Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 114: Erihwa ery’Obubi Bwosi

Olhughano 114: Erihwa ery’Obubi Bwosi

NIKI ekya wulhangire hano? Inga, ni mahe okwa syasabayiri nyeru-nyeru. Aliriryo samalira eya sikalhua. Esyasabayiri sikathibithira okwa bithu kwa kutsibu sikalhua elhubulha! Elhubulha kwenene yine esyasabayiri?

Yesu ng’Omwami elhubulha

Eyihi, esi si syasabayiri esya nyine-nyine. Thukyasi thuthya kusangwa esyasabayiri si syanga thibithira okwa bithu, kwabithe? Aliriryo e Biblia yikana kanaya okwa syasabayiri omwa lhubulha. Wunasi ekikaleka?

Ni busana esyasabayiri syanabya sikakolesibwa kutsibu omw’amalhwa. Neryo e Biblia yikakanaya okw’abandu abakandaghalha okwa syasabayiri erilhua elhubulha erikangania indi Nyamuhanga ali n’olhuhi erilhwa n’abandu okwa kihugho. Wunasi ekitsweka eky’olhuhi olhu nga kikahulhawa kithi? Harmagedoni. Olhuhi olho ni lhw’erihwerekererya obubi bwosi okwa kihugho.

Yesu Yukendi syasondolha amalhwa w’olhuhi olhu okwa Harmagedoni. Wibuke, Yesu yuwasombolhawa na Yehova eribya mwami w’obuthabali Bwiwe. Kyakireka Yesu inyambalha embitha ey’omwami. N’omuyali akakanganaya athi akendi sy’itha esyanzighu sya Nyamuhanga esyosi. Kyangana thuswekya indi Nyamuhanga akendi syathoghothya abandu babi abosi?

Thasamalira enyuma okwa Lhughano lhwe 10. Wamalhangira yaki? Inga, Eribogha ly’amaghetse eryathoghothaya abandu babi. Oyuwaletha Eribogha ly’amaghetse eri nindi? Nyamuhanga Yehova. Hathya samalira Olhughano olhwe 15. Yiri ki? E Sodomo na Gomora bine muthoghothibwa n’omuliro owathumawa na Yehova.

Suba okwa Lhughano olhwa 33. Lhangira ekikahika okwa syasabayiri n’esyagali esyamalhwa esy’abanya Misiri. Nindi oyuwaleka amaghetse inyasiribirya? Yehova. Akikolha eritheya abandu biwe. Thasamalira okwa Lhughano olhwa 76. Wukendi lhangira wuthi Yehova nibya aho akaleka abandu biwe, Abaisraeli, ibathoghothibwa busana n’obubi bwabu.

Busana n’ekyo, sithusweke indi Yehova akendi syathuma amahe iwe erighunzaho obubi bwosi okwa kihugho. Aliriryo thalengekania ekyo nga kikendi syamanyisya ki! Sukulha olhupapura thwangalhangira.

Eribisulirwa 16:16; 19:11-16.



Ebibulyo

  • Ekikaleka e Biblia iyakania okwa syasabayiri omwa lhubulha niki?
  • Olhuhi olhwa Nyamuhanga akendi lhwa n’abandu babi okwa kihugho lhuka hulhawa lhuthi, kandi ekighendererwa ky’olhuhi olhu niki?
  • Omwa kisasani, oyukendi syasondolha amalhwa nindi, ekikaleka inyambalha embitha niki, kandi omuyali wiwe akamanyisaya ki?
  • Erisuba nyuma omwa Lhughano 10 na 15, busana naki sithwanga sweka indi Nyamuhanga akendi syathoghothya abandu babi?
  • Esyangano 3336, na 76 sikathukanganaya sithi indi Nyamuhanga akendi syathoghothya abandu babi nomubanga yithwalha ng’abakamuramaya?

Ebibulyo eby’eryongerako

  • Soma Eribisulirwa 19:11.

    Amasako akakanganaya athi ndeke

    Omusasi owa yitsatsangire okwa lhukimba lhwa Yesu akaghumaya athi ngokwa erisingura liwe lyabiri thwibwamu kandi likendi syaberererya? (Erib. 14:18-20; 19:13; Isa. 63:1-6)

    Ni bahi abakathekawa eribya ibane omw’abasirikali abakwamire Yesu inyane okwa sabayiri yiwe enyeru? (Erib. 12:7; 19:14; Mt. 25:31, 32)