Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 85: Yesu Akabuthirawa Omwa Butara

Olhughano 85: Yesu Akabuthirawa Omwa Butara

WUNASI olhumekeke olhu nga nindi? Inga, ni Yesu. Mwanamabiri buthirwa omwa butara. Obutara y’enyumba y’ebisoro. Maria abiri lhalya Yesu y’omw’ithuba, ekindu ekikabya mw’ebyalya by’esyapunda n’ebindi bisoro. Aliriryo busana naki Maria na Yozefu bali hano n’ebisoro? Oyu si mwanya w’omwana eributhirwamu, kwa kithe?

Eyihi, kwa bithe. Aliriryo eki kyakireka ibabya hano: Omuthabali we Roma, Kaisari Augusto, mwahira h’ekiraghiro athi obuli mundu atholere inyasuba omwa muyi ow’abuthirawamu anga sakangisya erina liwe ly’omwa kitabu. Inga, Yozefu abuthirawa hano e Betelehemu. Aliriryo omughulhu iyo na Maria bahikayo, sihabya ekisenge kyosi-kyosi ekya banga kolesya. Neryo mubakwama ky’eriasa ahali ebisoro. Neryo okwa kiro ikya n’ekyo Maria mwabutha Yesu! Aliriryo, ngokwa wanamalhangira, ane ndeke.

Yozefu, Maria, na Yesu olhumekeke

Wanamalhangira abalisya abakasa erisyalebya Yesu? Babya ibane omwali omw’ithumbi bakalisya esyambuli syabu, neryo ekyakakalha ekikangabasenie mukya bakolerya ahosi ahabali. Abya ini malaika! Abalisya mububaha kutsibu. Aliriryo malaika mwabugha athi: ‘Simubahe! Ngali n’engulhu mbuya busana nenyu. Munabwire e Betelehemu, Kristo Omukama abiributhwa. Akendi lhamya abandu! Mukendi mubana inyana swikirwe kw’olhukimba kandi inyana kesirye omw’ithuba.’ Aho n’aho abamalaika bangi mubasa n’eritsuka eripipa Nyamuhanga. Neryo abalisya mubalhuaho ibanguha eriyarondya Yesu, hathya ibbwa babiri mubana.

Wunasi ekikaleka Yesu inyabya wambaghane kutsibu? Wunasi kwenene iyo nga nindi? Wibuke, omwa lhughano olhw’erimbere omwa kitabu kino muthwakania okw’Akambere ka Nyamuhanga. Omwana ono mwakolha na Yehova omw’ihangika olhubulha n’ekihugho n’ebindu ebyosi. Kwenene, Yesu kwali athya!

Inga, Yehova mwimya engebe y’omwana wiwe erilhua elhubulha n’erihirayo omu Maria. Neryo-neryo omwana mwatsuka erikulira omwanda yiwe ng’abandi bana kwa bakana kulira omwanda sy’abamama wabu. Aliriryo omwana ono abya Mughalha wa Nyamuhanga. Erighunzerera Yesu mwabuthirwa hano e Betelehemu omwa butara. Wanamalhangira hathya ekyaleka abamalaika ibatsema n’erithoka eribwira abandi bathi Yesu abiri buthwa?

Luka 2:1-20.



Ebibulyo

  • Olhumekeke olhuli omwa kisasani nindi, kandi Maria alhulhalirye hayi?
  • Ekyaleka Yesu inya buthirwa omwa butara obuli mw’ebisoro niki?
  • Omwa kisasani, abalhume abak’ingira omwa butara ni bahi, kandi malaika alhwe inyabiri babwira athiki?
  • Busana naki Yesu ni wambaghane?
  • Busana naki Yesu angana hulhwa mwa Mughalha wa Nyamuhanga?

Ebibulyo eby’eryongerako

  • Soma Luka 2:1-20.

    Kaisari Augusto mwakolha ki eriberererya obuminyereri obuhambire okw’ibuthwa lya Yesu? (Luka 2:1-4; Mika 5:2)

    Omundu angabya athi mughuma w’okw’abakahulhawa ‘mw’abandu abaka mutsemesaya’? (Luka 2:14; Mt. 16:24; Yn. 17:3; Emib. 3:19; Ebr. 11:6)

    Abalisya bamabya ibabya bawithe enzumwa ey’eritsemera eributhwa ly’Omulhamya, ibbwa abaghombe ba Nyamuhanga munabwire bawithe nzumwa ki ngulhu ey’eribatsemesya? (Luka 2:10, 11; Efe. 3:8, 9; Erib. 11:15; 14:6)