Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 116: Ngoku Thwangabyaho Kera na Kera

Olhughano 116: Ngoku Thwangabyaho Kera na Kera

WANGANA minya ekya mumbesa mulere na munywani wiwe bakasoma? Inga, ky’ekitabu ekya wunemusoma—Ekitabu Kyaghe eky’Esyangano sye Biblia. Kandi bakasoma olhughano olhwa wuneko—“Ngoku Thwangabyaho Kera na Kera.”

Omulhwana iniane musoma

Wunasi ebya bak’igha? Eky’erimbere, thutholere ithwaminya Yehova na Mughalha wiwe Yesu thwamabya ab’eribyaho kera na kera. E Biblia yikabugha yithi: ‘Eyi y’enzira ey’eribyaho kera na kera. Erigha oku Nyamuhanga mughuma ow’ekwenene, na Mughalha wiwe ey’athuma okwa kihugho, Yesu Kristo.’

Thwang’igha thuthi oku Yehova Nyamuhanga na Mughalha wiwe Yesu? Enzira nguma ry’erisoma Ekitabu Kyaghe eky’Esyangano sye Biblia erilhua okw’itsuka erihika okw’ighunzerera. Kikabugha bingi oku Yehova na Yesu, kwabithe? Kandi kikakanaya bingi okwa bindu ebya babirikolha n’ebindu ebya bakisiya ibakolha. Aliriryo thutholere ithwakolha kwilhaba erikwama kya soma ekitabu kino.

E Biblia

Wanamalhangira ekindi kitabu ky’ahisi? Ye Biblia. Bana omundu akusomere ebitsweka erilhua omwa Biblia ebihambire okwa syangano esy’ekitabu kino. E Biblia yikathuha omwatsi wosi owa thukayithagha nuku ithwe bosi thwanga kolera Yehova omwanzira eyihikire n’eribana engebe y’erikotha. Neryo thutholere ithwakolha mwa mutse ow’erigha e Biblia y’omughulhu wosi.

Aliriryo erigha oku Nyamuhanga Yehova na Yesu Kristo lisa sikirighunza. Thwanganabya n’obwenge bunene okw’ibo n’esyangangirirya syabu, kandi nibya ithwasyalemwa eribana engebe y’erikotha. Wunasi ekindi ekikayithayisibawa?

Thutholere ithwaghendera okwa bindu thuk’igha. Wanamibuka Yuda Iskariota? Abya mughuma okw’abandu 12 aba Yesu asombolha ng’abakwenda biwe. Yuda abya withe obwenge bunene oku Yehova na Yesu. Aliriryo niki ekyabya kyamubereko? Enyuma w’ebiro nga bya n’ebyo, mwayanza, kandi mwaghoberya Yesu oku syanzighu siwe ahabw’ebihandi 30 eby’ebitsipa. Busana n’ekyo Yuda syendi syabana engebe y’erikotha.

Wanamibuka Gehazi, omulhume oyuthw’ighako omwa Lhughano olhwa 69? Mwanza erimya esyangimba n’esyambulho esithe siwe. Neryo mwabugha amabehi eribana ebindu ebi. Aliriryo Yehova mwamusuyira. Nethu nibya akendisya thusuyira thwamathendi owa ebihano biwe.

Aliriryo hali abandu bangi ababuya abakakolera Yehova n’obuthaleghulha omughulhu wosi. Thwanzire eribya ng’ibo, kwabithe? Omulhwana Samweli ni ky’erireberyako ekyuwene eky’erikwama. Wibuke, ngoku thwalhangira omwa Lhughano 55, aby’awithe birimo bbini kutse bithano eby’obukulhu omughulhu atsuka erikolera Yehova omwa hema yiwe ey’eriramiryamo. Neryo n’omwa wangabya wuthi mulere, siwuli mulere kutsibu erikolera Yehova.

Omwa kwenene, omundu oyo thukanza ithwe abosi erikwama ni Yesu Kristo. Nibya n’omughulhu abya inyakine mulhwana, ngokwa kinakanganibwe omwa Lhughano lhwe 87, abya inyane omwa hekalu akakanirya abandi oku Thatha wiwe ow’elhubulha. Thukwame eky’erireberyako kiwe. Thubwire abandu abangi oku Yehova Nyamuhanga wethu mubuya na Mughalha wiwe Yesu Kristo, ngoku thwanga thoka. Thwamakolha ebindu ebi, neryo ithukendi syathoka eribyaho kera na kera okwa kihugho omwa paradiso nyihya-nyihya eya Nyamuhanga.

Yoane 17:3; Esyonyimbo 145:1-21.



Ebibulyo

  • Thutholere ithwaminya ki thwamabya ab’erisyabyaho kera na kera?
  • Thwang’igha thuthi oku Yehova Nyamuhanga na Yesu, ngokwa kikanganibwe n’omumbesa omulere n’abanywani biwe omwa kisasani?
  • Ni kindi kitabu ki ekya wukalhangira omwa kisasani, kandi busana naki thutholere ithwakisoma mughulhu wosi?
  • Erihaku erigha oku Yehova na Yesu, ni kyahi ekindi ekikayithayisibawa erithunga engebe ey’erikotha?
  • Omwa Lhughano 69, thuk’igha mw’isomo ki?
  • Eky’erireberyako ekyuwene ekya Samweli akine mulere omwa Lhughano 55 kikakanganaya ki?
  • Thwanga kwama thuthi eky’erireberyako ekya Yesu Kristo, kandi thwamakolha thuthya, ithukendi syakolha ki omughulhu owakayasa?

Ebibulyo eby’eryongerako

  • Soma Yoane 17:3.

    Amasako akakanganaya athi ngoku erigha oku Yehova Nyamuhanga na Yesu Kristo sikiri manyisaya erikwama kya bihambira omwa muthwe lisa? (Mt. 7:21; Yak. 2:18-20; 1 Yn. 2:17)

  • Soma Esyonyimbo 145:1-21.

    Ni nzumwa ki esya thuwithe esikaleka ithwa pipa Yehova? (Esy. 145:8-11; Erib. 4:11)

    Yehova ni ‘mubuya okw’abosi’ athi, kandi eki kitholere ikya thusegherya hakuhi nayu kithi? (Esy. 145:9; Mt. 5:43-45)

    Yehova amabya inyakatsemesaya omuthima wethu, ikikendi thusukuma erikolha ki? (Esy. 119:171, 172, 175; 145:11, 12, 21)