Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ESURA EY’ERIKUMI NA NGUMA

Ekikaleka Nyamuhanga Inyalekereraho Eriaghalhwa Niki?

Ekikaleka Nyamuhanga Inyalekereraho Eriaghalhwa Niki?

Nyamuhanga anabiriletha eriaghalhwa ly’omwa kihugho?

Ni mwatsi ki owahulhuka omw’irima ly’Edeni?

Nyamuhanga akendi syaghunzaho athi ebikalhwiririra omwi aghalhwa ly’abandu?

AMALHWA awakalire abere abirihwa omwa kitsweka ekiri mw’olhuhi, esyankumi sy’esyondulhani esy’abakali n’abaana abasangawa ibabir’ithibwa mubatsikwa omwa kyuna kighuma ekithimbere kw’ehyapa. Obuli kapa kabya kw’ekinywe kino: “Busana naki?” Obundi buthuku ekyo ni kibulyo ekikitha bulighe bunene. Abandu bakakibulhaya lhulighe-lighe omughulhu olhuhi, ekihunzo, obulhwere, kutse obutsindi byamitha abanze babu abathe kwa lhubanza, byamatsandya amanyumba abu, kutse byamabaghalya kutsibu omwa sindi nzira. Bakanza eriminya ekikaleka ebihunzo ng’ebyo ibya bawako.

2 Ekikaleka Nyamuhanga inyalekereraho eriaghalhwa niki? Nyamuhanga Yehova amabya inyawithe akaghalha kosi, olhwanzo, obwenge, n’obulingirirania, busana naki ekihugho kyuswire mw’eriponangana n’obuthe bulingirirania? Wune watha yibulya okwa bindu ng’ebi?

3 Nina kibi eribulya ekikaleka Nyamuhanga inyalekereraho eriaghalhwa? Abandi bayilhalikirire bathi eribulya ekibulyo ng’ekyo kikamanyisaya kithi sibawithe erikirirya erikaghunza kutse bathi sibali sikaya Nyamuhanga. Aliriryo, wukasoma e Biblia, wukendi lhangira indi abandu abathaleghulha, abakubaha Nyamuhanga banabya bawithe ebibulyo ng’ebyo. Ng’eky’erireberyako omuminyereri Habakuki mwabulya Yehova athi: ‘Busana naki wukaleka inalhangira ebibi, n’erisamalira obubi kwehi? Inga, obuherya n’omwagha biri embere syaghe; kandi hali amalhwa, n’erineghena bikahulhuka.’—Habakuki 1:3.

Yehova akendi syaghunzaho eriaghalhwa lyosi

Amatsiko

4 Yehova mwana tsweba omuminyereri muthaleghulha Habakuki busana n’eribulya ebibulyo ng’ebyo? Eyihi. Aliriryo, Nyamuhanga mwahira ebinywe ebyalhua omwa muthima wa Habakuki by’omwa Biblia. Kandi Nyamuhanga mwa muwathikya eriyitheghererya emyatsi ya ndeke n’eribana erikirirya erilengethukire. Yehova anzire erikukolera ekindu ng’ekyo. Wibuke, e Biblia yikakangiriraya yithi ‘akakutheghaya.’ (1 Petero 5:7) Nyamuhanga aponire obubi n’eriaghalhwa erya bukaletha kwilhaba eripona erya mundu wosi-wosi awithe okwa bindu ng’ebyo. (Isaya 55:8, 9) Ibbwa kwesi, ekikaleka ihabya eriaghalhwa lingi omwa kihugho niki?

BUSANA NAKI HALI ERIAGHALHWA LINGI?

5 Abandu b’amadini muthina-muthina babiri ghenda eyiri abasondoli n’abakangirirya b’amadini abu eribabulya ekikaleka ihabya eriaghalhwa lingi. Mughulhu mungi, bakasubiraya bathi eriaghalhwa ni sonda lya Nyamuhanga kandi bathi erilhua kera mwathegheka obuli kindu kyosi ekyangabereho, imwamuli ebindu ebikathikaya. Abangi bakabwirawa bathi esyonzira sya Nyamuhanga siwanga si yitheghererya kutse bathi yuk’itha abandu—nibya n’abaana—nuku angabya nabu elhubulha. Aliriryo, ngoku wabiri igha Nyamuhanga Yehova syali retha obubi. E Biblia yikabugha yithi: ‘Kibye hali oku Nyamuhanga erikolha ebibi, n’okwa Muthoka w’Ebyosi erihalya.’—Yobu 34:10.

6 Wunasi ekikaleka abandu ibakolha esobya y’eritsweba Nyamuhanga busana n’eriaghalhwa lyosi eriri omwa kihugho? Mughulhu mungi, bakatsweba Nyamuhanga Omuthoka w’Ebyosi kundi bakalengekanaya bathi ya muthabali hene-hene w’ekihugho kino. Sibasi omwatsi w’ekwenene ow’omubongo, owalhobire owe Biblia yikakangiriraya. Muw’igha ekwenene eyo omwa Sura 3 ey’ekitabu kino. Omuthabali hene-hene ow’ekihugho kino ni Sitani Diabolo.

7 E Biblia yikabugha ndeke-ndeke yithi: ‘Ekihugho kino kiri omwa buthoki bw’omubi oyu.’ (1 Yoane 5:19) Wama thalengekania okw’eki, sikyangabya ky’amenge? Ekihugho kino kikakanganaya emibere ey’ekihangikwa ky’ekirimu ekithe lhangirawa “oyukat[h]eba ekihugho kyosi.” (Eribisulirwa 12:9) Sitani ali mw’epono, amabehi, n’obutsurumi. Neryo ekihugho ekiri omwa buthoki bwiwe, kyuswire mw’eriponangana, amabehi n’obutsurumi. Eyo ni nzumwa nguma eyikaleka ihabya eriaghalhwa lingi.

8 Enzumwa eya kabiri eyikaleka ihabya eriaghalhwa lingi yiri yithi, ngoku thwakanaya omwa Sura 3, abandu babiribya isibahikene kandi ni bakolha nabi erilhua aho eriyisamambulha likathabera omw’irima ly’Edeni. Abandu b’ekibi bakayikasa eribana obuthoki, n’eki kikalhwiririra mw’esyonyuhi, erinubya, n’eriaghalhwa. (Omugambuli 4:1; 8:9) Enzumwa eya kasathu busana n’eriaghalhwa “w’omughulhu n’obutandwa.” (Omugambuli 9:11, NW) Omwa kihugho ekithe na Yehova ng’Omuthabali oyukatheghaya, abandu bangana ghalhwa busana n’eribya omwa kitsweka kibi okwa ndambi eyithatholere.

9 Kikathuhumulikanaya eriminya thuthi Nyamuhanga syali letha eriaghalhwa. Syatholere akatswebwa busana n’esyonyuhi, erithwa ebilhaghiro, erinubya, kutse n’ebihunzo ebikayibuthukira kitsumbukirania ebikalethera abandu b’eriaghalhwa. N’omwa bine, thutholere ithwaminya, Ekikaleka Yehova inyalekereraho eriaghalhwa lyosi eri niki? Amabya ya Muthoka w’Ebyosi, awithe akaghalha ak’eririkakirya. Ekikaleka inya yikakirya erikolesya obuthoki obwo niki? Nyamuhanga w’olhwanzo oyo thwasi ndeke atholere inyabya n’enzumwa mbuya.—1 Yoane 4:8.

OMWATSI MUKULHU AKAHULHUKA

10 Eriminya ekikaleka Nyamuhanga inyalekereraho eriaghalhwa, thutholere ithwibuka obuthuku obwatsukira mw’eriaghalhwa. Omughulhu Sitani asondolha Adamu na Eva okw’ithendiowa Yehova, ekibulyo kikulhu mukya hulhuka. Sitani mwatha thika-thikira obuthoki bwa Yehova. Sitani nibya anasi athi obuthoki bwa Yehova si buwithe aha busubulire. Aliriryo, Sitani mwa hakanisya ehamuli ya Yehova ey’erithabalha. Busana n’eryahulha Nyamuhanga mwa mubehi oyukabisa ekibuya okw’abandu biwe, Sitani abugha athi Yehova ni muthabali mubi. (Enzuko 3:2-5) Sitani amanyisaya athi abandu bangabere ndeke bathe omwa buthabali bwa Nyamuhanga. Eri lyabya ini hakanisya obuthabale bwa Yehova, ehamuli yiwe ey’erithabalha.

11 Adamu na Eva mubayisamambulha oku Yehova. Ni bugha mbu, mubabugha bathi: “Sithuli yithagha Yehova ng’Omuthabali wethu. Thwangana yithwiramu ahabwethu, ekibuya n’ekibi.” Yehova anga ghunzire athi omwatsi oyo? Anga kangirirye athi ebihangikwa byosi eby’amenge ngokwa abayisamambuli sibabya bahikire kandi enzira yiwe kwenene ngokwa ya yihikire? Omundu angana bugha athi Nyamuhanga angalhwireho inyathoghothya abayisamambuli n’eritha syatsuka buhya-buhya. Aliriryo Yehova abya inyabiri bugha ekighendererwa kiwe eky’eryusulya omwa kihugho mw’abaana ba Adamu na Eva, kandi abya anzire ibikalha omwa kihugho paradiso. (Enzuko 1:28) Mughulhu wosi Yehova akaberereraya ebighendererwa biwe. (Isaya 55:10, 11) Ebyo bikine aho, erighunzaho abayisamambuli omwa Edeni sikyanga subirye ekibulyo ekya sangawa ikyabiri hulhukibwa ekihambire okwa hamuli ya Yehova ey’erithabalha.

Omusomesya n’abathendekwa biwe

Omuthendekwa anawithe amenge kwilhaba omusomesya?

12 Thutha ghanirya okwa ky’erireberyako kino. Omusomesya ane mubwira abathendekwa biwe ngoku banga baririra ekibaro ekikalire. Omuthendekwa w’amenge aliriryo ini muyisamambuli inyabugha athi enzira eya omusomesya akabaririra mw’ekibaro siyihikire. Erikangania athi omusomesya syanga thoka, omuyisamambuli oyu inyahathikana athi anasi enzira eyuwene ey’eribaririra mw’ekibaro. Abandi bathendekwa ibalengekania bathi ahikire, neryo nabu ibayisamambulha. Omusomesya atholere inyakolha ki? Amalhusya abayisamambuli b’omwa kitebe, abandi bathendekwa ibakendi hambwaku bathi? Sibang’ikirirya bathi omuthendekwa oyu n’abandi ababiribya bughuma nayu bahikire? Abandi bathendekwa abosi abali omwa kitebe bangana leka erisikya omusomesya, ibalengekania bathi akasagha erihemuka ngoku syahikire. Aliriryo thubughe thuthi omusomesya amalighira omuyisamambuli erikangania abathendekwa ngokwa anga baririra ekibaro kino ekikalire.

13 Yehova abirikolha ekindu ekisosene n’eky’omusomesya akakolha. Wibuke indi abayisamambuli omw’irima ly’Edeni si babu basa aba hambawako. Obukekulhu bw’abamalaika babya ibana thungerere. (Yobu 38:7; Danieli 7:10) Ngoku Yehova angathwere obuyisamambuli, kyanga hambire kutsibu okw’abamalaika abosi abo n’erighunzerera ikya hamba okwa bihangikwa byosi eby’amenge. Neryo ibbwa, Yehova abirikolha ki? Abirileka Sitani akanganaye ngokwa anga thabere abandu. Kandi Nyamuhanga abirileka abandu bayithabaleko omwa busondoli bwa Sitani.

14 Omwa ky’erireberyako kyethu, omusomesya anasi omuyisamambuli n’abathendekwa abali okwa lhuhandi lhwiwe ngoku siba hikire. Aliriryo kandi anasi athi eribaha akaghisa ak’erikangania enzumwa yabu kikendi ghasira ekitebe kyosi. Abayisamambuli bakendibya balemwa, abathendekwa abosi ab’ekwenene bakendi lhangira ngokwa omusomesya iyo musa yutholere erisondolha ekitebe. Bakendi yitheghererya ekikaleka omusomesya enyuma waho inyalhusya abayisamambuli abosi omwa kitebe. Kuthya, Yehova anasi abandu n’abamalaika abosi abali mw’ekwenene ngoku bakendi ghasirwa omw’ilhangira indi Sitani n’abayisamambuli biwe babiri lemwa kandi ngoku abandu sibanga yithabalhako. Nga Yeremia owakera, bakendi minya omwatsi w’ekwenene ono: ‘Iwe Mwami Mukulhu nyinasi kw’enzira y’omundu siyiri omwisi wiwe, kandi siriri omwisi w’omundu oyukalendera erisondolha olhughendo lhwiwe.’—Yeremia 10:23.

BUSANA NAKI OMUGHULHU INYABYA MULI?

15 Ibbwa, busana naki Yehova abirilekereraho eriaghalhwa ahabwa mughulhu muli? Kandi ekikaleka inyatha kakirya ebindu bibi erithendibya niki? Thaghanirya okwa bindu bibiri eby’omusomesya athe angakolha omwa ky’erireberyako kyethu. Eky’erimbere, syanga kakirye omuthendekwa omuyisamambuli erisoborera ngokwa akalengekanaya. Ekyakabiri, omusomesya syanga wathikirye omuyisamambuli erisoborera enzumwa yiwe. Kuthya, thaghanirya okwa bindu bibiri ebya Yehova abirithwamu erithendi kolha. Eky’erimbere, syatha kakirya Sitani n’abakamusighika okwi lengesya erikangania bathi bahikire. Erileka obuthuku bulhabe kyabiribya ikya kikayithaghisibawa. Omwa esyankumi esy’emyaka ey’ebyafayo by’abandu, abandu babiri lengesya obuli mulingo wosi ow’eriyithabalhako, kutse obuthabale bw’abandu. Abandu babirikulha-kulhana omwa sayansi n’eyindi myatsi, aliriryo obuthe bulingirirania, obusama, erithwa ebilhaghiro, n’olhuhi byabiri ongera eribya bibi kutsibu. Obuthabale bw’abandu lino bwabiri kanganibwa ngoku si bwanga thoka.

16 Ekyakabiri, Yehova syalitha wathikya Sitani erithabalha ekihugho kino. Ng’eky’erireberyako, Nyamuhanga alya kakiraya esyombanza esikathikaya, syangabere inyakasighika athi abayisamambuli ba bahikire? Nyamuhanga syangabere inyakaleka abandu bak’ikirirya bathi obundi bangana yithabalhako isihali kabi kosi-kosi akanga lhwiririramu? Yehova alya kolha athya, nayu inyakendibya inyakasighika amabehi. Aliriryo “Nyamuhanga syalit[h]oka eribiha.”—Abaebrania 6:18.

Nyamuhanga akendi kuwathikya eriyiyinirya eriaghalhwa

Omukali oyukahumulikanibawa omwa Kinywe kya Nyamuhanga

17 Kandi ibbwa biri bithi okwa bibi byosi ebyabiri kolhwa omwa buthuku buuli obw’eriyisamambulha oku Nyamuhanga? Thutholere ithw’ibuka ngoku Yehova ni muthoka w’ebyosi. Busana n’ekyo angana ghunzaho kandi akendi syaghunzaho ebikalhwiririra mw’eriaghalhwa ly’abandu. Ngoku thwabiri igha, eritsandibwa ly’ekihugho kyethu likendi syalhusibwaho omw’ibindulha ekihugho kino mwa Paradiso. Ebikalhwiririra omwa kibi bikendi syalhusibwaho erilhabira omw’ikiririrya omwa kihongo ky’embanulho ya Yesu, kandi ebikalethawa n’olhuholho bikendi syahwaho erilhabira omw’ilhubuka. Neryo busana n’ekyo, Nyamuhanga akendi syakolesya Yesu ‘eriherya emibiiri ya Sitani.’ (1 Yoane 3:8) Yehova akendi syaberererya ebyosi ebi okwa ndambi eyitholere. Thutholere ithwa tsema kundi Nyamuhanga syatha kolha okwa mwatsi oyu kwa lhuba, kusangwa erighumisirizya liwe lyabiri thuha omughisa w’erigha ekwenene n’erimukolera. (2 Petero 3:9, 10) Bikine bithya, Nyamuhanga kwane mukolha n’omuhwa erirondekania abaramya b’ekwenene n’eribawathikya eriyiyinirya eriaghalhwa lyosi-lyosi eryanga bahikako omwa kihugho kino eky’omulyambo.—Yoane 4:23; 1 Abanya Korinto 10:13.

18 Abandi bangana yibulya bathi, Eriaghalhwa eryosi eri lyangana ghanire eribyaho Nyamuhanga kwa hangika Adamu na Eva omwa nzira eya bathe banga thokire eriyisamambuliramu? Erisubirya ekibulyo ekyo, wutholere iwibuka ekihembo ky’obughuli bunene ekya Yehova abiri kuha.

WUKENDI KOLESYA WUTHI EKIHEMBO EKIKALHUA EYIRI NYAMUHANGA?

19 Ngoku thw’igha omwa Sura 5, abandu muba hangikwa n’obughabe bw’eriyithwiramu. Wanama yitheghererya eki kwa ni kihembo eky’obughuli bunene? Nyamuhanga abirikolha ebisoro bingi, kandi kutsibu-kitsibu bikasondolhawa n’amenge w’obuhangwa. Abandu babirikolha esyorobboti esyanga theghekwa erikwama obuli kilhaghiro. Thwangana tsemire Nyamuhanga kwa thukolha athya? Eyihi, thukatsema eribya n’obughabe obw’eriyithwiramu nga thwangabya abandu ba mulingo ki, nga thwanga kwama nzira ki ey’engebe, amanywani aw’eribya nawu, n’ebindi-n’ebindi. Thwanzire eribya ithune n’obwiranda, kandi ekyo kya Nyamuhanga akathusunzira eribana.

20 Yehova syalitsemera omubiiri owakakolhawa omwi kakwa. (2 Abanya Korinto 9:7) Eky’erireberyako: Ekyanga tsemesya omubuthi ya kutsibu niki—omwana eribugha athi “Wasingya” kundi bamamubwira bathi abughe athya kutse eribugha athya erilhua omwa muthima wiwe? Neryo ekibulyo kiri kithi, Wukendi kolesya wuthi obughabe bw’eriyithwiramu obwa Yehova abiri kuha? Sitani, Adamu, na Eva mubakolesya nabi kutsibu obughabe bw’eriyithwiramu. Mubaghana Nyamuhanga Yehova. Iwe wukendi kolha ki?

21 Wuwithe omughisa ow’erikolesya ndeke ekihembo ky’eriswekya eki eky’obughabe bw’eriyithwiramu. Wangana yitherana haghuma n’obukekulhu bw’abo ababirimana okwa lhuhandi lhwa Yehova. Bakatsemesaya Nyamuhanga kusangwa bakakolha kutsibu erikangania Sitani kwa ni mubehi kandi ng’omuthabali oyuka yibulha-bulha habw’erilemwa. (Emisyo 27:11) Nawu wangana kolha wuthya omw’isombolha enzira y’engebe eyitholere. Kino kikendi soborerwa omwa sura eyikakwamako.

EBYE BIBLIA YIKAKANGIRIRAYA

  • Nyamuhanga syali letha omwa kihugho mw’emibere mibi.—Yobu 34:10.
  • Sitani eryahulha Nyamuhanga mwa mubehi n’eribugha athi akabisa ekibuya okw’abandu biwe, mwa thika-thikira ehamuli ya Yehova ey’erithabalha.—Enzuko 3:2-5.
  • Yehova akendi syakolesya Mughalha wiwe, Omuthabali w’Obwami bw’Ekimasiya, erighunzaho eriaghalhwa ly’abandu n’erighunzaho ebikalhwiririramu.—1 Yoane 3:8.

Ebibulyo eby’Erigha

1, 2. Munabwire abandu bakabana eriaghalhwa erisosire lithi, ikyaleka abangi ibabulya bibulyo ki?

3, 4. (a) Ekikakanganaya kithi sikibi eribulya ekikaleka Nyamuhanga inyalekereraho eriaghalhwa niki? (b) Yehova akayowa athi busana n’obubi n’eriaghalhwa?

5. Obundi buthuku, ni syanzumwa syahi esikahebawa erisoborera eriaghalhwa ly’abandu, aliriryo e Biblia yikakangiriraya yithi ki?

6. Ekikaleka abandu bangi ibakolha esobya y’eritsweba Nyamuhanga busana n’eriaghalhwa eriri omwa kihugho niki?

7, 8. (a) Ekihugho kikakanganaya kithi emibere y’omuthabali wakyo? (b) 

9. Ekyangaleka ithwaminya ngoku Yehova awithe enzumwa mbuya eyikaleka inyalekereraho eriaghalhwa lilhole embere niki?

10. Sitani mwa thika-thikira ki, kandi athi?

11. Ekyaleka Yehova inyatha kwama kya thoghothya abayisamambuli b’aho n’aho omw’irima ly’Edeni niki?

12, 13. Thahererya eky’erireberyako ekikaleka Yehova inyabya inyabiri lekerera Sitani eribya muthabali w’ekihugho kino n’ekikaleka Nyamuhanga inyabya inyabiri lekerera abandu eriyithabalha.

14. Ni mughaso wahi aw’akendi lhua omw’ithwamu lya Yehova ery’erilekerera abandu bayithabaleko?

15, 16. (a) Busana naki Nyamuhanga abiri lekereraho eriaghalhwa erilholha embere habwa mughulhu muli? (b) Busana naki Yehova syali athakakirya ebindu ebi ng’esyombanza esikathikaya?

17, 18. Yehova akendi syakolha ki okw’akabi kosi akabirilhwiririra omwa buthabali bw’abandu n’amathebo wa Sitani?

19. Ni kihembo ki eky’obughuli ekya Yehova abirithuha, kandi busana naki ithwa kithwalha mw’eky’omubongo?

20, 21. Thwangana kolesya thuthi ndeke ekihembo kyethu eky’obughabe bw’eriyithwiramu, kandi busana naki thutholere ithwanza erikolha thuthya?