Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ESURA EYA KABIRI

E Biblia—Ekitabu Ekikalhua Eyiri Nyamuhanga

E Biblia—Ekitabu Ekikalhua Eyiri Nyamuhanga

E Biblia ni y’embaghane yithi okwa bindi bitabu?

E Biblia yanga kuwathikya yithi erirwanisya ebitsibu byawu?

Ekyangaleka iwa yikethera amaminyereri awasakangire omwa Biblia niki?

WANGAN’IBUKA obuthuku obwa waheberawamu ekihembo kibuyanga erilhua eyiri omunywani kundu? Ekyo kyangabya imukitha kusisimulha lisa aliriryo imukya kulethera etseme nene. Omwa kwenene, ekihembo kikakubwira emyatsi mirebe eyihambire oku oyukakiha—indi akathwalha obunywani bwenyu mwa bw’omubongo. Ahathe erithika-thika muwasima kutsibu busana n’ekihembo ekya munywani wawu athegheka.

2 E Biblia ni kihembo erilhua eyiri Nyamuhanga, ekya thutholere ithwa tsemera kutsibu. Ekitabu ky’embaghane kino kikabisulha emyatsi eya thuthe thwangabanire. Eky’erireberyako, yikathubwira okw’ihangikwa ly’olhubulha olhuli kw’esyongununu, erihangikwa ly’ekihugho, n’erihangikwa ly’omulhume n’omukali ab’erimbere. E Biblia yiri mw’emisingi ey’eriyeghemerya eyanga thuwathikya erirwanisya ebitsibu n’amaghaniryo w’engebe. Yikasoborera Nyamuhanga ngokwa akendi syaberererya ekighendererwa kiwe n’eriletha emibere mibuya okwa kihugho. E Biblia ka ni kihembo ekikasisimulha!

3 Kandi e Biblia ni kihembo ekikatsemesaya, kundi yikabisulha omwatsi mulebe owahambire okwa Omughabi, Nyamuhanga Yehova. Erilhangira indi abiriha ekitabu ng’ekyo kikakanganaya kithi anzire ithwa muminya ndeke. Omwa kwenene, e Biblia yangana kuwathikya eriyithunda hakuhi na Yehova.

4 Wamabya iwuna withe e Biblia, siwe musa. E Biblia eyosi kutse omwa bitsweka, yabiri sakangwa omwa syandimi esilhabire omwa 2,300, neryo kwesi abandu abalhabire omwa 90 okwa 100 omwa kihugho kyosi bana withe yo. Erithwalira haghuma, esyo Biblia esilhabire omwa kakekulhu kaghuma sikaghabawa buli yenga! Obusirira bw’esyo Biblia—esihwere n’esithahwere syabiri sakangwa. Omwa kwenene, sihali kindi kitabu ekiri nge Biblia.

E “New World Translation of the Holy Scriptures” yikabanika omwa syondimi nyingi

E “New World Translation of the Holy Scriptures” omwa mibughe mingyi

5 Eryongerako, e Biblia ‘yatheghekanibawa na Nyamuhanga.’ (2 Timoteo 3:16) Omu nzira ki? E Biblia iyiyene-yene yikasubiraya yithi: ‘Abandu mubabugha ebinywe ebyo Nyamuhanga ahabu, ibakasondolibawa n’omulimu abuyirire.’ (2 Petero 1:21) Ng’eky’erireberyako: Omusuburi angana bwira omusakangi athi amusakangire enyawaliho. Enyawaliho eyo yiri mw’amalengekania n’ebihano by’omusuburi. Busana n’ekyo, enyawaliho kwenene yikabya ini yiwe, si y’omusakangi. Kuthya, e Biblia yiri mw’omwatsi wa Nyamuhanga, butsira ow’abandu abasakanga yo. Neryo kwesi, e Biblia eyosi ni ‘Kinywe kya Nyamuhanga.’—1 Abanya Tesalonika 2:13.

YIKALIGHIRANA KANDI YIHIKENE

6 E Biblia muya ghunza emyaka eyilhabire 1,600 iyine musakangwa. Abasakangi bayo babyaho omwa buthuku obuthe bughumerera kandi bakulira omwa mibere n’ebitsweka by’embaghane. Abandi babya balimi, babbaliya, n’abalisya. N’abandi babya baminyereri, batsweri, n’abami. Omusakangi w’Enjiri ya Luka abya muthahwa. Abasakangi bayo n’omwa banabya bambaghane, e Biblia yikalighirana erilhua okwa nzuko erihika okw’ighunzerera.*

7 Ekitabu ky’erimbere ekye Biblia kikathubwira ebitsibu by’abandu ngokwa byatsuka. Ekitabu ky’erighunzerera kikakanganaya kithi ekihugho kyosi kyasyabya paradiso. Ebitsweka ebyosi ebiri omwa Biblia biri mw’ebyafayo eby’esyankumi sy’emyaka kandi obuli kitsweka kikathuwathikaya omu nzira ndebe eriyitheghererya ekighendererwa kya Nyamuhanga nga ni kyahi kandi nga kikendi syabererera kithi. Erilighirana lye Biblia likasisimulha, aliriryo ekyo kya thwangana lengekanirya omwa kitabu ekikalhua eyiri Nyamuhanga.

8 E Biblia yihikire omwa by’esayansi. Nibya yiri mw’omwatsi owabya isyali athaminywa. Ng’eky’erireberyako, ekitabu kya Abalawi kyabya mw’ebilhaghiro ebye Israeli eya kera, ebyabya bihambire okwi highulha abakoni n’okwa buyitsotse omughulhu ebihanda ebibathimbireko byabya isibyasi emyatsi ng’eyo. Omughulhu habya amalengekania awathahikire awahambire okwa kihugho ngoko kikwikire, e Biblia muya kikaniako ng’ekiringo. (Isaya 40:22) E Biblia muyabugha ndeke yithi ekihugho ‘kihanikire ahathe kindu.’ (Yobu 26:7) Omwa kwenene, e Biblia si kitabu ky’esayansi. Aliriryo omughulhu yikakanaya okwa myatsi y’esayansi, yihikire. Eki kya thutha lengekaniraya omwa kitabu ekikalhua eyiri Nyamuhanga?

9 Kandi e Biblia yihikire omwa byafayo kandi ni y’eriyikethera. Ebisakangiremu bikakanaya okwa bindu birebe. Si w’amena masa awalimu aliriryo muli n’erithondekana ly’olhubutho lhw’abandu.# Erithendisosana n’abasomire ebyafayo by’ekihugho, abatha kanaya okwi lemererwa ly’abandu babu, abasakangi be Biblia babya mw’ekwenene, nibya ibakasakanga n’ebisobyo byabu n’eby’ekihanda kyabu. Ng’omwa kitabu kye Emiganzo, omusakangi Musa akaligha ekisobyo kiwe ekikalire ekya bamuhabulhako kutsibu. (Emiganzo 20:2-12) Ekwenene eyiri ng’eyi siyiri kira eribanika omwa yindi myatsi ey’ebyafayo aliriryo yikabanika omwa Biblia kusangwa ni kitabu ekikalhua eyiri Nyamuhanga.

EKITABU EKY’OBWENGE OBUKAGHASA

10 Kusangwa e Biblia yatheghekanibawa na Nyamuhanga, yiri ‘n’endundi busana n’erikangirirya omwatsi ow’ekwenene kandi busana n’erithukunga erihaba, kandi busana n’erihabulha, n’erikangirirya abandu erikwama ekithunganene.’ (2 Timoteo 3:16) Inga, e Biblia ni kitabu ky’omubongo. Yikaleka iwa yitheghererya ndeke obuhangiranwa bw’omundu. Sikiriswekaya, kusangwa Omusakangisya wayu, Nyamuhanga Yehova, ya Muhangiki! Akayitheghereraya ndeke ebirengekanio n’eriyowa lyethu kwilhaba ithwe. Eryongerako, Yehova anasi ebya thukayithagha imwa thwatsema. Kandi anasi esyonzira esya thutholere ithwa yihighulhako.

11 Thalengekania okwa mukania wa Yesu owakahulhawa mwa Erikangirirya okwa Kithwa, owali omu Matayo esyasura 5 erihika 7. Omw’ikangirirya ery’embaghane eri, Yesu mwakania okwa myatsi mingi, imwamuli enzira ey’eribana etseme ey’ekwenene, ngoku wanga ghunzaho erikangalhukania, ngoku wanga saba, kandi ngoku wanga thwalha ebindu by’omubiri. Ebinywe bya Yesu bikine n’obuthoki n’omubongo munabwire ngoku byanabya omughulhu abikanaya.

12 Eyindi misingi ye Biblia yikahamba okwa ngebe y’amaka, emikolere, n’erikolangana n’abandi. Emisingi ye Biblia yikahamba okw’abandu abosi, n’erihabulha lyayu ni ly’endundi mughulhu wosi. Obwenge obuli omwa Biblia bukanibweko omwa bikuhi omwa binywe bya Nyamuhanga erilhabira omwa muminyereri Isaya: “Ingye indi [Yehova], Nyamuhanga waw[u], oyukakukangiriraya [w]ubane endundi.”—Isaya 48:17.

EKITABU KY’OBUMINYERERI

13 E Biblia yiri mw’amaminyereri mangi, amangi okw’iwo abiribererera. Thalebya eky’erireberyako. Erilhabira omwa muminyereri Isaya, oyuwabyaho omwa kighonye ky’omunani B.C.E., Yehova mwalhaghulha athi omuyi we Babeli anga thoghothibirwe. (Isaya 13:19; 14:22, 23) Eki mukya kanibwako buuli ngoku kyangabere. Amahe awakasyahamba ang’umirye olhusi lhwe Babeli n’eringira omwa muyi ahathe erilhwa. Si by’ebyo bisa. Kandi obuminyereri bwa Isaya nibya mubwahulha n’erina ly’omwami oyuwanga kindire e Babeli—Kiro.—Isaya 44:27-45:2.

Omusakangi we Biblia ya Isaya mwalhaghulha eriwa lye Babeli

Omulhume akasekulhaya emyatsi eyihambire okw’iwa lya Babeli

14 Enyuma w’emyaka 200—omw’ithumbi ly’okw’Erikumi bikendi yabya biro 6, 539 B.C.E.—amahe mwa lhalirira hakuhi ne Babeli. Oyuwasondolha gho nindi? Omwami we Persia oyukahulhawa mwa Kiro. Neryo eki kya kyanga kolirye okw’ibererera ly’obuminyereri obw’erithikya. Aliriryo amahe wa Kiro angan’ingire e Babeli ahathe erilhwa, ngoku kyalhaghulhawa?

15 Abanya Babeli babya n’omukonga omw’ithumbi eryo neryo mubayowa ibane buholho omwa kathi ak’olhuhimbo lhwabu olhunene olhughumire. Bine aho, omw’amenge, Kiro mwathahulha amaghetse w’olhusi awabya akathimba okwa muyi. Obuthuku buthe bwahali, amaghetse mwakeha ndeke abandu biwe bathoka erisoka olhusi n’erihika okwa lhuhimbo lhw’omuyi. Aliriryo amahe wa Kiro anga lhabire athi okwa lhuhimbo lhwe Babeli? Busana n’enzumwa ndebe, omw’ithumbi eryo, omwa buthatsomana, esyongyo mwasitha kingwa!

16 Erikwamana ne Babeli, mukya lhaghulhwa kithi: ‘Siyendi syabya mw’endulani kandi, kandi siyendi syaswikalhwamo okwa ndengo n’okwa ndengo. Kutse Omuharabu syendi syasahanda ehema yiwe yoko; kutse abalisya sibendi syalisirya ebihangulho byabu byoko.’ (Isaya 13:20) Obuminyereri obu mubutha lhaghulha eriwa ly’omuyi lisa. Mubwakangania buthi e Babeli yanga sighere mwa mulhalha kera na kera. Wangana lhangira ebiriho ebikakanganaya eribererera ly’ebinywe ebi. Ekitsweka ekithe mw’abandu ekye Babeli eya kera—ekiri hakuhi esyomayiro 50 eyikwa sy’omuyi we Iraq e Baghdad—ni bwema obukakanganaya buthi ebya Yehova abugha erilhabira omu Isaya byabiri bererera: ‘Nasya biryaho omwa lhubiryo lhw’eriherya.’—Isaya 14:22, 23.%

Ebisambukalirya ebye Babeli

Ebisambukalirya bye Babeli

17 Eriminya indi e Biblia ni kitabu eky’amaminyereri aw’eriyikethera kikahimba erikirirya, kwabithe? Omwa kwenene, Nyamuhanga Yehova amabya inyabiri berererya emilhaghe yiwe ey’enyuma, thuwithe obuli nzumwa ey’eriyikethera thuthi akendi syaberererya eriyilhagha liwe ery’ekihugho paradiso. (Emiganzo 23:19) Kwenene, thuwithe ‘amaha w’engebe y’erikotha eya Nyamuhanga oyuthebiha athulhagha okwa mighulhu ya kera na kera.’—Tito 1:2.^

‘EKINYWE KYA NYAMUHANGA KIRIHO’

18 Erilhua okwa ebya thwabiri lhangira omwa sura eno, kilhangirikire ndeke-ndeke indi e Biblia kwenene ni kitabu ky’embaghane. Aliriryo kandi, omubongo wayu alhabire n’okwi lighirana lyayu, erihikana ly’eby’esayansi n’ebyafayo, obwenge obukaghasa, n’amaminyereri aw’eriyeghemerya. Omukwenda Paulo mwasakanga athi: ‘Kusangwa ekinywe kya Nyamuhanga kiriho, kandi kine mukolha omubiiri, kandi kithwire kwilhaba omuyali owawithe amoya abiri. Kikatsimitha erihika okw’ighaba omuthima n’ekirimu; kandi erihika okw’ighaba esyonungo n’omungoso. Kandi kikathoka eritswera erisonda n’amalengekania w’omuthima.’—Abaebrania 4:12.

19 Erisoma ‘ekinywe’ kya Nyamuhanga, kutse omwatsi, omwa Biblia kyangana hindulha engebe yethu. Kyangana thuwathikya eriyirebya ndeke kwilhaba enyuma. Thwangana bugha thuthi thwanzire Nyamuhanga, aliriryo emibere eya thukathwaliramo ebye Ekinywe kiwe, e Biblia yikakangiriraya, kikabisulha ekwenene y’amalengekania n’ebighendererwa eby’emithima yethu.

20 E Biblia kwenene ni kitabu ekikalhua eyiri Nyamuhanga. Ni kitabu ekitholere erisomwa, erigha, n’erisuwa. Kanganaya erisima lyawu ekihembo kya Nyamuhanga kino omwi lholha embere wukasekulya ebirimu kyo. Wukakolha wuthya, wukendi yitheghererya kutsibu ekighendererwa kya Nyamuhanga busana n’abandu. Eriminya ekighendererwa ekyo nga ni kyahi kandi ngoku kikendi syabererera kikendi kanibwako omwa sura eyikakwamako.

EBYE BIBLIA YIKAKANGIRIRAYA

  • E Biblia ni kitabu ekya theghekanibawa na Nyamuhanga neryo kwesi kihikire kandi ni ky’eriyikethera.—2 Timoteo 3:16.
  • Omwatsi owali omwa Kinywe kya Nyamuhanga ni w’omubongo busana n’engebe eya buli kiro.—Isaya 48:17.
  • Emilhaghe ya Nyamuhanga eyiri omwa Biblia yikendi syabererera ahathe erithika-thika.—Emiganzo 23:19.

*  Nomwakine indi abandi bandu bakabugha bathi ebitsweka birebe ebye Biblia bikahukana okwa bindi, emyatsi ng’eyo si yiwithe bwema. Lebaya esura 7 eya ekitabu The Bible—God’s Word or Man’s? ekya sakawa n’Abema ba Yehova.

#  Ng’eky’erireberyako, thalebya erithondekania ery’olhubutho lhwa Yesu alhwiremu olhuli omu Luka 3:23-38.

%  Eribana emyatsi eyirengire aho okwa buminyereri bwe Biblia, lebaya olhupapura 27-9 olhw’akatabu A Book for All People, akasakawa n’Abema ba Yehova.

^  Erithoghothibwa lye Babeli ni ky’erireberyako kighuma kisa eky’eribererera ly’obuminyereri bwe Biblia. Ebindi by’erireberyako mwamuli erithoghothibwa lye Tiro na Ninawe. (Ezekieli 26:1-5; Zefania 2:13-15) Kandi, obuminyereri bwa Danieli mubwa lhaghulha erithondekania ery’amami w’ekihugho awangabere okwa buthoki enyuma we Babeli. Aya mwamuli Abamedi na Abapersia ne Griki. (Danieli 8:5-7, 20-22) Lebaya Enyongezyo, erikania okw’amaminyereri mangi aw’Ekimasiya awa bererera oku Yesu Kristo.


Ebibulyo eby’Erigha

1, 2. E Biblia yikasisimulha omu nzira ki ng’ekihembo ekikalhua eyiri Nyamuhanga?

3. Yehova erithuha e Biblia kikathubwira ki okw’iyo, kandi busana naki eki kikatsemesaya kutsibu?

4. Ekikakuswekaya okw’ighaba lye Biblia niki?

5. E Biblia ‘yatheghekanibawa na Nyamuhanga’ omu nzira ki?

6, 7. Busana naki erilighirana ly’omwatsi owali omwa Biblia ni ry’omubongo?

8. Iha eby’erireberyako ebikakanganaya bithi e Biblia yihikire omwa myatsi y’esayansi.

9. (a) E Biblia yikayikanganaya eribya eyihikire omwa byafayo n’eriyiketherwa omu nzira ki? (b) Ekwenene y’abasakangi bayo yikakubwira ki okwa Biblia?

10. Busana naki sikiriswekaya e Biblia eribya ini kitabu ekikaghasa?

11, 12. (a) Ni myatsi yahi eya Yesu akanaya omw’Ikangirirya liwe ery’okwa Kithwe? (b) Ni yindi myatsi yahi eyikaghasa eya Biblia yikakanaya ko, kandi busana naki erihabulha lyayu likaghasa mughulhu wosi?

13. Ni myatsi yahi eyihambire oku Babeli eya Yehova abwira omuminyereri Isaya athi asakange omwa buswire?

14, 15. Emyatsi mirebe ey’obuminyereri bwa Isaya eyihambire oku Babeli muya bererera yithi?

16. (a) Isaya mwalhaghulha athi ekyanga hikire oku Babeli niki? (b) Obuminyereri bwa Isaya obuhambire okwa Babeli eribya mulhalha mubwa bererera buthi?

17. Eribererera ly’amaminyereri we Biblia likahimba lithi erikirirya?

18. Ni binywe ki eby’amani ebya omukwenda Paulo akabugha okwa ‘kinywe kya Nyamuhanga’?

19, 20. (a) E Biblia yanga kuwathikya yithi eriyirebya? (b) Wanga kangania wuthi ngokwa wukasima ekihembo kya Nyamuhanga eky’embaghane, e Biblia?

Thasyaminya Bingyi

Saba eryeghesibwa e Biblia ahathe erithuha

Busana Naki Kitholere Erigha e Biblia?

E Biblia yikaha abandu bangyi erithimba omwa kihugho kyosi b’eby’erisubirya okwa bibulyo bikulhu omwa ngebe. Wunanzire eribya mughuma w’okw’ibo?