Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 115: E Paradiso Nyihya-Nyihya Okwa Kihugho

Olhughano 115: E Paradiso Nyihya-Nyihya Okwa Kihugho

THASAMALIRA emithi emiri-miri erya, ebimole ebyuwene n’ebithwa biri-biri. Hano si habuya? Thasamalira engabi ngokwa yikalira omwa byalha eby’omulhwana mulere. Kandi thasamalira esyandale n’esyasabayiri ngokwa si n’imene omwa lhulisiryo. Siwanganzire erikalha omwa nyumba eyiri omwa kitsweka ekiri ng’eki?

Nyamuhanga anzire iwabyaho kera na kera okwa kihugho omwa paradiso. Kandi syanzire wukabana erilhumwa lyosi n’obulhumi obw’abandu bakabana munabwire. Eri ly’erilhagha lye Biblia okw’abo abakendi sy’ikalha omwa paradiso enyihya-nyihya: ‘Nyamuhanga asyabya haghuma nabu. Sihendi syaswabya olhuholho kutse eririra kutse eriaghalhwa. Emyatsi y’erimbere yabiri lenga.’

Yesu akendi syalhangira athi embinduka embuya eyi yika bererera. Wunasi nga ni mughulhu wahi? Inga, y’enyuma w’eribirilhusya omwa kihugho mw’obubi bwosi n’abandu babi. Wibuke, omughulhu Yesu abya okwa kihugho mwalhamya abandu abawithe amalhwere owali mulingo-mulingo, kandi nibya mwalhubukya abandu erilhua omw’abaholi. Yesu akolha eki erikangania eky’angakolire okwa kihugho kyosi omughulhu angabere Mwami w’obwami bwa Nyamuhanga.

Thakwama kyalengekania ngokwa paradiso nyihya-nyihya okwa kihugho ngokwa yikendi syuwana! Yesu, haghuma n’abaghuma okw’abo abakasombolha, bakendi syabya ibakathabalira elhubulha. Abathabali aba bakendi syatsomana obuli mundu wosi okwa kihugho n’erilhangira bathi batsemire. Leka thulebaye ekya thutholere ithwakolha erilhangira thuthi Nyamuhanga akendisya thuha engebe y’erikotha omwa paradiso yiwe nyihya-nyihya.

Eribisulirwa 21:3, 4; 5:9, 10; 14:1-3.

Eparadiso


Ebibulyo

  • E Biblia yikakanganaya mibere ki eya thukendi syatsemera omwa kihugho Paradiso?
  • E Biblia yikalhaghanisaya ki abakendi sy’ikalha omwa Paradiso?
  • Yesu akendi syaletha embinduka eno eyuwene ya mughulhu wahi?
  • Omughulhu Yesu abya okwa kihugho, mwakolha ki erikangania eky’akendi syakolha abiribya Mwami w’Obwami bwa Nyamuhanga?
  • Yesu n’abo abakendi syathabalha nabu omwa lhubulha, bakendi syalhangira bathi bakakolha ki omughulhu basya thabalha ekihugho?

Ebibulyo eby’eryongerako

  • Soma Eribisulirwa 5:9, 10.

    Busana naki ithwabya n’eriyikethera thuthi abakendi syathabalha ekihugho omwa birimo Rukumi bakendi syabya bami n’abahereri ab’olhukeri n’erighanyira? (Efe. 4:20-24; 1 Pet. 1:7; 3:8; 5:6-10)

  • Soma Eribisulirwa 14:1-3.

    Eribugha ambu erina lya Thatha n’erya Kyana ky’embuli lisakirwe okwa syambumo esye 144,000 kikamanyisaya ki? (1 Kor. 3:23; 2 Tim. 2:19; Erib. 3:12)