Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 92: Yesu Akalhubukaya Abaholire

Olhughano 92: Yesu Akalhubukaya Abaholire

OMUMBESA oyuwamalhangira hano awithe ebirimo 12 eby’obukulhu. Yesu anahambire ebyalha biwe, kandi mama wiwe na thatha wiwe banimene hakuhi. Wunasi busana naki bali n’etseme? Thuthalebya.

Yesu akalhubukaya mwali wa Yairo

Thatha w’omumbesa ni mulhume w’ekitsumbi oyukahulhawa mwa Yairo. Kiro kighuma mwali wiwe akalhwalha, neryo akaya omwa ngyingo. Aliriryo sihathabya embinduka yosi-yosi. Akakwama kya thoha. Yairo na mukali wiwe bayilhalikirire, kusangwa kikabya ng’omumbesa wabu ono akendi holha. Yana mwana bawithe. Neryo Yairo akayarondaya Yesu. Abiriowa okwa bithiko-thiko Yesu akakolha.

Yairo akabya abana Yesu, ihali endeko nene y’abandu abamuthimbireko. Aliriryo Yairo akayihathathanaya omwa ndeko y’abandu n’eriwa okwa bisandu bya Yesu. Akabugha athi: ‘Mwali waghe alhwere kutsibu.’ Akayisengerezaya athi: ‘Kisi, asa wumulhamaye.’ Yesu akabugha athi akendiasa.

Bane mughenda, abandu bakabera erisukumana bathoke eriseghera hakuhi. Neryo Yesu akimana. Akabulhaya athi: ‘Nindi oyuwanyithulireko?’ Yesu mwowa akaghalha kakamulhuako, neryo amaminya athi omundu mwakamuthulhako. Ibbwa nindi? Ni mukali oyulhwe mulhwere kutsibu ahabw’ebirimo 12. Mwasa n’erisyahamba okwa syangimba sya Yesu, neryo alhamibwa!

Eki kikaleka Yairo inyayowa ndeke, kusangwa akalhangira ngokwa kilhobire Yesu erilhamya omundu. Aliriryo omuthumwa akasa. Akabwira Yairo athi: ‘Leka erithasya lyambya Yesu. Mwali wawu abiriholha.’ Yesu akowa eki n’eribugha na Yairo athi: ‘Siwutsomane, akendi lhama.’

Bakabya bahika omwa nyumba ya Yairo, abandu bane mulira n’obulighe bunene. Aliriryo Yesu akabugha athi: ‘Si mulire. Omwana syaholire. Aghotsere.’ Aliriryo bamutha obwogho n’erisekerera Yesu, kusangwa banakyasi ngokwa abiriholha.

Neryo Yesu akathwalha thatha w’omumbesa na mama wiwe n’abakwenda biwe basathu omwa kisenge ey’omwana akesirye. Akamuhamba okwa byalha n’eribugha athi: ‘Hangana!’ Neryo akasuba, ngokwa wanamalhangira hano. Neryo akahangana n’erighenda-ghenda! Eyi y’enzumwa eyirekire mama wiwe na thatha wiwe ibabya n’etseme nene.

Oyu si y’omundu w’erimbere Yesu erilhubukya. Ow’erimbere oyo e Biblia yikathubwirako ni mughalha w’omukwakali oyuwikere omwa muyi wa Naini. Enyuma waho, Yesu kandi akalhubukaya Lazaro mughalha wabu Maria na Marata, y’omwa baholi. Omughulhu Yesu asyathabalha ng’Omwami wa Nyamuhanga, asyasubya abandu bangi abaholire b’okwa ngebe. Sithwanga tsema busana n’ekyo?

Luka 8:40-56; 7:11-17; Yoane 11:17-44.



Ebibulyo

  • Thatha w’omumbesa oyuli omwa kisasani nindi, kandi ekikaleka iyo na mukali wiwe ibayilhalikirira niki?
  • Yairo akakolha ki akabana Yesu?
  • Yesu akabya akaghenda ewa Yairo niki ekikabya, kandi Yairo akabya ane omwanzira akabana mwatsi ki?
  • Ekikaleka abandu abali omwa nyumba ya Yairo ibasekererya Yesu niki?
  • Akabya abiri thwalha abakwenda basathu n’ababuthi ab’omumbesa omwa kisenge ky’omumbesa, Yesu akakolha ki?
  • Ni bandi bahi aba Yesu alhubukaya, kandi eki kikanganaya ki?

Ebibulyo eby’eryongerako

  • Soma Luka 8:40-56.

    Yesu mwakangania athi olhukeri n’obulengekania obuwene okwa mukali oyuka sununuka mw’omusasi, kandi abasyakulhu ab’ekithunga munabwire bang’igha mwaki? (Luka 8:43, 44, 47, 48; Law. 15:25-27; Mt. 9:12, 13; Kol. 3:12-14)

  • Soma Luka 7:11-17.

    Busana naki ababiri holerwa bangana bana erihumulikanibwa omwa mibere ya Yesu awathikirayamu omukwakali owe Naina? (Luka 7:13; 2 Kor. 1:3, 4; Ebr. 4:15)

  • Soma Yoane 11:17-44.

    Yesu mwakangania athi ngokwa ni kya buli kiro erisusumana busana n’olhuholho olhwa mwanze? (Yn. 11:33-36, 38; 2 Sam. 18:33; 19:1-4)