Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 99: Omwa Kisenge eky’Endatha

Olhughano 99: Omwa Kisenge eky’Endatha

HATHYA n’igholho-gholho erya kyakani, ebiro bibiri byalhabire. Yesu n’abakwenda biwe babiriasa omwa kisenge kino eky’endatha erirya ekihulho eky’ekiro ky’Erikiruka. Omulhume oyuwukalhangira akahulhuka ni Yuda Iskariota. Akayabwira abahereri ngokwa bangahamba Yesu.

Ekihulho ky’Omukama eky’erigholho-gholho

Ekiro ekilhabire, Yuda mwaghenda eyabali n’eriya babulya athi: ‘Mukendi nyiha ki namabawathikya erihamba Yesu?’ Mubabugha bathi: ‘Ebihandi makumi asathu eby’ebitsipa.’ Neryo hathya Yuda akayabana abalhume bano angabaletha eyiri Yesu. Eki sikibi kutsibu?

Ekihulho eky’Erikiruka kyamahwamu. Aliriryo ibbwa Yesu akatsuka ekindi kihulho ekiri mbaghane. Akaha abakwenda biwe bw’omuggati n’eribugha athi: ‘Mulye gho, kusangwa oyu ni mubiri waghe ow’akendi hebwa busana nenyu.’ Neryo kandi akabahambaya olhuthehi lhw’ebinyu n’eribugha athi: ‘Munywe, kusangwa oyu ni musasi waghe, ow’akendi uthika busana nenyu.’ E Biblia yikahulha eki mwa ‘ekihulho eky’erigholho-gholho eky’Omukama wethu,’ kutse ‘ekya kiro ekya Mukama wethu.’

Abaisraeli ibakalya ekihulho eky’Erikiruka bak’ibuka omughulhu malaika wa Nyamuhanga ‘akiruka’ amanyumba abo e Misiri, aliriryo itha ehimbere omw’amanyumba w’Abanya Misiri. Yesu ibbwa hano akanza abigha biwe bamwibuke, kandi ngokw’aha engebe yiwe ahabwabu. Neryo eyi y’enzumwa eyikaleka inyababwira athi bibuke ekihulho eki ekya mbaghane obuli kirimo.

Bakabya babirirya ekihulho eky’erigholho-gholho eky’Omukama, Yesu akabwira abakwenda biwe athi babye mbangi n’erikalha omw’ikirirya. Erighunzerera, bam’imbira Nyamuhanga y’esyonyimbo n’erighenda. Bwabir’ira kutsibu, obundi omwa kathi k’erithumbi. Thulebaye aha bakaya.

Matayo 26:14-30; Luka 22:1-39; Yoane sura 13 erihika 17; 1 Abanya Korinto 11:20.



Ebibulyo

  • Ngokwa kikanganibwe omwa kisasani, ekikaleka Yesu n’abakwenda biwe 12 ibaghenda omwa kisenge kinene eky’endatha niki?
  • Omulhume oyukaghenda nindi, kandi akayakolha ki?
  • Ni kihulho ki eky’embaghane ekya Yesu akatsukisaya enyuma w’erirya ekihulho eky’Erikyuruka?
  • Erikyuruka lik’ibukaya Abaisraeli ba kindu ki, kandi ekihulho eky’embaghane eki kik’ibukaya abakwenda ba Yesu baki?
  • Enyuma w’Ekihulho ky’Erigholho-gholho ekyo Mukama, Yesu akabwira abakwenda biwe baki, kandi bakakolha ki?

Ebibulyo eby’eryongerako

  • Soma Matayo 26:14-30.

    Matayo 26:15 akakanganaya athi ngoku Yuda erighoberya Yesu akighenderera?

    Eryuthika ly’omusasi wa Yesu liwithe bighendererwa ki bibiri? (Mt. 26:27, 28; Yer. 31:31-33; Efe. 1:7; Ebr. 9:19, 20)

  • Soma Luka 22:1-39.

    Satani mw’ingira omwa muthima wa Yuda mwanzira ki? (Luka 22:3; Yn. 13:2; Emib. 1:24, 25)

  • Soma Yoane 13:1-20.

    Erikwamana n’omwatsi owali omu Yoane 13:2, Yuda angana tswebwa busana n’eky’akolha, abaghombe ba Nyamuhanga bang’igha mw’isomo ki? (Enz. 4:7; 2 Kor. 2:11; Gal. 6:1; Yak. 1:13, 14)

    Ni somo ki erikulhu erya Yesu aha? (Yn. 13:15; Mt. 23:11; 1 Pet. 2:21)

  • Soma Yoane 17:1-26.

    Yesu mwa sabira abakwenda biwe athi babye “mughuma” omwanzi ki? (Yn. 17:11, 21-23; Abar. 13:8; 14:19; Kol. 3:14)