Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ENYONGEZYO

Ekihulho ky’Omukama eky’Erigholho-Gholho—Eryibuka Erikaha Nyamuhanga y’Ekitsumbi

Ekihulho ky’Omukama eky’Erigholho-Gholho—Eryibuka Erikaha Nyamuhanga y’Ekitsumbi

ABAKRISITAYO bakalhaghirawa Eryibuka olhuholho lhwa Kristo. Eryibuka eri likathasya hulhawa “mw’ekihulho eky’erigholho-gholho eky’Omukama.” (1 Abanya Korinto 11:20, NW) Ekikaleka ikyabya kikulhu niki? Kitholere eryibukwa mughulhu wahi kandi kithi?

Yesu Kristo mwathegheka eryibuka eri omw’igholho-gholho ly’ekiro ky’Erikyuruka eky’Abayuda omwa 33 C.E. Erikyuruka abya mukonga owakakolhawa murundi mughuma omwa mwaka, okwa kiro ekye 14 eky’omukera we Nisani ow’Abayuda. Eribaririra ekiro ekyo, obundi Abayuda ibakalindirira obuthuku obuli ahakathi-kathi k’eritsuku n’ekyanda. Buno bw’obuthuku omughulhu erithungi likabya n’esyasaha nga 12 eryingana n’esyasaha 12 esy’erithumbi. E Nisani iyikatsuka embaniko y’okwezi yikatsuka erilhangirwa erimbere, obuthuku obuli ahakathi-kathi k’eritsuku n’ekyanda bukayahika. Erikyuruka irikabya ebiro 14, eryuba lyabiri lenga.

Yesu mwakolha omukonga w’Erikyuruka n’abakwenda biwe, mwahighitha Yuda Iskariota, neryo atsukisya Ekihulho ky’Omukama eky’Erigholho-Gholho. Ekihulho eki mukyasuba omwa mwanya w’Erikyuruka ly’Abayuda, neryo kitholere iky’ibukwa murundi mughuma musa omwa mwaka.

Enjiri ya Matayo yikathulhagho yithi: ‘Yesu mwimya obundu, neryo abere abitsumulhabo, mwa tsutsanga bo, mwahabo abigha athi, Mwimayebo, mulye; oyu ni mubiri waghe. Neryo mwimya olhuthehi mwaha ewasingya, neryo mwabahalhu athi, Mupulhaye kulho, inywe abosi. Kusangwa oyu ni musasi waghe, omusasi ow’endaghane, omusasi waghe owakuthawa busana n’abangi busana n’eribuyira ebibi.’—Matayo 26:26-28.

Abandi bakalengekanaya bathi Yesu mwahindulha omuggati mwa mubiri wiwe hene-hene n’ebinyu mwa musasi wiwe. Aliriryo, omubiri wa Yesu abya inyakina hikene omughulhu aha omuggati oyu. Mbwino abakwenda ba Yesu mubanalya omubiri n’erinywa omusasi wiwe hene-hene? Eyihi, kundi ekyo kyangabere inirya enyama y’omundu kandi kyanga thwire omughambo wa Nyamuhanga. (Enzuko 9:3, 4; Abalawi 17:10) Erikwamana na Luka 22:20, Yesu mwabugha athi: ‘Olhuthehi olhu ni lhaghana lihya-lihya omwa musasi waghe, owakuthawa busana nenyu.’ Mbwino olhuthehi mulhwanabya ‘endaghano nyihya-nyihya’ hene-hene? Ekyo sikyanga thokekene, kusangwa endaghano ni lighirana, si kindu ekyanga hambwako ng’olhuthehi.

Omuggati n’ebinyu

Busana n’ekyo, omuggati n’ebinyu ni himinyikalho. Omuggati akimanira omubiri wa Kristo owahikene. Yesu mwakolesya omuggati owasighalira okwa kihulho ky’Erikyuruka. Omuggati mwakolhwa isimuli kihamya, kutse ekitumbisya. (Eriluayo 12:8) E Biblia yikakolesaya ekihamya ng’akaminyikalho ak’ekibi kutse amathebo. Busana n’ekyo, omuggati akimanira omubiri owahikene owa Yesu ahonga. Syabya mwa kibi.—Matayo 16:11, 12; 1 Abanya Korinto 5:6, 7; 1 Petero 2:22; 1 Yoane 2:1, 2.

Ebinyu by’engulha bik’imanira omusasi wa Yesu. Omusasi oyo akaleka endaghane nyihya-nyihya iyayira omubongo. Yesu mwabugha athi omusasi wiwe muthika “busana n’eribuyira ebibi.” Neryo abandu bangana henia omw’ameso wa Nyamuhanga kandi bangan’ingira omwa ndaghano nyihya-nyihya na Yehova. (Abaebrania 9:14; 10:16, 17) Endaghano eyi yikaleka ikya thokekana okw’Abakrisitayo abathaleghulha 144,000 erighenda elhubulha. Eyo bakendi syakolha ng’abami na bahereri busana n’abandu eribana emighisa.—Enzuko 22:18; Yeremia 31:31-33; 1 Petero 2:9; Eribisulirwa 5:9, 10; 14:1-3.

Ibbwa abatholere erirya okwa muggati n’ebinyu ebi ni bahi? Erikiyitheghererya ndeke-ndeke, abali omwa ndaghano nyihya-nyihya—ni bugha ambu, abo abawithe amaha aw’erighenda elhubulha—babatholere erirya okwa muggati n’erinywa okwa binyu. Omulimu abuyirire wa Nyamuhanga akaleka abandu abo ibaligha ngoku babiri sombolhwa eribya bami elhubulha. (Abanya Roma 8:16) Nabu bali omwa ndaghane y’Obwami na Yesu.—Luka 22:29.

Ibbwa biri bithi okw’abo abawithe amaha w’erisyikalha kera na kera okwa kihugho omwa Paradiso? Bakakenga ekihano kya Yesu neryo iba hindana okwa mukonga owe Kihulho ky’Omukama eky’Erigholho-Gholho, aliriryo bakasa ng’abakasyalebaya, butsira ng’abakasyalya. Murundi mughuma omwa mwaka ebiro 14 Nisani enyuma w’eryuba erilenga, Abema ba Yehova bak’ibuka Ekihulho ky’Omukama eky’Erigholho-Gholho. Nomwakine indi esyankumi nge esy’abandu omwa kihugho kyosi b’abakabugha bathi bawithe amaha w’elhubulha, eryibuka eri ni ry’omubongo munene okw’Abakrisitayo abosi. W’omughulhu abosi bakalengekanaya okwa lhwanzo olhulengethukire lhwa Nyamuhanga Yehova na Yesu Kristo.—Yoane 3:16.

← Lebaya esura eya wamakangirirwa

Thasyaminya Bingyi

ERYIBUKA

Ibuka Olhuholho Lhwa Yesu

Thukakukokaya erisyabya haghuma nethu okwa mukonga mukulhu oyu. Wukendi syaminya ngoku engebe n’olhuholho lhwa Yesu byanga kughasira.