Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ESURA EY’ERIKUMI N’ITHANU

Eriramya Erya Nyamuhanga Akaligha

Eriramya Erya Nyamuhanga Akaligha

Amadini wosi akana tsemesaya Nyamuhanga?

Thwanga minyerera thuthi edini y’ekwenene?

Abaramya ba Nyamuhanga ab’ekwenene okwa kihugho ba bahayi munabwire?

NYAMUHANGA YEHOVA athutsomene kutsibu kandi anzire ithwa ghasirwa omwa busondoli bwiwe obw’olhwanzo. Thwama muramya omwa nzira eyihikire, ithukendi tsema n’eriyihighulha okwa bitsibu bingi omwa ngebe. Kandi ithukendi bana emighisa yiwe n’obuwathikya bwiwe. (Isaya 48:17) Aliriryo, hali amadini mangi awakabugha athi akakangiriraya ekwenene eyihambire oku Nyamuhanga. Kandi ibbwa, ahukene kutsibu omwa syangangirirya syawu esihambire oku Nyamuhanga nga nindi n’ekya akathuyithaghako.

2 Wangaminya wuthi enzira eyihikire ey’eriramirya mwa Yehova? Siwuli yithagha erigha n’erisosekania esyangangirirya esy’amadini wosi. Wutholere iwigha ebye Biblia kwenene yikakangiriraya bisa ebihambire okw’iramya ery’ekwenene. Erithaha eky’erireberyako: Omw’amahanga mangi, muli ekitsibu eky’esyombulho sy’ebikwangara. Wulya hebawa omubiiri ow’erilhusya ebikwangara by’omwa mbulho esyuwene, iwukendi biminyerera wuthi? Ly’erihambira obuli mulingo wosi w’ekikwangara omwa muthwe? Eyihi. Kyangabya ky’amenge erikolesya obuthuku bwawu eriminya ndeke esyombulho esyuwene. Wukendibya wabiriminya esyombulho esyuwene nga sisosire sithi, imwa kikendi kw’olhobera eriminya ebikwangara. Kuthya, omughulhu thuk’igha ngoku thwanga minyerera edini y’ekwenene, thwangana minyerera amadini ayo aw’amabehi.

3 Ni kikulhu ithwe eriramya Yehova omwa nzira eya akaligha. Abandu bangi bikirirye bathi amadini wosi akatsemesaya Nyamuhanga, aliriryo e Biblia siyiri kangiriraya yithya. Nibya sikiri ghunza erikwama kya bugha wuthi wuli Mukristayo. Yesu mwabugha athi: ‘Si y’omundu oyukanyahulha athi, “Mukama, Mukama,” yuwasyingira omwa bwami bw’elhubulha; nikwa yo n’oyukakolha erisonda lya Thatha waghe oyuli elhubulha.’ Nyamuhanga erithuligha, thutholere ithw’igha ebya Nyamuhanga akathuyithaghako n’eribikolha. Yesu mwahulha abathe kolha erisonda lya Nyamuhanga mwa “bakolha-nabi.” (Matayo 7:21-23) Ng’esyombulho sy’ebikwangara, amadini w’amabehi syawithe mubongo nahake. Kandi ibbwa eky’akabi, amadini ng’ayo, kwenene ni w’akabi.

4 Yehova akaha buli mundu wosi okwa kihugho akaghisa ak’eribana engebe y’erikotha. Aliriryo, eribana engebe y’erikotha omwa Paradiso, thutholere ithwa ramya Nyamuhanga ya ndeke n’eribya lino omwa mibere eya akaligha. Eky’obulighe, abangi bakaghana erikolha bathya. Kyakyaleka Yesu inyabugha athi: ‘Mwingire omwa lhukyo lhuke; kusangwa olhukyo ni lhunene, n’enzira ni nene-nene eyikalholhaya okw’ihera, kandi ni bangi abakingira omwa lhukyo olho; Nikwa olhukyo ni lhuke, n’enzira ni nge eyikakolhaya okwa ngebe, n’abandu ni bake abakabanayo.’ (Matayo 7:13, 14) Edini ey’ekwenene yikalholhaya okwa ngebe y’erikotha. Edini y’amabehi yikalholhaya okw’ihera. Yehova syanzire omundu n’omughuma akathoghothibwa, kyakireka inyaha abandu ehosi-hosi akaghisa ak’erimw’ighako. (2 Petero 3:9) Neryo kwesi, emibere eya thukaramiraya mwa Nyamuhanga yikamanyisaya engebe kutse olhuholho eya thuli.

NGOKU WANGA MINYERERA EDINI EY’EKWENENE

5 ‘Enzira eyikalholhaya okwa ngebe’ yanga banika yithi? Yesu mwabugha athi edini y’ekwenene yangaminyikere omwa syangebe sy’abandu abali muyo. Mwabugha athi, ‘Mwasyaminyererabo busana n’emibiiri yabu. Omuthi mubuya akahethaya ebighuma ebyuwene.’ (Matayo 7:16, 17) Ni bugha mbu, abo abali omwa dini ey’ekwenene banga minyikalibwe busana n’esyanyikirirya syabu n’emighendere yabu. Nomwakine indi sibahikene kandi bakasobaya, abaramya ab’ekwenene ng’ekithunga bakarondekanaya erikolha erisonda lya Nyamuhanga. Thulebaye ebindu mukagha ebikaminyikalhaya abo abali omwa dini ey’ekwenene.

ABO ABAKARAMAYA NYAMUHANGA OW’EKWENENE

  • esyangangirirya syabu sik’imanira okwa Biblia
  • bakaramaya Yehova musa n’eriminyisya erina liwe okw’abandi
  • bakanzana kundu
  • bakaligha Yesu ng’oyo Nyamuhanga akakolesaya erithulhamya
  • si b’ekihugho
  • bakathulhughanaya Obwami bwa Nyamuhanga ngoku w’amaha masa aw’abandu
Abandu muthina-muthina abakaramaya Nyamuhanga

6Engangirirya y’abaghombe ba Nyamuhanga y’imanire okwa Biblia. E Biblia iyiyene-yene yikabugha yithi: ‘Kusangwa Amasako wosi Nyamuhanga yuwatheghekanayawo. Kandi ali n’endundi busana n’erikangirirya omwatsi ow’ekwenene kandi busana n’erithukunga erihaba, kandi busana n’erihabulha, n’erikangirirya abandu erikwama ekithunganene. Neryo omundu wa Nyamuhanga ahikane, n’erithokesibwa erikolha obuli mubiiri uwene.’ (2 Timoteo 3:16, 17) Omukwenda Paulo mwasakangira Abakristayo balikyabo athi: ‘Omughulhu thwabalethera ekinywe kya Nyamuhanga, mumuthowakyo n’eriangirirakyo ng’ekinywe ky’abandu, nikwa ngokwa kiri kwenene, ekinywe kya Nyamuhanga.’ (1 Abanya Tesalonika 2:13) Kwesi, esyanyikirirya n’emitse ey’edini ey’ekwenene siyimanire okw’amalengekania kutse emirwa y’abandu. Bikalhua omwa Kinywe kya Nyamuhanga, e Biblia.

7 Yesu Kristo mwahiraho eky’erireberyako ekitholere omwi seghemerya esyangangirirya siwe okwa Kinywe kya Nyamuhanga. Akasaba Thatha wiwe w’elhubulha, mwabugha athi: ‘Ekinywe kyawu ni mwatsi w’ekwenene.’ (Yoane 17:17) Yesu mw’ikirirya Ekinywe kya Nyamuhanga, n’obuli kindu kyosi ekya akangiriraya ikika hambangana n’Amasako. Yesu inyakabugha athi: “Amasako at[h]i.” (Matayo 4:4, 7, 10) Neryo Yesu inyakabugha erisako eryo. Kuthya, abandu ba Nyamuhanga munabwire sibali kangiriraya amalengekania abo. Bak’ikiriraya bathi e Biblia ni Kinywe kya Nyamuhanga, kandi bakaseghemeraya esyangangirirya syabu sya ndeke okwa ebya yikabugha.

8Abali omwa dini ey’ekwenene bakaramaya Yehova musa n’eriminyisya erina liwe okw’abandi. Yesu mwabugha athi: “Yehova Nyamuhanga wawu yawutholere eriramya, kandi n’iyo musa oyo wutholere erikolera.” (Matayo 4:10, NW) Kwesi, abaghombe ba Nyamuhanga bakaramaya Yehova musa. Eriramya eri mwamuli eribwira abandu erina lya Nyamuhanga ow’ekwenene nga ni lyahi kandi ng’ali athi. Esyonyimbo 83:18, NW hakabugha hathi: “Iwe wukahulhawa mwa Yehova, n’iwe musa oyuli Endatha Kutsibu okwa kihugho kyosi.” Yesu mwahiraho eky’erireberyako eriwathikya abandi eriminya Nyamuhanga, ngoku abugha omwa musabe athi: “Nabiriminyisya erina lyawu okw’abandu wamba omwa kihugho.” (Yoane 17:6, NW) Kuthya, abaramya ab’ekwenene munabwire bakakangiriraya abandi b’erina lya Nyamuhanga, ebighendererwa biwe, n’emibere yiwe.

9Abandu ba Nyamuhanga bakakanganaya olhwanzo olhw’ekwenene, olhuthe yironderaya ndundi. Yesu mwabugha athi: ‘Neryo mwamabya n’olhwanzo, omughuma busana n’owundi, abandu abosi basyaminya kwa muli bigha baghe.’ (Yoane 13:35) Abakristayo abakera babya bawithe olhwanzo ng’olhu olhw’erianzana. Olhwanzo lhwe kinyamuhanga lhukaghunzaho eriyisolholha ly’ebihanda n’eriletha abandu bahaghuma omwa bughuma obuthethwika obw’abalikyethu ab’ekwenene. (Abanya Kolosai 3:14) Abandu abali omw’amadini w’amabehi sibawithe olhwanzo lhw’abalikyethu ng’olho. Thukaminya ekyo kya thuthi? Bak’ithana busana n’erithendi kolangana ly’ebihanda. Abakristayo ab’ekwenene sibali heka esyambundu er’itha Abakristayo balikyabo kutse owundi mundu wosi-wosi. E Biblia yikabugha yithi: ‘Omw’eki abaana ba Nyamuhanga n’abaana ba Sitani baminyikere. Oyuthe kolha ebithunganene, kutse omundu oyuthanzire mulikyabu, abo si baana ba Nyamuhanga. Thwanzane, si thubye nga Kaina, oyuwabya w’omubi oyo, neryo mwitha mulhumuna wiwe.’—1 Yoane 3:10-12; 4:20, 21.

10 Omwa kwenene, olhwanzo olhw’ekwenene si lhuli subulira okw’ithendi itha abandi lisa. Abakristayo ab’ekwenene bakakolesaya endambi, akaghalha, n’obughuda bwabu bakawathikya n’erihimba abandi. (Abaebrania 10:24, 25) Bakawathikanaya omwa buthuku bw’ebitsibu, bakakolangana n’abandi omwa buyisiwa. Erithwalira haghuma, omwa syangebe syabu bakakolesaya ekihano kye Biblia ‘eky’erikolha ebibuya okw’abandu abosi.’—Abanya Galatia 6:10.

11Abakristayo ab’ekwenene bakaligha Yesu Kristo ng’oyo Nyamuhanga akakolesaya erithulhamya. E Biblia yikabugha yithi: ‘erilhama siriri omwa wundi mundu, kusangwa Nyamuhanga syalitha hulha erindi rina omwa kihugho kyosi omwa kathi-kathi k’abandu, eryanga thulhamya.’ (Emibiri 4:12) Ngokwa thw’igha omwa Sura 5, Yesu mwahayo engebe yiwe ng’embanulho busana n’abandu abowa. (Matayo 20:28) Eryongerako, Nyamuhanga abirisombolha Yesu eribya Mwami omwa Bwami bw’elhubulha obukendi syathabalha ekihugho kyosi. Kandi Nyamuhanga akayithagha athi thwowe Yesu n’erikwama esyangangirirya siwe thwamabya thwanzire engebe y’erikotha. Kyakireka e Biblia iyabugha yithi: ‘Oyukikiriraya Omughalha awithe engebe y’erikotha; nikwa oyutha kenga Omughalha syendi syalholha okwa ngebe.’—Yoane 3:36.

12Abakristayo ab’ekwenene si b’ekihugho. Omughulhu athonganisibawa embere sy’omuthabali we Roma ya Pilato, Yesu mwabugha athi: ‘Obwami bwaghe si bw’ekihugho kino.’ (Yoane 18:36) Mbulha bikere omw’ihanga mulingo ki, abigha ba Yesu ab’ekwenene bali omwisi sy’Obwami bwiwe obw’elhubulha neryo sibalibya na lhuhandi omwa myatsi y’ekithabale ey’ekihugho kino. Sibali yingiraya omw’amalhwa wakyo. N’omwa bine, abaramya ba Yehova sibali thanga abandi erisombolha erikolha ebihambire okw’ingira omwa kithunga ky’ekithabale, n’eriyitsimba okw’ikomwa, kutse erikoma. Kandi abaramya ba Nyamuhanga n’omwa bathe na lhuhandi omwa eby’ekithabale, bakakenga ebiraghiro. Busana naki? Kundi Ekinywe kya Nyamuhanga kikabalhaghira ‘erikenga abathabali b’ekihugho.’ (Abanya Roma 13:1) Hamabya amalhwa ahakathi-kathi k’ebya Nyamuhanga akayithagha n’ebye ekithabale ky’ekihugho kikayithagha, abaramya ab’ekwenene bakakwama eky’erireberyako ky’abakwenda, ababugha bathi: ‘Litholere ithwa kenga Nyamuhanga kwilhaba abandu.’—Emibiri 5:29; Mariko 12:17.

13Abigha ba Yesu ab’ekwenene bakathulhughanaya bathi Obwami bwa Nyamuhanga w’amaha masa aw’abandu. Yesu mwalhaghulha athi: ‘Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.’ (Matayo 24:14) Omwa kanya k’eribwira abandu indi bayikethere abathabali b’ekihugho erighunza ebitsibu byabu, abigha ba Yesu Kristo ab’ekwenene bakathulhughanaya Obwami bwa Nyamuhanga obw’elhubulha ngoku w’amaha masa aw’abandu. (Esyonyimbo 146:3) Yesu mwathukangirirya erisaba obuthabale obuhikene obwo, omughulhu abugha athi: ‘Obwami bwawu bwase. Erisonda lyawu liyirawe, omwa kihugho ngokwa liri omwa lhubulha.’ (Matayo 6:10) Ekinywe kya Nyamuhanga mukya lhaghulha kithi Obwami bw’elhubulha obu ‘bwasyathulhanga mwa bihandi-bihandi, n’erighunza amami wosi aya; nabo bwasyahangana kera na kera.’—Danieli 2:44.

14 Erimanira okwa ebya thwamabirilhua okw’irebya, yibulhaye: ‘Edini eyikaseghemeraya esyangangirirya syayu syosi okwa Biblia n’eriminyisya erina lya Yehova okw’abandu ni yahi? Edini eyikwamire olhwanzo lhw’ekinyamuhanga, eyik’ikiriraya omu Yesu, eyitha yingiraya omwa by’ekihugho, n’eyikathulhughanaya yithi Obwami bwa Nyamuhanga w’amaha masa aw’ekwenene busana n’abandu ni yahi? Okw’amadini wosi awali okwa kihugho, ni yahi eyikaberereraya ebiyithawa ebi?’ Ekwenene yikakanganaya ndeke-ndeke indi b’Abema ba Yehova.—Isaya 43:10-12.

Omw’ikolera Yehova iwune haghuma n’abandu biwe, iwukendi bana bingi kwilhaba ebyawanga herya

Abandu muthina-muthina abanywene

WUKENDI KOLHA KI?

15 Erikwama ky’erikirirya omu Nyamuhanga sikiri ghunza erimutsemesya. Erithwalira haghuma, e Biblia yikabugha yithi esyombinga nasyo sikikiriraya sithi Nyamuhanga aneho. (Yakobo 2:19) Aliriryo, kilhangirikire ndeke-ndeke ngokwa sithe kolha erisonda lya Nyamuhanga kandi ngokwa sisiri simawa Nyamuhanga. Nyamuhanga erithusima, siry’erikirirya indi aneho lisa aliriryo thutholere ithwa kolha n’erisonda liwe. Kandi thutholere ithwa yighabulha okw’amadini w’amabehi n’erikwama eriramya ery’ekwenene.

16 Omukwenda Paulo mwakangania athi sithutholere thukasangira omw’iramya ery’amabehi. Mwasakanga athi: ‘Mulhue omwa kathi-kathi kabo, muyisolhole,’ Yehova athya, ‘kandi simuthule okwa kindu kithisirire; naghe nasya bakokya.’ (2 Abanya Korinto 6:17; Isaya 52:11) Busana n’ekyo Abakristayo ab’ekwenene bakayihighulha okwa kindu kyosi-kyosi ekihambangene n’eriramya ery’amabehi.

17 E Biblia yikakanganaya yithi emiringo mingi eyosi ey’amadini w’amabehi ni y’okwa “Babeli Mukul[h]u.”* (Eribisulirwa 17:5) Erina eryo lika thw’ibukaya omuyi we Babeli eya kera, eya tsuka mw’amadini w’amabehi enyuma w’Eribogha ery’omwa buthuku bwa Noa. Esyangangirirya n’emitse mingi eyasibwe munabwire omw’amadini w’amabehi yatsuka kera e Babeli. Ng’eky’erireberyako, Abanya Babeli ibakaramaya obusathu bw’esyanyamuhanga. Munabwire, engangirirya nkulhu ey’amadini mangi bw’Obusathu. Aliriryo e Biblia yikakangiriraya ndeke-ndeke ngoku hali Nyamuhanga mughuma musa ow’ekwenene, Yehova, kandi yithi Yesu Kristo ni Mughalha wiwe. (Yoane 17:3) Kandi Abanya Babeli ibak’ikiriraya bathi abandu bawithe akandu akathe holha enyuma w’olhuholho lhw’omubiri kandi kangana ghalhwa omwa kitsweka ky’eriaghalya. Munabwire, enyikirirya ey’akandu akathe holha kutse akalimu akangana ghalibwa omwa muliro w’ekulimu yikakangiriribawa omw’amadini mangi.

18 Kundi eriramya lye Babeli eya kera mulya yitsatsanga omwa kihugho kyosi, e Babeli Mukulhu eya munabwire yanga minyikalha ndeke-ndeke ng’obuthabali bw’amadini w’amabehi obw’ekihugho kyosi. Kandi Nyamuhanga abiri lhaghulha athi obuthabali obu obw’amadini w’amabehi bukendi syahwaho kitsumbukirania. (Eribisulirwa 18:8) Wanamalhangira ekikaleka ikyabya ky’omubongo iwe eriyighabulha okwa buli kindu kyosi-kyosi ekya Babeli Mukulhu? Nyamuhanga Yehova anzire ‘iwalhua mugho’ lhuba ihakine endambi.—Eribisulirwa 18:4.

19 Busana n’erithwamu lyawu ery’eriyighabulha okw’ikwama edini y’amabehi, abandi bangana thwamu erilekeraho erikolangana nawu. Aliriryo, omw’ikolera Yehova iwune haghuma n’abandu biwe, iwukendi bana bingi kwilhaba ebyawanga herya. Ng’abigha ba Yesu abakera abasigha ebindi bindu erimukwama, wukendi bana abaghalha n’abali benyu bangi ab’obunyakirimu. Wukendibya mughuma w’okw’ihiika linene ery’obukekulhu bw’Abakrisitayo ab’ekwenene abali omwa kihugho kyosi, abakakukanganaya olhwanzo lhw’ekwenene. Kandi wukendibya n’amaha awuwene aw’engebe y’erikotha ‘okwa mughulhu owakayasa.’ (Mariko 10:28-30) Obundi, okwa buthuku bulebe, abo abakakughana busana n’esyanyikirirya syawu bakendi syalebya ebye Biblia yikakangiriraya neryo ibabya baramya ba Yehova.

20 E Biblia yikakangiriraya yithi Nyamuhanga akisiya inyathoghothya emighulhu mibi eno n’erisubya omwa mwanya wayu mw’ekihugho kihya-kihya ekithunganene omwisi sy’obuthabali bw’Obwami bwiwe. (2 Petero 3:9, 13) Ekyo ka kyasyabya kihugho kibuyanga! Kandi omwa kihugho kihya-kihya ekithunganene ekyo, mukendi syabya edini nguma nyisa, omulingo mughuma ow’eriramya ery’ekwenene. Siky’amenge iwe erikwama ebiika ebikayithayisibawa eribya n’abaramya ab’ekwenene lino?

EBYE BIBLIA YIKAKANGIRIRAYA

  • Hali edini nguma nyisa ey’ekwenene.—Matayo 7:13, 14.
  • Edini ey’ekwenene yikaminyikalha busana n’esyangangirirya n’emitse yayu.—Matayo 7:16, 17.
  • Abema ba Yehova bakakwama eriramya erya Nyamuhanga akaligha.—Isaya 43:10.

*  Eriminya omwatsi mungi owahambire okwa kikaleka e Babeli Mukulhu iyimanira obuthabali obw’amadini w’amabehi obw’ekihugho kyosi, lebaya Enyongezyo.


Ebibulyo eby’Erigha

1. Thukendi ghasirwa thuthi thwama ramya Nyamuhanga omwa nzira eyihikire?

2. Thwang’igha thuthi enzira eyihikire ey’eriramya Yehova, kandi ni ky’erireberyako ki ekikathuwathikaya eriyitheghererya eki?

3. Erikwamana na Yesu, thutholere ithwa kolha ki thwama yithagha thuthi Nyamuhanga athulighe?

4. Ebinywe bya Yesu ebihambire okwa syonzira ibiri bikamanyisaya ki, kandi buli nzira yikalholhaya hayi?

5. Thwanga minyerera thuthi abakwamire edini ey’ekwenene?

6, 7. Abaghombe ba Nyamuhanga bakathwalha bathi e Biblia, kandi Yesu mwahiraho athi eky’erireberyako erikwamana n’eki?

8. Eriramya Yehova mwamuli erikolha ki?

9, 10. Abakristayo ab’ekwenene bakakanganaya abandi b’olhwanzo omwa syonzira ki?

11. Busana naki ni kikulhu erikirirya Yesu Kristo ng’oyo Nyamuhanga abirisombolha erithulhamya?

12. Erithendibya w’ekihugho kino kikamanyisayaki?

13. Abigha ba Yesu ab’ekwenene bakathwalha bathi Obwami bwa Nyamuhanga, kandi busana n’ekyo, ni kyahi ekya bakakolha?

14. Edini eyawukalhangira wuthi yikaberereraya ebiyithawa eby’eriramya ly’ekwenene ni yahi?

15. Nyamuhanga akayithagha ki eryongera okw’ikirirya indi aneho?

16. Ekitholere erikolhwa ni kyahi ekihambire okwi sangira omwa dini y’amabehi?

17, 18. E “Babeli Mukul[h]u” niki, kandi busana naki kikayithaghisibawa lhuba ‘erilhua mugho’?

19. Wukendi bana ki busana n’erikolera Yehova?

20. Obuthuku bw’embere buwithire ki abo abakwamire edini ey’ekwenene?