Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 86: Abalhume Bakasondolhawa n’Engununu

Olhughano 86: Abalhume Bakasondolhawa n’Engununu
Bakasoma esyongununu

WANAMALHANGIRA engununu erya eyika kangabasanaya ey’omughuma w’okw’abalhume akanganaya omunwe? Babere balhua e Yerusalemu, engununu muyalhangirika. Abalhume aba bakalhua Ebulhua lyuba, kandi bakasoma eby’esyangununu. Bak’ikiriraya bathi engununu embyaka eyi yikabasondolha okwa mundu ow’ekitsumbi.

Babere bahika e Yerusalemu, mubabulya bathi: ‘Omwana ali hayi oyukendibya mwami ow’Abayuda?’ “Abayuda” ni rindi lina ery’Abaisraeli. Abalhume mubabugha bathi: ‘Mwathukatsuka erilhangira engununu ey’omwana ithukine Ebulhua lyuba, neryo thuliasya muramya.’

Neryo Herode, omwami we Yerusalemu, abere owa eki mwathatsema. Mwathanza owundi mwami akathwalha ekitsumbi kiwe. Neryo Herode mwabirikira abahereri bakulhu n’eribabulya athi: ‘Omwami oyuwalhaghanisibawa akendisya buthirwa hayi?’ Mubasubirya bathi: ‘E Biblia yikabugha yithi e Betelehemu.’

Neryo Herode mwabirikira abalhume abakalhua Ebulhua lyuba, n’eribugha athi: ‘Mughende murondekanaye omwana. Mukendibya mwamubana, mwase mumbwire. Naghe nganzire eriya muramya.’ Aliriryo, omwa kwenene, Herode anza eribana omwana anga mw’itha!

Neryo engununu yikabya embere sy’abalhume eriya e Betelehemu, n’erimana ah’omwana ali. Abalhume bakabya bingira omwa nyumba, bakasangana Maria n’olhumekeke Yesu. Bakahulhukaya ebihembo n’eribihererya Yesu. Aliriryo ahanyuma Yehova akakunga abalhume omwa kilhotho athi si basube eyiri Herode. Neryo bakalhaba omwa yindi nzira bakasuba omwa kihugho kyabu.

Herode akabya abiriminya athi abalhume erilhua Ebulhua lyuba babiri suba ewabu, akahithana kutsibu. Neryo akahira h’ekiraghiro athi abana abosi ab’obulhume abawithe ebirimo bibiri n’erisubya ahisi e Betelehemu bakwe. Aliriryo Yehova akabwira Yozefu ya lhuba omwa kilhotho, neryo Yozefu akathibitha e Misiri n’erihiika liwe. Enyuma waho, Yozefu akabya abiriminya ngokwa Herode abiriholha, akathwalha Maria na Yesu b’eka e Nazareti. E Nazareti ya Yesu akakulira.

Wukalengekanaya wuthi nindi oyuwaleka engununu iya kangabasania? Wibuke, abalhume babere babirilhangira engununu mubatsuka erighenda e Yerusalemu. Sitani Diabolo anza eritha Mughalha wa Nyamuhanga, neryo mwaminya athi Omwami Herode owe Yerusalemu angalengesirye erimwitha. Busana n’ekyo, Sitani yuwaleka engununu iya kangabasania.

Matayo 2:1-23; Mika 5:2.



Ebibulyo

  • Abalhume abali omwa kisasani ni bahi, kandi ekikaleka omughuma w’okw’ibo inyakangania engununu eyika kangabasanaya niki?
  • Ekikaleka Omwami Herode inyahithana niki, kandi akakolha ki?
  • Engununu eyika kangabasanaya yika sondolha abalhume erihika hayi, aliriryo ekikaleka abalhume ibalhaba omwa yindi nzira bakasuba omw’ihanga ly’ewabu niki?
  • Herode akaha kiraghiro ki, kandi busana naki?
  • Yehova akabwira Yozefu athi akole ki?
  • Oyuwaleka engununu iyakangabasania nindi, kandi busana naki?

Ekibulyo eky’eryongerako

  • Soma Matayo 2:1-23.

    Yesu abya w’ebirimo bingahi kandi abya ikere hayi abakasoma eby’esyangununu bakamubalhamira? (Mt. 2:1, 11, 16)