Nyamuhanga.’ (Abaebrania 11:6) E Biblia yikathubwira yithi omughulhu abandi bandu omwa muyi we Korinto owakera bowa omwatsi owa Abakristayo bathulha, ‘mubikirirya, mubabatizibwa.’ (Emibiri 18:8) Kuthya, erigha e Biblia litholere irya kusulya mw’erikirirya wuthi ni Kinywe kya Nyamuhanga. Erigha e Biblia litholere irya kuwathikya eribya n’erikirirya omwa milhaghe ya Nyamuhanga n’omw’akaghalha k’erilhamya ak’ehongwa ya Yesu.—Yosua 23:14; Emibiri 4:12; 2 Timoteo 3:16, 17.

ERIGHABANA EKWENENE YE BIBLIA N’ABANDI

8 Erikirirya lina mukulha-kulhana omwa muthima wawu, wukendi bana ikikalire erithendi bwira abandi ebya wamabiri igha. (Yeremia 20:9) Wukendi sukumwa kutsibu eribwira abandi oku Nyamuhanga n’ebighendererwa biwe.—2 Abanya Korinto 4:13.

Erikirirya litholere irya kusukuma erighabana n’abandi ebya w’ikirirye

Omulhume ane muthulha engulhu

9 Wangana tsuka erighabana ekwenene ye Biblia n’abandi wukakania omw’amenge n’abahughu, abanywani, abaliranwa, n’aba wukakolha nabu. Endambi yikendi syahika, iwanza erisangira omwa mubiiri ow’erithulhughania owatheghekanibwe n’Abema ba Yehova. Okwa lhulengo olho, si wubahe erikania omwatsi oyu n’Omwema oyukakukangiriraya e Biblia. Kyamalhangirika indi wutholere erithulhughania okwa buli mundu wosi, emitheghekere iyikendi kolhwa iwe haghuma n’oyukakukangiriraya erihindana n’abasyakulhu babiri ab’ekithunga.

10 Eki ikikendi kuthokesya eriminya ndeke abaghuma okw’abasyakulhu b’ekithunga, abakatheghaya ekihyo kya Nyamuhanga. (Emibiri 20:28; 1 Petero 5:2, 3) Abasyakulhu aba bamalhangira indi wukayitheghereraya n’eriligha esyangangirirya sy’emisingi ye Biblia ey’eritsukirako, wune mukwama-kwamania emisingi ya Nyamuhanga, kandi kwenene wanzire eribya mughuma w’okw’Abema ba Yehova, ibakendi kumanyisya indi wutholere erisangira omw’ithulhughania okwa buli mundu wosi ng’omuthuliri ow’engulhu yuwene oyuthe wabatizibwa.

11 Okwa lhundi lhuhandi, abasyakulhu bangana lhangira bathi wukina yithagha erikolha esyambinduka omwa mighendere n’emitse yawu imuwatholera eribya muthuliri. Eki, mwanganabya imwamuli erileka emitse mirebe eya wabiri bisa okw’abandi. Neryo, embere w’erisaba eribya omuthuliri oyuthe wabatizibwa, wutholere iwabya iwabiri tsira ebibi ebikalire, ng’obusingiri, obuthamiri, n’erikolesya emibatsi yanabi.—1 Abanya Korinto 6:9, 10; Abanya Galatia 5:19-21.

ERIYISUBAMU N’ERIBINDUKA

12 Ebindi biika ebitholere ibya kwamwa wuthe wa hika okwi batizibwa. Omukwenda Petero mwabugha athi: “Muyisubemu, mubinduke, ebibi byenyu byanga sangulhwa.” (Emibiri 3:19, NW) Eriyisubamu ly’eriyikubya bwomo busana n’ebindu ebya wabirikolha. Kwesi eriyisubamu likayithaghisibawa ndeke-ndeke omundu amabya inyabya omwa mitse mibi, aliriryo kandi likayithaghisibawa omundu n’omw’angabya inyabya omwa mitse eyikabya nga si mibi. Busana naki? Kusangwa abandu abosi ni bakolha nabi kandi bakayithagha ekighanyiro kya Nyamuhanga. (Abanya Roma 3:23; 5:12) Wuthe w’igha e Biblia, si wabya wasi erisonda lya Nyamuhanga nga ni ryahi. Ibbwa, wanga thokire wuthi erikwama-kwamania ndeke erisonda liwe? Busana n’ekyo, eriyisubamu likayithaghisibawa.

13 Eriyisubamu litholere irya kwamibwako ‘eribinduka.’ Wutholere iwakolha kwilhaba eriyikubya bwomo. Wutholere iwaghana enzira eya wulhwe wukakwama n’erithwiramu ighuma wuthi wukendi kolha ekihikire eritsuka lino n’erilholya embere. Eriyisubamu n’eribinduka ni biika ebya wutholere iwakwama wuthe wabatizibwa.

ERIYIHAYO IWUWENE-WENE

14 Hane n’ekindi kiika kikulhu eky’erikwama wuthe wabatizibwa. Wutholere iwa yihayo oku Nyamuhanga Yehova.

15 Omughulhu wukayihayo oku Nyamuhanga Yehova omwa musabe owakalhua omwa muthima, wukayilhagha ngoku wukendi yihayo okw’iyo musa erihika kera na kera. (Eryibuka Ebihano 6:15) Aliriryo, busana naki omundu inyanza erikolha ekyo? Erisubirya ekibulyo ekyo, thughaniraye oku kino, thubughe thuthi omulhume abiritsuka erithetha omukali w’erithahya. Akabya akalholya embere erimuminya n’erilhangira ngokwa awithe emibere yuwene, yakanathasya yongera kutsibu erimwanza. Erighunzerera, ni kya buli kiro indi omulhume inyakendi bwira omukali athi akamuthahaya. Kwenene, erithahya likendi manyisya eryongera okwa mibiiri. Aliriryo olhwanzo ilhwa lhukendi sukuma omulhume erikwama ekiika kikulhu ekyo.

16 Wukabya wabiriminya Yehova n’erimwanza, wukasukumawa erimukolera isihali ekikakuhambirira kutse erihiraho olhulengo lhulebe olhw’erimuramya. Owosi-wosi oyukanza erikwama Mughalha wa Nyamuhanga, Yesu Kristo, atholere ‘inyayighana.’ (Mariko 8:34) Thukayighana omw’ilhangira thuthi ebiyithawa n’ebighendererwa byethu sibiri kakiraya eriyihayo lyethu lyosi oku Nyamuhanga. Kwesi, wuthe wabatizibwa, erikolha erisonda lya Nyamuhanga Yehova litholere irya ryabya kighendererwa kyawu kikulhu omwa ngebe.—1 Petero 4:2.

ERIKINDA OBUBA BW’ERILEMWA

17 Abandi bakathika-thikira eriyihayo oku Yehova kusangwa bakabya nga bakasagha erikwama ekiika ekikalire ng’ekyo. Bangan’ubaha eribya kw’olhukwamirwa eyiri Nyamuhanga ng’Abakristayo abayihereyo. Busana n’eryubaha bathi bangana lemwa n’erihithania Yehova, bakalengekanaya bathi ni kibuya erithendi yihayo okw’iyo.

18 Wune mw’igha erianza Yehova, wukendi anza eriyihayo okw’iyo n’erikolha ngoku wangathoka eriberererya eriyihayo eryo. (Omugambuli 5:4) Wukendibya wabiri yihayo, kwenene wukendi anza ‘erilendera ngoku Yehova anzire, n’erikolha ebiro byosi ebikamutsemesaya.’ (Abanya Kolosai 1:10) Busana n’erianza Nyamuhanga, siwendi lengekania wuthi kikalire kutsibu erikolha erisonda liwe. Ahathe erithika-thika wukendi lighirana n’omukwenda Yoane, oyuwasakanga athi: “Erianza Nyamuhanga ni kwama ebihano biwe, kandi ebihano biwe sibikalire.”—1 Yoane 5:3.

19 Sikiri manyisaya kithi wutholere iwabya muhikereri eriyihayo oku Nyamuhanga. Yehova anasi aha wukasubulira kandi syali kuyithagha kw’ebyawuthe wangathoka. (Esyonyimbo 103:14) Anzire wukinde kandi akendi kusighika n’erikuwathikya. (Isaya 41:10) Wutholere iwakiminya ndeke-ndeke indi wamayikethera Yehova n’omuthima wawu wosi, inyakendi ‘thunganania esyonzira syawu.’—Emisyo 3:5, 6.

ERIMINYIKALYA ERIYIHAYO LYAWU OMW’IBATIZIBWA

20 Erilengekania okwa bindu ebya thwamabirilhua okw’ikania kyangana kuwathikya eriyihayo oku Yehova omwa musabe. Obuli mundu oyuwanzire Nyamuhanga kwenene atholere kandi ‘inyathulha gho omwa bunu bwiwe busana n’omulhamu.’ (Abanya Roma 10:10) Wangakolha ekyo kya wuthi?

Wabiri yihayo oku Nyamuhanga omwa musabe?

Omulhume ane musaba

21 Wutholere iwabwira omwimaniri w’ekithunga ekya wulimu ngoku wukanza eribatizibwa. Akendi thegheka abasyakulhu balebe erilhaba haghuma nawu omwa bibulyo ebihambire okwa syangangirirya sye Biblia esy’eritsukirako. Abasyakulhu aba bamaligha bathi wutholere, ibakendi kubwira bathi wangana batizibwa okwa murundi owakasa.* Mughulhu wosi, omukania owakakanaya okwa lhubatizo nga lhukamanyisaya ki, akahebawa okwa mighulhu ng’eyo. Neryo embuyi yikasaba abosi abakaya batizibawa erisubirya okwa bibulyo bibiri ebilhobire ng’enzira nguma ‘ey’erithulhagho’ okw’abosi erikirirya lyabu.

22 Lhw’olhubatizo olhukakuminyikalhaya eyiri abandu abosi ng’omundu oyuwabiriyihayo oku Nyamuhanga kandi ngoku lino wuli mughuma w’okw’Abema ba Yehova. Abakaya batizibawa bakalubbawa ndeke omw’amaghetse erikakangania abandu ngoku babiriyihayo oku Yehova.

OLHUBATIZO LHWAWU, EKYA LHUKAMANYISAYA

23 Yesu mwabugha athi abigha biwe banga batizibirwe ‘omwa lina ly’Ise n’ery’Omughalha n’ery’omulimu abuyirire.’ (Matayo 28:19) Eki kikamanyisaya kithi oyukaya batizibawa anasi obuthoki bwa Nyamuhanga Yehova na Yesu Kristo. (Esyonyimbo 83:18, NW; Matayo 28:18) Kandi anasi omughaso n’omubiiri ow’omulimu abuyirire wa Nyamuhanga, akaghalha akakakolha.—Abanya Galatia 5:22, 23; 2 Petero 1:21.

Olhubatizo lhukamanyisaya eriholha okwa mitse yawu eya kera n’erilhubukibwa erikolha erisonda lya Nyamuhanga

Omulhume akabatizibawa

24 Aliriryo, eribatizibwa sikwama kya lubbwa. Ni kaminyikalho ak’ekindu kikulhu kutsibu. Erilubbwa omw’amaghetse ni kaminyikalho akakanganaya indi wamaholha okwa mitse yawu eya kera. Erikwimukya omw’amaghetse kikakanganaya indi wamalhubukibwa erikolha erisonda lya Nyamuhanga. Kandi wibuke indi wabiriyihayo oku Nyamuhanga Yehova iyuwene-wene, butsira eriyihayo okwa mubiiri, okw’abandi abandu, kutse okwa kithunga. Eriyihayo lyawu n’olhubatizo y’enzuko ey’eriyithunda hakuhi na Nyamuhanga—obunywani kundu nayu.—Esyonyimbo 25:14.

25 Olhubatizo si bugha mbu ni mulhamu. Omukwenda Paulo mwasakanga athi: ‘Muberereraye erilhama lyenyu omwi ubaha n’erithithimana.’ (Abanya Filipi 2:12) Olhubatizo y’enzuko. Ekibulyo kiri kithi, Wanga yibika wuthi omwa lhwanzo lhwa Nyamuhanga? Esura yethu ey’erighunzerera yikendiha eky’erisubirya.

EBYE BIBLIA YIKAKANGIRIRAYA

  • Olhubatizo lhw’Ekikrisitayo mwamuli erilubbwa iwe wosi omw’amaghetse, butsira eritsatsanga w’okwa muthwe.—Matayo 3:16.
  • Ebiika ebikakolhaya okwa olhubatizo bikatsuka okw’ibana eriminya n’erikangania erikirirya, ikwa kwama eriyisubamu, eribinduka, n’eriyihayo oku Nyamuhanga.—Yoane 17:3; Emibiri 3:19, NW; 18:8.
  • Eriyihayo oku Yehova, wutholere iwayighana, ng’abandu abayighana banga kwama Yesu.—Mariko 8:34.
  • Olhubatizo ni kaminyikalho akakanganaya indi wamaholha okwa mitse yawu eya kera n’erilhubukibwa erikolha erisonda lya Nyamuhanga.—1 Petero 4:2.

*  Olhubatizo lhukatheghekawa mughulhu wosi okwa mihindano minene-minene eyikakolhawa n’Abema ba Yehova buli mwaka.


Ebibulyo eby’Erigha

1. Ekyaleka omukulhu mughuma ow’omw’ibuyiro owe Etiopia inyasaba eribatizibwa niki?

2. Busana naki wutholere iwalengekania kutsibu okwa lhubatizo?

3. (a) Yesu mwaha abigha biwe b’ekiraghiro ki? (b) Olhubatizo lhw’amaghetse lhukakolhawa lhuthi?

4. Olhubatizo olhw’amaghetse lhukakanganaya ki?

5. (a) Ekiika ky’erimbere eritholera eribatizibwa ni kyahi? (b) Busana naki emihindano y’Ekikrisitayo ni mikulhu?

6. Wutholere iwaminya e Biblia ya bungahi imwa wabatizibwa?

7. Erigha e Biblia litholere irya kuhambako lithi?

8. Ekikendi kusukuma erighabana n’abandi ebya wabiri igha niki?

9, 10. (a) Nibahi abawanga tsukirako eribwira ekwenene ye Biblia? (b) Wutholere iwakolha ki wamanza erisangira mwa mubiiri ow’erithulhughania owatheghekanibwe n’Abema ba Yehova?

11. Ni mbinduka ki esy’abandi batholere erikolha bathe babya bathuliri?

12. Busana naki eriyisubamu likayithaghisibawa?

13. Eribinduka niki?

14. Ni kiika ki kikulhu ekya wutholere iwakwama wuthe wabatizibwa?

15, 16. Kikamanyisaya ki eriyihayo oku Nyamuhanga, n’ekikasukuma omundu erikolha eki niki?

17. Ekyangaleka abandi iba thika-thika eriyihayo oku Nyamuhanga niki?

18. Ekyanga kusukuma eriyihayo oku Yehova niki?

19. Busana naki si wutholere wukubaha eriyihayo oku Nyamuhanga?

20. Busana naki eriyihayo oku Yehova syangabya omwatsi w’eribisa?

21, 22. Wanga ‘thulhagho’ wuthi okw’abosi erikirirya lyawu?

23. Eribatizibwa omwa lina ‘ly’Ise n’ery’Omughalha n’ery’omulimu abuyirire’ kikamanyisaya ki?

24, 25. (a) Olhubatizo lhuk’imanira ki? (b) Ni kibulyo ki ekitholere erisubiribwa?