Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 101: Yesu ak’Ithawa

Olhughano 101: Yesu ak’Ithawa

THALEBYA ekindu kibi ekikabya! Yesu ak’ithawa. Babiri muhira okwa muthi. Babiri kongomerera emisumali y’omwa byalha biwe n’ebisandu. Ekyangalekire omundu inyanza erikolha Yesu y’ekindu eki niki?

Yesu akaholha

Ni kusangwa abandi bandu baponire Yesu. Wunasi nga ni bahi? Omughuma okw’ibo ni Sitani Diabolo omumalaika mubi. Yuwathoka erilethera Adamu na Eva y’erithendi owa Yehova. Kandi Sitani yuwalethera Yesu y’esyanzighu siwe erimukolha kw’ekindu kibi eki.

Nibya Yesu athali ahanikwa hanu okwa muthi, esyanzighu siwe sikamukolhako ebindu bibi. Wibuke ngokwa basa omw’irima lye Getesemane n’erimuthwalha? Esyanzighu esyo babya ini bahi? Inga, babya ib’abakulhu b’edini. Thulebaye ekikakwamako.

Yesu akabya athwalhwa n’abakulhu b’edini, abakwenda biwe bakathibitha. Bakasigha Yesu n’esyanzighu siwe, kusangwa bakubaha. Aliriryo omukwenda Petero na Yoane sibatha ghenda hali kutsibu. Bakabakwama bakalebya ekikabya oku Yesu.

Abahereri bakathwalha Yesu eyiri omulhume mukulhu Ana, oyuwabya muhereri mukulhu emighulhu eyihwere. Endeko y’abandu siyithaghunza hano ha ndambi nyiri. Neryo bakathasya thwalha Yesu y’okwa nyumba ya Kayafa, oyuli hathya muhereri mukulhu. Abakulhu b’edini bangi babiriyisorokerya haghuma okwa nyumba yiwe.

Hano okwa nyumba ya Kayafa bakamuthonganisaya. Abandu bakalethawa n’erikania amabehi oku Yesu. Abakulhu b’edini abosi bakabugha bathi: ‘Yesu atholere erikwa.’ Neryo bakathwira omwa busu bwiwe mw’amathande, n’erimuswirya esyangume.

Ebi byosi binamulholya embere, Petero an’eyihya omwa buthalha. Ni buthuku bw’ekiro obw’embeho, neryo abandu bakathwana omuliro. Bakabya banemwotha okwa muliro, omughombe w’obukali akasamalira Petero, n’eribugha athi: ‘Omulhume oyu nayu alhwe na Yesu.’

Petero akasubiraya athi: ‘Eyihi, singalhwe nayu!

Mirundi isathu abandu bakabwira Petero bathi alhwe na Yesu. Aliriryo obuli murundi Petero akabugha athi ni mabehi. Omurundi owa kasathu Petero akabugha eki, Yesu akabinduka n’erimusamalira. Petero akakwa esisoni ahabw’erithulha amabehi, neryo akalhuaho n’eriyalira.

Eryuba likabya lika hulhuka engyakya y’Ekyakathano, abahereri bakathwalha Yesu aha bakahindana, omwa nyumba y’Eribuyiro. Hano bakakanaya okwa ekya bakendi mukolera. Bakamuthwalha eyiri Pontio Pilato, omuthabali we Yudea.

Abahereri bakabwira Pilato bathi: ‘Oyu ni mulhume mubi, atholere inyakwa.’ Bakabya babiri bulya Yesu y’ebibulyo, Pilato akabugha athi: ‘Singathalhangira ekindu kyosi-kyosi ekibi ekya kolire.’ Neryo Pilato akathuma Yesu eyiri Herode Antipa. Herode ni muthabali we Galilaya, aliriryo ikere e Yerusalemu. Herode nayu syatha lhangira indi Yesu akolire ekindu kyosi-kyosi ekibi, neryo akamusubaya kandi eyiri Pilato.

Pilato anzire erilhwika Yesu. Aliriryo esyanzighu sya Yesu syanzire hakiri owundi munya muliki yulhwikawe. Omulhume oyu y’omwibi Baraba. Esya ndambi hathya siri nga mukagha Pilato akaletha Yesu y’eyihya. Akabwira abandu: ‘Mulebaye! Omwami wenyu!’ Aliriryo abahereri bakulhu bakabirikira kutsibu: ‘Mumuthwale! Mumwithe! Mumwithe!’ Neryo Pilato akalhwika Baraba, n’erithwalha Yesu eriya mwitha.

Erithungi erya Kyakathano, Yesu akakongomererawa okwa muthi. Siwanga balhangira okwa kisasani, aliriryo okwa buli lhuhandi lhwa Yesu kuli omuthwi w’ebiraghiro, nabu bak’ithirawa okwa muthi. Yesu athali aholha, omughuma w’okw’abathwi b’ebiraghiro akabugha athi: ‘Wunyibuke omughulhu wukasa omw’obwami bwawu.’ Na Yesu akasubirya athi: ‘Nga kulhaghanisaya indi wasyabya naghe omwa Paradiso.’

Eri silhaghanisya eryuwene? Wunasi e Paradiso eya Yesu akakanaya ko? E Paradiso yabya hayi eya Nyamuhanga ahanga okw’itsuka? Inga, okwa kihugho. Neryo omughulhu Yesu akendi thabalha ng’omwami e lhubulha, akendi syasubya omulhume oyu y’okwa ngebe eritsemera e Paradiso enyihya-nyihya okwa kihugho. Sithwangatsema busana n’eki?

Matayo 26:57-75; 27:1-50; Luka 22:54-71; 23:1-49; Yoane 18:12-40; 19:1-30.



Ebibulyo

  • Oyuli kw’olhubanza olhw’olhuholho lhwa Yesu nindi?
  • Abakwenda bakakolha ki Yesu akathwalhwa n’abakulhu b’amadini?
  • Ekikabya ewa Kayafa omuhereri mukulhu niki?
  • Ekikaleka Petero inyaghenda n’eriyalira niki?
  • Yesu bakabya babiri musubya eyiri Pilato, abahereri bakulhu-bakulhu bakabugha n’omulenge munene bathiki?
  • Niki ekikahika oku Yesu omw’ithungi erya Kyakathano, kandi akalhaghanisaya ki omukolha nabi oyuhanikirwe hakuhi nayu?
  • E Paradiso eya Yesu akanayako yikendi syabya hayi?

Ebibulyo eby’eryongerako

  • Soma Matayo 26:57-75.

    Abandu ab’omw’ibughiro likulhu erye Kiyuda mubakangania bathi emithima yabu kwa ni mibi? (Mt. 26:59, 67, 68)

  • Soma Matayo 27:1-50.

    Ekyangaleka ithwabugha thuthi eriyikubya bwomo lya Yuda siryabya lya kwenene niki? (Mt. 27:3, 4; Mk. 3:29; 14:21; 2 Kor. 7:10, 11)

  • Soma Luka 22:54-71.

    Thuk’igha ki oku Petero akayighana Yesu omw’ithumbi ery’aghoberibawamu n’erihambwa? (Luka 22:60-62; Mt. 26:31-35; 1 Kor. 10:12)

  • Soma Luka 23:1-49.

    Yesu mwasubirya athi okwa buthe bulingirirania obwa bamukolhako, kandi thwang’igha mwaki? (Luka 23:33, 34; Abar. 12:17-19; 1 Pet. 2:23)

  • Soma Yoane 18:12-40.

    Nomwakine indi Petero mwabya n’eryubaha abandu ahabwa kathambi kake, niki ekikakanganaya indi mwabya mukwenda mubuya? (Yn. 18:25-27; 1 Kor. 4:2; 1 Pet. 3:14, 15; 5:8, 9)

  • Soma Yoane 19:1-30.

    Yesu aby’awithe ebirengekanio ki okwa bindu by’omubiri? (Yn. 2:1, 2, 9, 10; 19:23, 24; Mt. 6:31, 32; 8:20)

    Ebinywe bya Yesu eby’erighunzerera akaholha mubya kanganaya bithi kwa singura eribya inyana hambirire obuthabali bwa Yehova? (Yn. 16:33; 19:30; 2 Pet. 3:14; 1 Yn. 5:4)