Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 95: Yesu Ngokw’Akakangiriraya

Olhughano 95: Yesu Ngokw’Akakangiriraya

KIRO kighuma Yesu akabwira omulhume athi anze omuliranwa wiwe. Omulhume akabulhaya Yesu athi: ‘Nindi ya muliranwa waghe?’ Yesu anasi eky’omulhume oyu akalengekanaya. Omulhume akalengekanaya athi abandu b’erangi yiwe n’edini yiwe b’abaliranwa biwe. Neryo leka thulebaye ekya Yesu akamubwira.

Obundi buthuku Yesu akakangiriraya omwi thulha olhughano. Neryo eki ky’akakolha. Akathulha olhughano okwa Muyuda n’Omusamaria. Thwabiri igha ngokw’Abayuda sibalianza Abasamaria. Neryo ibbwa olhu lhw’olhughano lhwa Yesu:

Kiro kighuma habya Omuyuda oyuwabya akandaghalha omwanzira ey’okwa kithwa eyikaya e Yeriko. Neryo abanyeyi mubamuwako. Mubathwalha esyambulho siwe n’erimuswira erihika eribya ng’aholire.

Enyuma waho, omuhereri Omuyuda mwasira omwanzira eyo. Mwalhangira omulhume oyuswiribwe. Wukalengekanaya mwakolha ki? Lebaya, mwakwama kya kyurukira okwa lhundi lhuhandi lhw’enzira n’eriyighendera. N’owundi mulhume w’edini kutsibu nayu mwasa. Abya Mulawi. Mwan’imana? Eyihi, nayu mwath’imana akawathikya omulhume oyuwaswiribawa. Wanganalhangira omuhereri n’Omulawi elhuthambi erya bakandaghalha omwanzira.

Aliriryo lhangira oyuli hano n’omulhume oyuswiribwe. Ni Musamaria. Kandi anemuwathikya Omuyuda. Anemuhira omubatsi w’okwa bironda biwe. Enyuma waho, akathwalha Omuyuda y’ahangabanira erihumulira n’eribya ndeke.

Omusamaria omuliranwa

Akabya abirighunza olhughano lhwiwe, Yesu akabugha n’omulhume oyuwa mubulhaya ekibulyo: ‘Ni wahi okwa basathu aba oyo wukalengekanaya wuthi mwakolha ng’omuliranwa ow’omulhume oyuswiribwe? Abya iy’Omuhereri, Omulawi kutse Omusamaria?’

Omulhume akasubiraya athi: ‘Omusamaria. Mwakwira oyuswiribwe y’olhukeri.’

Yesu akabugha athi: ‘Wuhikire. Neryo wughende wukole abandi bawuthya ngokw’akolha.’

Siwuthanza ngoku Yesu akakangiriraya? Thwangan’igha bindu bingi kutsibu eby’omubongo thwamahulikirira ebya Yesu akabugha omwa Biblia, kwabithe?

Luka 10:25-37.



Ebibulyo

  • Omulhume akabulhaya Yesu ya kibulyo ki, kandi busana naki?
  • Obundi buthuku Yesu akakolesaya ki akakangirirya, kandi thwabiri igha ki okw’Abayuda n’Abasamaria?
  • Omwa lhughano olhwa Yesu akathulha, ekikahika okwa Muyuda oyukaghenda e Yeriko niki?
  • Omuhereri Omuyuda n’Omulawi bakabya basira omwanzira, ekikabya niki?
  • Omwa kisasani, oyukawathikaya Omuyuda oyuhuthere nindi?
  • Yesu akabya abirighunza olhughano, akabulhaya kibulyo ki, kandi omulhume akasubiraya athi?

Ebibulyo eby’eryongerako

  • Soma Luka 10:25

    Omumwanya w’eriha erisubirya erilhangirikire, Yesu mwawathikya athi omulhume oyuwasi ndeke Ebihano aghaniraye okwa mwatsi oyu? (Luka 10:26; Mt. 16:13)

    Yesu mwakolesya athi eby’erireberyako erikinda akasolholho ak’ababya bamuhulikirire? (Luka 10:36, 37; 18:9)