Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 100: Yesu omw’Irima

Olhughano 100: Yesu omw’Irima

BAKABYA babirilhua omwa kisenge eky’endatha, Yesu n’abakwenda biwe bakaghenda omw’irima erye Getesemane. Bamabiriasa hano ha mirundi mingi. Hathya Yesu akababwira athi basighale ibanalholire n’erisaba. Neryo akaghenda kaghendo kake erilhua ahabali, neryo akunama n’erisaba.

Enyuma waho, Yesu akasuba ahali abakwenda biwe. Wukalengekanaya bakakolha ki? Baghotsere! Mirundi isathu Yesu akababwira athi babye ibanalholire, aliriryo obuli subulha akasanga ibana ghotsere. Yesu akabugha okw’asa liwe ly’erighunzerera athi: ‘Busana naki imwaghotsera okwa ndambi eyiri ng’eno? Endambi yamabirihika ingye erihirwa omwa byalha by’esyanzighu syaghe.’

Okwa ndambi eyo etoko ey’abandu bangi yamwowibwa. Lebaya! Abalhume banemwasa n’emiyali n’emigho! Kandi banahekire ebisosomole eby’omuliro eribaha ekyakakalha. Bakabya bakahika hakuhi, omundu mughuma akalhua omwa ndeko n’eriasa eyiri Yesu. Akamulyatsirira, ngokwa wanamalhangira hano. Omulhume oyu ni Yuda Iskariota! Busana naki inyalyatsirira Yesu?

Yuda akaghoberaya Yesu

Yesu akabulhaya: ‘Yuda, wuka nyighoberaya omw’ilyatsirira?’ Kwenene, erilyatsirira ni kaminyikalho. Kikaleka abalhume abali na Yuda ibaminya indi oyu ni Yesu, omulhume eya bakanza. Neryo esyanzighu sya Yesu sikasa erimuhamba. Aliriryo Petero syendi ikirirya bakathwalha Yesu athethalhwa. Akahulhukaya mw’omuyali wiwe owali asa nawu n’erithema omulhume oyuli hakuhi nayu. Omuyali akataruka okwa muthwe w’omulhume n’erithema okuthwe kwiwe okw’okulya. Aliriryo Yesu akathulha okwa kuthwe okw’omulhume n’erikulhamya.

Yesu akabwira Petero: ‘Subaya omuyali wawu w’omwa lhuba lhwawu. Wukaghaniraya wuthi sinanga lhakira Thatha waghe akamba esyankumi esy’abamalaika erinyilhamya?’ Inga, angana kolha athya! Aliriryo Yesu syatha saba Nyamuhanga erimuha n’omumalaika n’omughuma, kusangwa anasi ngokwa endambi yabirihika esyanzighu siwe erimuthwalha. Neryo ak’ikiriraya bamuthwale. Hathya thulebaye ekikahika oku Yesu.

Matayo 26:36-56; Luka 22:39-53; Yoane 18:1-12.



Ebibulyo

  • Yesu n’abakwenda biwe bakaghenda hayi bakalhua mwa kisenge ky’endatha, kandi akababwira athi bakole ki?
  • Yesu akabana ki akasuba eyiri abakwenda biwe, kandi eki kikabya mirundi mingahi?
  • Ngokwa kikanganibwe omwa kisasani, oyuk’ingira omw’irima nindi, kandi Yuda Iskariota akakolha ki?
  • Ekikaleka Yuda inyalyatsirira Yesu niki, kandi Petero akakolha ki?
  • Yesu akabwira Petero yaki, aliriryo ekikaleka Yesu inya thasaba Nyamuhanga erimuthumira abamalaika niki?

Ebibulyo eby’eryongerako

  • Soma Matayo 26:36-56.

    Enzira eya Yesu ahanira mw’abigha biwe yikabya yithi ky’erireberyako kibuya okw’abasyakulhu b’ekithunga ky’Ekikrisitayo munabwire? (Mt. 20:25-28; 26:40, 41; Gal. 5:17; Efe. 4:29, 31, 32)

    Erikolesya ebyuma erilhwa n’abandi, Yesu mwa kilhangira athi? (Mt. 26:52; Luka 6:27, 28; Yn. 18:36)

  • Soma Luka 22:39-53.

    Malaika abere abuthukira Yesu n’erimuhira mw’akaghalha omw’irima lye Getesemane, eki mukyanakangania indi erikirirya lya Yesu lyabiri holhoka? Soborera. (Luka 22:41-43; Isa. 49:8; Mt. 4:10, 11; Ebr. 5:7)

  • Soma Yoane 18:1-12.

    Yesu mwatheya athi abigha biwe okw’abahakani, kandi thwang’igha ki omwa ky’erireberyako eki? (Yn. 10:11, 12; 18:1, 6-9; Ebr. 13:6; Yak. 2:25)