Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 82: Mordekayi na Esiteri

Olhughano 82: Mordekayi na Esiteri

THUTHA syasuba enyuma ebirimo bike Ezira athali aghenda e Yerusalemu. Mordekayi na Esiteri ni Baisraeli b’ekitsumbi omw’obwami bwe Persia. Esiteri ni mukama-kali, n’omuhughu wiwe Mordekayi y’owakabiri okw’omwami omwa buthoki. Leka thulebaye eki nga mukyasa kithi.

Ababuthi ba Esiteri mubaholha inyakine mulere kutsibu, neryo Mordekayi abiri mukulya. Ahasuero, omwami we Persia, awithe ekikali omwa muyi we Susa, na Mordekayi ni mughuma w’okwa baghombe biwe. Neryo kiro kighuma omughole w’omwami Vasiti syatha musikya, neryo omwami amasombolha omukali muhya-muhya eribya mukama-kali wiwe. Wunasi omukali ey’amasombolha? Inga, omumbesa mubuyanga ya Esiteri.

Hamani abirihithana oku Mordekayi

Wanamalhangira omulhume ow’emiyiheko oyo abandu bakunamira? Ni Hamani. Ni mulhume w’ekitsumbi e Persia. Hamani anzire Mordekayi, oyuwulhangire inyan’ikere hano, nayu amunamire. Aliriryo Mordekayi syendi kikolha. Syali lengekanaya athi kihikire eryunamira omulhume mubi ng’oyu. Kino kikaleka Hamani inyahithana kutsibu. Neryo kino ky’akakolha.

Hamani akabwira omwami y’amabehi okw’Abaisraeli. Akabugha athi: ‘Ni bandu babi sibali sikaya ebiraghiro byawu. Batholere ib’ithibwa.’ Ahasuero syasi athi omughole wiwe Esiteri ni mu Israeli. Neryo akahulikirira Hamani, n’erihiraho ekiraghiro ekikabugha kithi okwa kiro kirebe Abaisraeli bosi bakendibya ab’erithibwa.

Mordekayi akabya owa ekiraghiro eki, akayibulha-bulha. Akathumira Esiteri y’omwatsi athi: ‘Wutholere iwabwira omwami, kandi wumusabe wuthi athulhamaye.’ Si kitholere omwa biraghiro bye Persia erighenda wukayalebya omwami wuthalya birikirawa. Aliriryo Esiteri akaghendayo isyathabirikirwa. Omwami akamusumbira omutso wiwe ow’esyamaghetse, ekikamanyisaya kithi syendi thibwa. Esiteri akabirikira omwami na Hamani okw’irya inene. Aho omwami akabulhaya Esiteri ekyanzire inyamuha. Esiteri akabugha athi akendisya mubwira iyo na Hamani bama syaswasa okw’irya ery’ekindi kiro.

Okw’irya eryo, Esiteri akabwira omwami athi: ‘Abandu baghe naghe thukendi ithibwa.’ Omwami akahithana. Akabulhaya athi: ‘Oyukanza erikolha ekindu ng’eki nindi?’

Esiteri akabugha athi: ‘Omulhume, enzighu, y’omubi oyu Hamani!’

Omwami-kali Esiteri akahababira Hamani

Neryo omwami amahithana kutsibu. Akalhaghira athi Hamani ithawe. Enyuma waho, omwami akakolha Mordekayi mw’owakabiri okw’iyo omwa buthoki. Mordekayi akalhangira athi ekiraghiro kihya-kihya kikakolhawa ekikalighira Abaisraeli erilhwira esyangebe syabo okwa kiro batholere erithibwa. Kusangwa Mordekayi lino ni mulhume w’ekitsumbi, abandu bangi bakawathikaya Abaisraeli, neryo bamalhamibwa okwa syanzighu syabu.

Ekitabu kye Esiteri omwa Biblia.



Ebibulyo

  • Mordekayi na Esiteri ni bahi?
  • Ekikaleka Omwami Ahasuero inyanza omukali muhya-muhya niki, kandi akasombolha ndi?
  • Hamani nindi, n’ekikaleka inyahithana kutsibu niki?
  • Ni kiraghiro ki ekikakolhawa, na Esiteri akakolha ki abiribana omwatsi erilhua eyiri Mordekayi?
  • Ekikahika oku Hamani niki, n’ekikahika oku Mordekayi niki?
  • Abaisraeli bakalhamibawa bathi erilhua okwa syanzighu syabu?

Ebibulyo eby’eryongerako

  • Soma Esiteri 2:12

    Esiteri mwakangania athi omubongo w’eribya ‘n’ekirimu eky’obukuthu kandi ekihehere’? (Esi. 2:15; 1 Pet. 3:1)

  • Soma Esiteri 4:1

    Nga Esiteri kwa hebawa omughisa ow’erikolera eriramya ery’ekwenene, ni mughisa ki owa thuhebwirwe munabwire erikangania eriyihayo lyethu n’obuthaleghulha oku Yehova? (Esi. 4:13, 14; Mt. 5:14)

  • Soma Esiteri 7:1

    Abangi b’okw’abandu ba Nyamuhanga munabwire babiri yitsama bathi omwi endereribwa, nga Esiteri kw’akolha? (Esi. 7:4; Mt. 10:16)