Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Kwenene Yikakangiriraya Ki?

ENYONGEZYO

1914—Omwaka Omukulhu Omwa Buminyereri bwe Biblia

1914—Omwaka Omukulhu Omwa Buminyereri bwe Biblia

HAKUHI emyaka nga makumi ani embere, abigha be Biblia mubathulhughania omwatsi bathi omwa mwaka owa 1914 hangabere emyatsi mirebe emikulhu-mikulhu. Emyatsi eyangabere eyi ni yahi, kandi ni bwema bwahi obukakanganaya omwaka 1914 kwa ni mukulhu?

Ngoku kisakire omu Luka 21:24, Yesu mwabugha athi: ‘Ebihanda byasya lyathangirira e Yerusalemu erihika aho emighulhu y’ebihanda ya syabererera.’ Yerusalemu abya iw’omuyi mukulhu ow’ekihanda ky’Abayuda—ekithumbi ky’obuthabali eky’abami erilhua omwa nyumba y’Omwami Dawudi. (Esyonyimbo 48:1, 2) Aliriryo, abami bano babya bambaghane okw’abandi basondoli ab’ebindi bihanda. Mub’ikalha okwa ‘kithumbi ky’obwami ekya Yehova’ ng’abimaniri ba Nyamuhanga iyuwene-wene. (1 Emyatsi y’Emigulu 29:23) Neryo e Yerusalemu kabya kaminyikalho ak’obuthabali bwa Yehova.

Neryo ibbwa, obuthabali bwa Nyamuhanga bwa tsuka ‘erilyathangirirwa n’ebihanda’ mughulhu wahi kandi buthi? Eki mukyabya omwa 607 B.C.E. omughulhu e Yerusalemu yakindawa n’Abanya Babeli. ‘Ekithumbi ky’obwami ekya Yehova’ mukya sighalha kithya, n’erithondekania ery’abami abalhwire oku Dawudi mulya thwika. (2 Abami 25:1-26) Mbwino ‘erilyathangirirwa’ eri lyangabereho kera na kera? Eyihi, kusangwa obuminyereri bwa Ezekieli mubwa kania okwa mwami w’erighunzerera owe Yerusalemu ya Zedekia buthi: ‘Lhusaya ekitambara, wulhusaye embitha. Sikyendi syaswabya kithya erihika aho oyuwithe eritswera asyasira, naghe nasyamuha kyo.’ (Ezekieli 21:26, 27) Oyuwithe ehamuli ‘y’eritswera’ ey’embitha ya Dawudi ni Yesu Kristo. (Luka 1:32, 33) Busana n’ekyo ‘erilyathangirira’ lyanga hwereho Yesu abiribya Mwami.

Omwatsi mukulhu oyu angabereho mughulhu wahi? Yesu mwakangania athi Abanya Bihanda banga thabere ahabw’obuthuku obutheghekirwe. Omwatsi owali omu Danieli sura 4 ali mw’emyatsi eyikabaririra obuthuku obu nga bwanga ghunzire mughulhu mungahi. Akakanaya okwa buminyereri bw’esyonzoli esy’Omwami Nebukadneza owe Babeli abana. Mwalhangira omuthi muli-muli owakondawa. Ekisiki kyawu sikyanga lhasire kusangwa mukya bohwa omwa kyuma n’omulinga. Omumalaika mwabugha athi: ‘Emighulhu irinda yimulhabeko.’—Danieli 4:10-16.

Omwa Biblia, emithi ahandi n’ahandi yik’imanira amathabali. (Ezekieli 17:22-24; 31:2-5) Kwesi erikonda omuthi w’akaminyikalho, kik’imanira ngoku obuthabali bwa Nyamuhanga obwabya bukimanirwa n’abami e Yerusalemu, bwang’imanire. Aliriryo, esyonzoli musya kangania sithi ‘erilyathangirira lye Yerusalemu’ lyangabere ly’omughulhu muke—obuthuku ‘bw’emighulhu irinda.’ Obuthuku obwo ni mughulhu mungahi?

Eribisulirwa 12:6, 14 likakanganaya lithi emighulhu isathu n’engegha yingene-ngene ‘n’ebiro rukumi bibiri n’engagha.’ ‘Emighulhu irinda’ yanga ghunzire emighulhu isathu n’embindi emirundi ibiri, kutse ebiro 2,520. Aliriryo Abanya Bihanda mubathalekeraho ‘erilyathangirira’ obuthabali bwa Nyamuhanga omwa biro 2,520 bisa enyuma w’eriwa lye Yerusalemu. Kilhangirikire kwesi, obuminyereri obu bughunzire buthuku buuli kwilhaba aho. Erikwamana ne Emiganzo 14:34 na Ezekieli 4:6, eyikakanaya okwa ‘kiro busana n’omwaka mughuma,’ ‘emighulhu irinda’ yanga ghunzire emyaka 2,520.

Emyaka 2,520 yatsuka omwa kw’Erikumi 607 B.C.E., omughulhu e Yerusalemu yahambawa n’Abanya Babeli neryo omwami erilhua omwa nyumba ya Dawudi mwalhusibwa okwa kithumbi kiwe eky’obwami. Obuthuku obwo mubwahwa omwa kw’Erikumi 1914. Okwa ndambi eyo, ‘emighulhu y’ebihanda’ muyahwa, na Yesu Kristo mwasinga ng’Omwami wa Nyamuhanga ow’elhubulha.*—Esyonyimbo 2:1-6; Danieli 7:13, 14.

Ngoku Yesu ana lhaghulha, “erihika” liwe ng’Omwami w’elhubulha lyabiri kanganibwa omwa myatsi eyikathikaya eyiri omwa kihugho—esyonyuhi, esyonzalha, emisiki, esyondwalha. (Matayo 24:3-8; Luka 21:11) Emyatsi ng’eyo yikaha obwimiri obw’akaghalha erikangania indi 1914 kwenene bw’obuthuku obwa buthukira mw’Obwami bwa Nyamuhanga obw’elhubulha n’eritsuka lye “biro by’enyuma-nyuma” eby’erihwererera ly’emighulhu mibi eno.—2 Timoteo 3:1-5.


*  Erilhua omwa kw’Erikumi 607 B.C.E. erihika omwa kw’Erikumi 1 B.C.E. ni myaka 606. Kundi sihali mwaka ziro, erilhua okw’Erikumi 1 B.C.E. erihika okw’Erikumi 1914 C.E. ni myaka 1,914. Eryongera emyaka 606 y’okwa emyaka 1914, thukabana emyaka 2,520. Eribana omwatsi owahambire okw’iwa lye Yerusalemu omwa mwaka 607 B.C.E., lebaya omuthwe Chronology omwa Insight on the Scriptures, eyasakawa n’Abema ba Yehova.

‘EMIGHULHU IRINDA’
Emyaka 2,520
Emyaka 606 n’emikera isathu
Okw’Erikumi 607 B.C.E. erihika
31 okw’Erikumi n’Eyibiri, 1 B.C.E
Emyaka 1,913 n’emikera mwenda
1 Okwa Kubanza, 1 C.E. erihika
okw’Erikumi 1914
607

‘Ebihanda bya syalyathangirira e Yerusalemu’

E Yerusalemu yikathoghothibawa
←B.C.E. C.E.→ 1914

‘Oyuwithe eritswera akasa’

Yesu Kristo ng’Omwami

← Lebaya esura eya wamakangirirwa