Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ENYONGEZYO

Eriminyerera ‘Babeli Mukulhu’

Eriminyerera ‘Babeli Mukulhu’

EKITABU kye Eribisulirwa kiri mw’ebinywe ebithe byanga yitheghereribwa ngokwa bine. (Eribisulirwa 1:1) Ng’eky’erireberyako, kikakanaya okwa mukali oyuwithe erina “Babeli Mukul[h]u” erisakangire okwa mbumo yiwe. Omukali ono akakanibawako ng’oyuwikere okwa “esyondeko n’ebihanda.” (Eribisulirwa 17:1, 5, 15) Kundi sihali mukali hene-hene oyuwanga kolha eki, Babeli Mukulhu atholere inyabya inyawithe eky’akamanyisaya. Ibbwa, omumalaya ow’akaminyikalho oyu akamanyisayaki?

Eribisulirwa 17:18, omukali iya n’oyo akakanibawako ‘ng’omuyi mukulhu owakathabalha okw’abami b’ekihugho.’ Ekinywe “omuyi” kikamanyisaya ekithunga ky’abandu ekiyithondekire. Kundi “omuyi mukul[h]u” oyu akathabalha ‘okw’abami b’ekihugho,’ omukali oyukahulhawa mwa Babeli Mukulhu atholere eribya ini kithunga ekiwithe obuthoki ekiri okwa lhulengo olhw’eky’ekihugho kyosi. Kyangana hulhwa nibya mwa buthabali bw’ekihugho kyosi. Ni buthabali bwa muthina ki? Obw’edini. Yitheghereraye emyatsi mirebe eyisosene omwa kitabu ekye Eribisulirwa ngokwa yikaleka ithwa hika okw’ighunzerera eri.

Obuthabali bwanganabya obw’ekisubure, obw’edini, kutse ab’abathabali b’ekihugho. Omukali oyukahulhawa mwa Babeli Mukulhu si buthabali obw’abathabali b’ekihugho, kusangwa Ekinywe kya Nyamuhanga kikabugha kithi “abami b’ekihugho” kutse abathabali b’ekihugho kino, “m[u]basingira” nayu. Obusingiri bwiwe bukamanyisaya obughuma obw’abirikolha haghuma n’abathabali b’ekihugho, kandi eki kikasoborera busana naki akahulhawa mwa “omumalaya mukul[h]u.”—Eribisulirwa 17:1, 2; Yakobo 4:4.

Babeli Mukulhu si bwangabya buthabali bw’ekisubure kusangwa ‘abathundi b’ekihugho,’ abakimanira emyatsi y’obusubure, bakendi mulira omughulhu akendi thoghothibwa. Erithwalira haghuma, abami n’abasuburi bakakanibawako ng’abasamalire Babeli Mukulhu ibane “hali.” (Eribisulirwa 18:3, 9, 10, 15-17) Kwesi, ni ky’amenge erighunzerera thuthi Babeli Mukulhu si bathabali b’ekihugho kutse buthabali bw’ekisubure, aliriryo ni bw’edini.

Eriminyerera Babeli Mukulhu ngokwa ni madini kikathasya ghumibawa omwa binywe ebikabugha bithi akatheba ebihanda byosi erilhabira omwa “busaki” biwe. (Eribisulirwa 18:23) Kundi emiringo yosi y’obusaki yilhwire okwa syombinga, sikiriswekaya e Biblia eryahulha Babeli Mukulhu mwa ‘bwikalho bw’esyombinga.’ (Eribisulirwa 18:2; Eribuka Ebihano 18:10-12) Obuthabali obu bukathasya kanibawako ng’obune muhakanisya kutsibu edini y’ekwenene, eriendererya “abaminyereri” “n’abandu ba Nyamuhanga [“ababuyirire,” NW].” (Eribisulirwa 18:24) Erithwalira haghuma, Babeli Mukulhu yiponire kutsibu edini y’ekwenene erihika okwi enderererya nabi n’er’itha ‘abakathulha omwatsi wa Yesu.’ (Eribisulirwa 17:6) Busana n’ekyo, omukali ono oyukahulhawa mwa Babeli Mukulhu akimanira obuthabali bw’amadini w’amabehi obw’ekihugho kyosi, imwamuli amadini wosi awakahakanisaya Nyamuhanga Yehova.

← Lebaya esura eya wamakangirirwa