Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 107: Setefano Akaswiribawa Omwa Mabwe

Olhughano 107: Setefano Akaswiribawa Omwa Mabwe

OMULHUME oyukukamire hano ni Setefano. Ni mw’igha wa Yesu oyutheleghulha. Aliriryo thathungerera ekikamubanikako lino! Abalhume aba bane mumughusa kw’amabwe manene-manene. Busana naki baponire Setefano ya kutsibu n’erihika okw’ikolha ekindu kibi eki? Leka thulebaye.

Setefano akaswiribawa omw’amabwe

Nyamuhanga alhwe inyane muwathikya Setefano erikolha ebithiko-thiko ebw’eriswekya. Abalhume aba sibanzire eki, neryo bakamukubisaya obuhaka busana n’erikangirirya abandu b’ekwenene. Aliriryo Nyamuhanga akaha Setefano y’obwenge bunene, neryo Setefano akakanganaya athi abalhume aba, bakakangiriraya ebindu by’amabehi. Kino kikaleka ibahithana kutsibu. Neryo bakamuhamba, n’eribirikira abandu base bamukanaye kw’amabehi.

Omuhereri mukulhu akabulhaya Setefano athi: ‘Emyatsi eyi nina ya kwenene?’ Setefano akasubiraya akaha omukania mubuya erilhua omwa Biblia. Erighunzerera lyaghu, akakanaya ngoku abalhume babi mubaghana abaminyereri ba Yehova kera. Neryo akabugha athi: ‘Muli nga balhume abo. Mumw’itha omughombe wa Nyamuhanga ya Yesu, kandi mwabirighana erisikya ebihano bya Nyamuhanga.’

Kino kikaleka abakulhu-bakulhu b’edini ibahithana kutsibu! Bakakereghetha ameno abu omwa kinigha. Neryo Setefano akalhalhamira endatha, n’eribugha athi: ‘Lebaya! Ngalhangira Yesu inyanimene okwa lhuhandi lhwa malya lhwa Nyamuhanga omwa lhubulha.’ Busana n’eki, abalhume aba bakahira ebyalha byabu by’okwa mathwe abu n’erithibitha oku Setefano. Bakamuhamba n’erimukurira eyihya sy’omuyi.

Hano bakalhusaya esyakoti syabu n’erisihererya omulhwana ya Saulo asitheghaye. Wanamalhangira Saulo? Neryo abaghuma b’okw’abalhume bakatsuka eriwusanga amabwe w’oku Setefano. Setefano akakukama ahisi, ngokwa w’amalhangira, n’erisaba Nyamuhanga athi: ‘Yehova, siwubasuyire busana n’ekindu kibi eki.’ Anasi ngokw’abandi ab’okw’ibo babiri thebibwa n’abakulhu-bakulhu b’edini. Enyuma w’ekyo Setefano akaholha.

Omundu amakukolha kwa kindu kibi, nawu wukalengesaya erithuhulya ekibi, kutse wukasaba Nyamuhanga amuhuthalhaye? Setefano na Yesu mubatha kolha bathya. Mubabya b’olhukeri n’okwabu abathabya n’olhukeri okw’ibo. Thulengesaye erigherererya eky’erireberyako kyabu.

Emibiri 6:8-15; 7:1-60.



Ebibulyo

  • Setefano nindi, kandi Nyamuhanga alhwe akamuwathikya erikolha ki?
  • Setefano akabugha ki ekikahithanaya kutsibu abakulhu b’amadini?
  • Abalhume bakabya bakurubanira Setefano y’eyihya sy’omuyi, bakamukolha ki?
  • Omwa kisasani, omulhwana mulere oyuwimene hakuhi n’esyakoti nindi?
  • Setefano athali aholha, akasaba Yehova yaki?
  • Thukagherererya Setefano, thutholere ithwakolha ki omundu amathukolha nabi?

Ebibulyo eby’eryongerako

  • Soma Emibiri 6:8-15.

    Ni mitse ki ey’amabehi ey’abakulhu b’amadini babiri lengesya erikolesya erimania omubiiri ow’erithulhughania engulhu ow’Abema ba Yehova? (Emib. 6:9, 11, 13)

  • Soma Emibiri 7:1-60.

    Ekya wathikaya Setefano erilhwira ndeke engulhu yuwene embere sy’eribuyiro niki, kandi thwang’igha ki okw’eky’erireberyako kiwe? (Emib. 7:51-53; Abar. 15:4; 2 Tim. 3:14-17; 1 Pet. 3:15)

    Thutholere ithwabya na mibere ki eyiri abaka hakanisaya omubiiri wethu? (Emib. 7:58-60; Mt. 5:44; Luka 23:33, 34)