Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 113: Paulo e Roma

Olhughano 113: Paulo e Roma

THUNGERERA esyanjeggere esiri oku Paulo, kandi thungerera omusirikali omu Roma oyukamulinda. Paulo ni munya muliki e Roma. Analindirire erihika aha Kaisari owe Roma akend’ithwamu eky’erimukolera. Inyane munya muliki, abandu bakalighirawa eriyamulebya.

Ebiro bisathu Paulo ahikire e Roma, akalhaghira okw’abakulhu be Yuda erisyamulebya. Ekikalhwamu, Abayuda bangi omwa Roma bakasa. Paulo akabakangiriraya oku Yesu n’obwami bwa Nyamuhanga. Abandi bak’ikiriraya n’eribya Bakristayo, aliriryo abandi sibath’ikirirya.

Paulo omwa muliki

Paulo kandi akakangiriraya abasirikali bangi abali n’omubiiri ow’erimulinda. Ahabw’ebirimo bibiri Paulo ane omwa muliki mwa hano, akathulira obuli mundu ngokw’angathoka. Ekikalhwiririramu, n’ab’erihiika lya Kaisari bakowa okwa engulhu mbuya ey’Obwami, n’abaghuma ab’okw’ibo bakabya Bakristayo.

Aliriryo omugheni oyukasakangira okwa meza nindi? Wangana tebba? Ee, ni Timoteo. Timoteo nayu anabya omwa muliki busana n’erithulhughania Obwami, aliriryo abiriboholhwa kandi. Neryo asire hano erisyawathikya Paulo. Wunasi ekya Timoteo akasakanga? Leka thulebaye.

Wunibukire emiyi eye Filipi na Efeso omwa Lhughano 110? Paulo mwawathikya eritsuka ebithunga eby’Ekrisitayo omwa miyi eyo. Neryo, akabya ane omwa muliki, Paulo akasakangira esyanyawaliho sy’Abakristayo abo. Esyanyawaliho sine omwa Biblia, kandi sikahulhawa mwa Abanya Efeso na Abanya Filipi. Lino Paulo akabwira Timoteo eby’erisakangira abanywani babu Abakristayo e Filipi.

Abanya Filipi balhwe b’olhukeri kutsibu oku Paulo. Muba mulebeka ekihembo hanu omwa muliki, neryo Paulo akabasima busana n’ekyo. Epafrodito y’omulhume oyuwaletha ekihembo. Aliriryo mwalhwalha kutsibu hakuhi anahole. Neryo hathya abirilhama kandi ayitheghekire erisuba eka. Akendi thwalha e nyawaliho eyi erilhua eyiri Paulo na Timoteo akasuba e Filipi.

Akabya ane omwa muliki, Paulo akasakanga esindi nyawaliho ibiri esyathuwithe omwa Biblia. Enguma ni ya Abakristayo ab’omwa muyi we Kolosai. Wunasi nga yikahulhawa yithi? Abanya Kolosai. Eyindi ni nyawaliho ey’asakangira munywani wiwe w’okwandungu oyukahulhawa mwa Filemono nayu oyuw’ikere e Kolosai. E nyawaliho eyi yihambangene okwa mughombe wa Filemono ya Onesimo.

Akabya ane omwa muliki, Paulo akasakanga esindi nyawaliho ibiri esyathuwithe omwa Biblia. Enguma ni ya Abakristayo ab’omwa muyi we Kolosai. Wunasi nga yikahulhawa yithi? Abanya Kolosai. Eyindi ni nyawaliho ey’asakangira munywani wiwe w’okwandungu oyukahulhawa mwa Filemono nayu oyuw’ikere e Kolosai. E nyawaliho eyi yihambangene okwa mughombe wa Filemono ya Onesimo.

Paulo akasaba Filemono erighanyira Onesimo. Paulo akasakanga athi: ‘Nga muthuma erisuba eyawuli. Aliriryo lino syakiri ng’omukobe wawu. Nayu ni mughalha wenyu Omukristayo mubuya.’ Onesimo akabya akasuba e Kolosai, akaheka esyanyawaliho ibiri esi, enguma okw’Abanya Kolosai n’eyindi eyiri Filemono. Thwangana kwama kyalengekania ngokwa Filemono atsemire akaminya athi omughombe wiwe abiribya Mukristayo.

Paulo akabya akasakangira Abanya Filipi na Filemono, omwa kwenene abya inyawithe engulhu mbuya. Paulo akabwira Abanya Filipi athi, ‘Nga bathumira Timoteo. Aliriryo naghe ngendi babalhamira omwa buthuku obw’ahakuhi.’ Kandi akasakangira Filemono athi: ‘Wunyitheghekere omwanya ow’eribyamo.’

Paulo akabya abiriboholhwa, akabalhamira Abakristayo baghalha babu na bali babu omwa bitsweka bingi. Enyuma waho, Paulo kandi akathasya boherawa e Roma. Endambi eno lero akyasi athi akay’ithibawa. Neryo akasakangira Timoteo n’erimubwira athi ase lhuba. Paulo akasakanga athi: ‘Ngalhue muthaleghulha oku Nyamuhanga, kandi Nyamuhanga akendisya nyihemba.’ Birimo bike Paulo inyamabiri ithibwa, e Yerusalemu yamathoghothibwa kandi, lero na Abanya Roma.

Aliriryo omwa Biblia muli bingi. Nyamuhanga Yehova akasakangisaya ebitabu eby’erighunzerera n’omukwenda Yoane, imwamuli ekitabu eky’Eribisulirwa. Ekitabu kino ekye Biblia kikakanaya okwa mughulhu owakasa. Leka thw’ighe hathya okwa biri omwa mughulhu owakasa.

Emibiri 28:16-31; Abanya Filipi 1:13; 2:19-30; 4:18-23; Abaebrania 13:23; Filemono 1-25; Abanya Kolosai 4:7-9; 2 Timoteo 4:7-9.



Ebibulyo

  • Paulo akabya ane omwa muliki mwe Roma, akathulira engulhu yandi?
  • Omwa kisasani, omugheni oyuli okwa meza nindi, kandi akakolera Paulo yaki?
  • Epafrodito nindi, kandi akathwalha ki akasuba e Filipi?
  • Ekikaleka Paulo inya sakangira munywani wiwe ow’okwandungu ya Filemono y’enyawaliho niki?
  • Paulo akabya abiriboholhwa akakolha ki, n’enyuma waho ekikamuhikako niki?
  • Yehova akakolesaya ndi erisakanga ebitabu bye Biblia eby’erighunzerera, n’ekitabu ky’Eribisulirwa kikakanaya okuki?

Ebibulyo eby’eryongerako

  • Soma Emibiri 28:16-31 na Abanya Filipi 1:13.

    Paulo mwa kolesaya athi obuthuku bwiwe inyane omwa muliki mwe Roma, kandi erikirirya liwe erikalire mulyahamba lithi okwa kithunga ky’Ekikrisitayo? (Emib. 28:23, 30; Fil. 1:14)

  • Soma Abanya Filipi 2:19-30.

    Ni binywe ki eby’erisima ebya Paulo abugha oku Timoteo na Epafrodito, kandi thwanga gherererya thuthi eky’erireberyako kya Paulo? (Fil. 2:20, 22, 25, 29, 30; 1 Kor. 16:18; 1 Tes. 5:12, 13)

  • Soma Abanya Filipi 1-25.

    Paulo ahana Filemono erikolha ekitholere akasighikira okuki, kandi eki kikakolha kithi ng’eky’abasyakulhu b’ekithunga erilhangirirako munabwire? (File. 9; 2 Kor. 8:8; Gal. 5:13)

    Ebinywe bya Paulo ebiri omu Filemono 13, 14 bikakanganaya bithi ngokw’aby’asikirye obunya muthima-thima bw’abandi omwa kithunga? (1 Kor. 8:7, 13; 10:31-33)

  • Soma 2 Timoteo 4:7-9.

    Ng’omukwenda Paulo, thwangabya thuthi n’eriyikethera indi Yehova akendi syathuhemba thwamasighalha ithune abatheleghulha erihika okwa nduli? (Mt. 24:13; Ebr. 6:10)