Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 88: Yoane Akabatizaya Yesu

Olhughano 88: Yoane Akabatizaya Yesu

THATHUNGERERA akalikuku akakakimira okwa muthwe w’omulhume. Omulhume ni Yesu. Hathya awithe ebirimo nga 30 eby’obukulhu. N’omulhume oyuli nayu ni Yoane. Thwabiri igha bike okw’iyo. Wanamibuka omughulhu Maria abungira omuhughu wiwe Elizabeti, n’omwana oyuli omwanda sya Elizabeti akayisumba n’ebitsange? Olhumekeke olhwabya omwanda olhwo abya ini Yoane. Aliriryo ni byahi ebya Yoane na Yesu bakakolha hathya?

Yesu akabatizibwa

Yoane mwanamabiri lhubba Yesu y’omw’amaghetse w’Olhusi Yorodani. Omundu kw’akabatizibawa athya. Erimbere, akalhubbawa omwa maghetse, neryo inyalhusibwamu kandi. Kusangwa eki kya Yoane akakolha okw’abandu, akahulhawa mwa Yoane Mubatizya. Aliriryo busana naki Yoane amabatizya Yesu?

Yoane mwakikolha kusangwa Yesu mwasa n’erisya saba Yoane athi amubatizaye. Yoane akabatizaya abandu abakanza erikangania bathi baghanyirawe ahabw’ebindu bibi ebya babirikolha. Aliriryo ibbwa Yesu mwanakolha kindu kyosi-kyosi ekibi eky’erighanyirwa? Eyihi, Yesu mwatha kikolha, kusangwa ni Mughalha ekyusa kya Nyamuhanga erilhua elhubulha. Neryo mwasaba Yoane erimubatizya ahabw’enzumwa eyindi. Thulebaye enzumwa eyo nga ni yahi.

Yesu athali ahika oku Yoane, abya mubatsi w’esyambaho. Omubatsi w’esyambaho y’oyukakolha ebindu erilhua omwa mithi, ng’esyameza, ebithumbi n’esyafomu. Mwira wa Maria ya Yozefu abya mubatsi w’esyambaho, neryo mwakangirirya Yesu nayu abye athya. Aliriryo Yehova mwatha thuma Mughalha wiwe okwa kihugho eribya mubatsi w’esyambaho. Amuwithire omubiiri owali mbaghane ow’atholere erikolera Nyamuhanga, n‘obuthuku bwamabiri hika Yesu eritsuka erikolhagho. Neryo erikangania athi alyasa erisya kolha erisonda lya Thatha wiwe, Yesu akasaba Yoane amubatizaye. Eki kyanamatsemesya Nyamuhanga?

Inga, amatsemesibwa, kusangwa, Yesu akabya alhua omw’amaghetse, omulenge erilhua elhubulha akabugha athi: ‘Oyu ni Mughalha waghe, namamutsemera ndeke.’ Nibya, kikalhangirika indi olhubulha lhwama kyungukalha neryo akalikuku kamakimira oku Yesu. Aliriryo si kalikuku hene-hene. Kakalhangirika eribya ng’iko. Ni mulimu wa Nyamuhanga owa buyirire.

Hathya Yesu awithe bingi eby’erilengekaniako, neryo akaghenda omwa kitsweka ekithe mw’abandu ahabw’ebiro 40. Aneyo Sitani yikasa eyali. Mirundi isathu Sitani akalengesaya Yesu akole ekindu ekikathwa ebiraghiro bya Nyamuhanga. Aliriryo Yesu syendi kikolha.

Enyuma waho, Yesu akasubayo n’erisangana abalhume balebe ababya bigha biwe ab’erimbere. Amaghuma w’okw’amena wabu ni, Anderea, Petero (oyukahulhawa mwa Simoni), Filipo na Natanaeli (kandi akahulhawa mwa Bartolomayo). Yesu n’abigha abahya-bahya aba bakaghenda e Galilaya. Bane e Galilaya bamimana e Kana, omwa muyi owa Natanaeli alhwiremu. Eyo, Yesu akaghenda okw’obugheni bunene obw’obuheruki, n’erikolha ekithiko-thiko kiwe eky’erimbere. Wunasi nga ni kyahi? Akahindulha amaghetse mw’obwabu.

Matayo 3:13-17; 4:1-11; 13:55; Mariko 6:3; Yoane 1:29-51; 2:1-12.



Ebibulyo

  • Abalhume babiri abali omwa kisasani ni bahi?
  • Omundu akabatizibawa athi?
  • Yoane akabatizaya abandu abali bathi?
  • Ni nzumwa ki ngulhu eyikaleka Yesu inyasaba Yoane athi amubatizaye?
  • Nyamuhanga akakanganaya athi ngokw’amatsemesibwa kundi Yesu abiri batizibwa?
  • Yesu akabya ghenda omwa kitsweka ekithe omw’abandu ahabw’ebiro 40, niki ekikabya?
  • Abaghuma b’okw’abigha kutse abakwenda ba Yesu ab’erimbere ni bahi, n’ekithiko-thiko kiwe eky’erimbere ni kyahi?

Ebibulyo eby’eryongerako

  • Soma Matayo 3:13-17.

    Ni lhughobe ki olhw’eribatizibwa olhwa Yesu asighira abigha biwe? (Esy. 40:7, 8; Mt. 28:19, 20; Luka 3:21, 22)

  • Soma Matayo 4:1-11.

    Yesu erikolesya ndeke Amasako kika thusukuma kithi eribya abak’igha e Biblia mughulhu wosi? (Mt. 4:5-7; 2 Pet. 3:17, 18; 1 Yn. 4:1)

  • Soma Yoane 1:29-51.

    Yoane omubatizya mwakangirira abigha biwe erikwama ndi, kandi thwanga mugherererya thuthi munabwire? (Yoane 1:29, 35, 36; 3:30; Mt. 23:10)

  • Soma Yoane 2:1-12.

    Ekithiko-thiko kya Yesu eky’erimbere mukyakangania kithi ngoku Yehova syalikakiraya abaghombe biwe b’ebibuya? (Yn. 2:9, 10; Esy. 84:11; Yak. 1:17)