Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 90: Ali n’Omukali Okwa Kithehero

Olhughano 90: Ali n’Omukali Okwa Kithehero

YESU amahika okwa kithehero kwe Samaria n’erilhuhukiraho. Abigha biwe babirighenda omwa muyi bakaya ghulha ebyalya. Omukali oyo Yesu akakanaya nayo akasyatheha amaghetse. Yesu akabugha nayu athi: ‘Umba aw’erinywa.’

Yesu akakanaya n’omukali Omusamaria

Eki kikaswekaya omukali ya kutsibu. Wunasi nga ni busana naki? Ni busana Yesu ni Muyuda, kandi iyo ni Musamaria. Kandi Abayuda bangi sibalianza Abasamaria. Sibangakania nabu nibya! Aliriryo Yesu anzire abandu abosi. Neryo akabugha athi: ‘Wulhwe wasi oyukakusaba amaghetse w’erinywa, wangamusabire kandi angakuhere amaghetse aw’akaha engebe.’

N’omukali athi: ‘Mwami, ekithehero ni kiri, kandi si wuwithe eky’erithehamu. Ni hayi aha wangabana amaghetse w’engebe aya?’

Yesu amasoborera athi: ‘Wamanywa amaghetse w’omwa kithehero eki iwukendikwa enyotha kandi. Aliriryo amaghetse awa nangaha anganaleka omundu inyabyaho kera na kera.’

Omukali athi: ‘Mwami, umba amaghetse ayo! Neryo singendi syaswakwa enyotha kandi. Kandi nibya isingendi syaswasa hano erisyatheha amaghetse.’

Omukali akalengekanaya athi Yesu akakanaya okw’amaghetse hene-hene. Aliriryo akakanaya okwa kwenene eyihambire oku Nyamuhanga n’obwami bwiwe. Ekwenene eyi yiri ng’amaghetse ow’akaha engebe. Yanganaha omundu y’engebe y’erikotha.

Neryo Yesu akabwira omukali athi: ‘Ghenda wubirikire mwira wawu wanyasubulha.’

Akasubiraya athi: ‘Singwithe mulhume.’

Yesu athi: ‘Wamasubirya ndeke. Aliriryo wuwithe abalhume bathano, kandi omulhume oyu wuli nayo lino si mwira wawu.’

Omukali amasweka, kusangwa ebyosi ebi nibya kwenene. Yesu mwaminya ebindu ebi by’athi? Ni kusangwa Yesu Yuwalhaghanisibawa na Nyamuhanga, neryo Nyamuhanga akamuha omwatsi oyu. Okwa ndambi eno abigha ba Yesu bakasubulha, neryo bakasweka bakalhangira Yesu akakania n’omukali Omusamaria.

Thukigha ki omwa byosi ebi? Kikakanganaya kithi Yesu ni w’olhukeri okw’abandu abosi. Nethu thutholere ithwabya thuthya. Sithutholere thuka lengekania thuthi abandi bandu ni babi kusangwa sithuli b’ekihanda ekyo kutse ab’erangi eyo. Yesu anzire abandu abosi ibaminya ekwenene eyikakolhaya okwa ngebe y’erikotha. Nethu kuthya thutholere ithwanza eriwathikya abandu baminye ekwenene.

Yoane 4:5-43; 17:3.



Ebibulyo

  • Ekyamaleka Yesu inyalhuhukira okwa kithehero kye Samaria niki, kandi akabwira omukali yaki?
  • Ekyamaleka omukali inya sweka niki, kandi Yesu akamubwira ki, kandi busana naki?
  • Omukali akalengekanaya athi Yesu akakanaya okw’amaghetse asosire athi, aliriryo Yesu akamanyisaya maghetse muhanda ki?
  • Ekikaleka omukali inya sweka busana n’ebya Yesu amwasiko niki, kandi aminya omwatsi oyu w’athi?
  • Ni somo ki erya thwang’igha omwa mwatsi w’omukali oyuwabya okwa kithehero?

Ebibulyo eby’eryongerako

  • Soma Yoane 4:5-43.

    Thukakwama eky’erireberyako kya Yesu, ni mibere ki eya thutholere ithwakangania abandu abosi? (Yn. 4:9; 1 Kor. 9:22; 1 Tim. 2:3, 4; Tito 2:11)

    Omundu oyukabya mw’igha wa Yesu akabana mubongo ki ow’obunyakirimu? (Yn. 4:14; Isa. 58:11; 2 Kor. 4:16)

    Thwanga kangania thuthi erisima ng’ery’omukali Omusamaria, oyuwanza erighabana eby’abir’igha n’abandi? (Yn. 4:7, 28; Mt. 6:33; Luka 10:40-42)