Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 87: Yesu Omwa Hekalu Inyakine Mulere

Olhughano 87: Yesu Omwa Hekalu Inyakine Mulere

SAMALIRA omulhwana mulere oyukakanaya n’abalhume bakulhu. Ni bakangirirya omwa hekalu ya Nyamuhanga e Yerusalemu. N’omulhwana ni Yesu. Abirikulhaho kake. Hathya awithe ebirimo 12 eby’obukulhu.

Abakangirirya babiri sweka kutsibu bathi Yesu asi binene oku Nyamuhanga n’ebindu ebisakangire omwa Biblia. Aliriryo busana naki ya Yozefu na Maria nabu sibali hano? Bali hayi? Leka thulebaye.

Yesu iniakine mulere akanaya n’abakangirirya

Obuli kirimo Yozefu akaletha erihiika liwe lye Yerusalemu ahabw’obugheni obw’embaghane obukahulhawa mw’Erikyuruka. Ni lhughendo lhuli erilhua e Nazareti erihika e Yerusalemu. Sihali oyuwithe ematoka, kandi siyiri n’esyagali sy’omuki. Sibabya babiwithe omwa biro ebyo. Abandu bangi bakalyatha ebisandu, neryo kikabathwalira biro bisathu erihika e Yerusalemu.

Hathya Yozefu awithe erihiika linene. Neryo Yesu awithe baghalha babu n’abali babu balere abatholere erilemberwa. Aliriryo, ekirimo kino Yozefu na Maria babiri ghenda n’abana babu okwa lhughendo lhuli olhw’erisuba ewabu e Nazareti. Bakalengekanaya bathi Yesu ane n’abandi omwa lhughendo. Aliriryo bakabya bakalhuhuka omw’igholho-gholho, sibatha lhangira Yesu. Bakamurondaya omwa bahughu n’abanywani babu, aliriryo isyali nabu! Neryo bakasuba e Yerusalemu eriyamurondya yo.

Okw’ighunzerera bakabana Yesu ya hano inyane n’abakangirirya. Anabahulikirire n’eribulya ebibulyo. Kandi abandu abosi babirisweka busana n’obwenge bwa Yesu awithe. Aliriryo Maria akabugha athi: ‘Mwana waghe, busana naki iwathu kolha kw’eki? Ingye na thatha wawu thulhwe ithwabiri yilhalikirira kutsibu thukalengesya erikurondya.’

Yesu akasubiraya athi: ‘Busana naki imwa nyirondya? Simukyasi muthi ngalhwe w’eribya omwa nyumba ya Thatha waghe?’

Inga, Yesu anzire inyabya aho ang’ighira oku Nyamuhanga. Nethu sithutholere thuka y’owa thuthya? Ewabu e Nazareti, Yesu inyakaghenda okwa mihindano obuli yenga akayaramya. Kusangwa inyakahulikirira ndeke, mw’igha ebindu bingi omwa Biblia. Thubye nga Yesu n’erikwama eky’erireberyako kiwe.

Luka 2:41-52; Matayo 13:53-56.



Ebibulyo

  • Omwa kisasani, Yesu awithe birimo bingahi eby’obukulhu, kandi ali hayi?
  • Obuli kirimo Yozefu n’erihiika liwe akakolha ki?
  • Enyuma w’ekiro kighuma bane okwa lhughendu bakasuba eka, ekikaleka Yozefu na Maria ibasuba e Yerusalemu niki?
  • Yozefu na Maria bakabana Yesu ya hayi, n’ekikaleka abandu ibasweka niki?
  • Yesu akasubiraya mama wiwe ya Maria athiki?
  • Thwangabya thuthi nga Yesu thuk’igha oku Nyamuhanga?

Ebibulyo eby’eryongerako

  • Soma Luka 2:41-52.

    Nomwakine indi Endaghano ya Musa iyikanza yithi abalhume basa babatholere erighenda okw’amagheni awabuli kirimo, Yozefu na Maria mubakangania eky’erireberyako ki ekyuwene okwa babuthi munabwire? (Luka 2:41; Ebi. 16:16; 31:12; Emi. 22:6)

    Yesu mwabya athi ky’erireberyako kibuya okw’abakiri balere munabwire erisikya ababuthi babu? (Luka 2:51; Ebi. 5:16; Emi. 23:22; Kol. 3:20)

  • Soma Matayo 13:53-56.

    Baghalha babu Yesu abbani ababuthawa nayu omwanda nguma abakahulhawa omwa Biblia ni bahi, kandi enyuma waho ababiri okw’ibo muba kolesibwa bathi omwa kithunga ky’Ekikrisitayo? (Mt. 13:55; Emib. 12:17; 15:6, 13; 21:18; Gal. 1:19; Yak. 1:1; Yuda 1:1)