Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 81: Eriyikethera Obuwathikya bwa Nyamuhanga

Olhughano 81: Eriyikethera Obuwathikya bwa Nyamuhanga

HAKUHI abandu nga 50,000 b’abakaghenda olhughendo lhuli kutsibu erilhua e Babiloni erihika e Yerusalemu. Aliriryo erihika e Yerusalemu, iyabiri thoghothibwa kutsibu. Sihali mundu na mughuma oyuw’ikereyo. Abaisraeli batholere iba himba obuli kindu kandi.

Ekighuma eky’okwa bindu ebya bakatsuka erihimba ky’ekiherero. Eki ky’ekitsweka aha banga herera ebihongo by’ebisoro, kutse ebihembo, oku Yehova. Emikera mike enyuma waho, Abaisraeli bakatsuka erihimba ehekalhu. Aliriryo esyanzighu esikere omwa bihugho ebihererenie nabo si syanzire Abaisraeli bakahimbayo. Neryo bakalengesaya eribubahisya bang’imania omubiiri. Erighunzerera, esyanzighu esi sikaleka omwami muhya-muhya owe Persia inyakolha ekiraghiro eky’erimania omubiiri ow’obuhimbe.

Ebirimo bingi bikalhaba. Lino byamathabya birimo 17 ah’Abaisraeli bakathalhwira e Babiloni. Yehova akathuma abaminyereri biwe Hagai na Zekaria eribwira abandu batsuke erihimba kandi. Abandu bakayikethera obuwathikya bwa Nyamuhanga, n’eriowa abaminyereri. Bakatsuka erihimba kandi, nomwakine indi ekiraghiro kikabugha kithi si bahimbe.

Neryo omuthabali we Persia oyukahulhawa mwa Tatenai akasa n’eribulya Abaisraeli nga bawithe obuthoki bwahi obw’erihimba ehekalhu. Abaisraeli bakamubwira bathi omughulhu babya e Babiloni, Omwami Kiro mwababwira athi: ‘Mughende, lino, e Yerusalemu n’erihimba ehekalu ya Yehova, Nyamuhanga wenyu.’

Tatenai akathuma enyawaliho ye Babiloni akabulya kwenene Kiro, oyuwabya inyabiriholha, nga mwanabugha athya. Neryo-neryo enyawaliho erilhua okw’omwami muhya-muhya owe Persia yikasa. Yikabugha yithi kwenene Kiro mwabugha athya. Neryo omwami akasakanga athi: ‘Muleke Abaisraeli bahimbe ehekalhu ya Nyamuhanga wabu. Kandi nga balhaghira eribawathikya.’ Omwa birimo nga bbini ehekalhu yikahwa, n’Abaisraeli bali n’obutseme bunene.

Ebindi birimo bingi bikalhaba. Lino ni birimo hakuhi nga 48 ehekalu yihwere. Abandu omu Yerusalemu ni basama, neryo omuyi n’ehekalu ya Nyamuhanga sibithasosa ndeke. E Babiloni, omu Israeli Ezira amaminya ekiyithawa eky’erihimba ehekalu ya Nyamuhanga. Neryo wunasi eky’akakolha?

Ezira akaghenda eriyalebya Artasasta, omwami we Persia, n’omwami mubuya oyu akaha Ezira y’ebihembo bingi erithwalhabyo e Yerusalemu. Ezira akasaba Abaisraeli omwa Babiloni erimuwathikya eriheka ebihembo ebi eribithwalha e Yerusalemu. Hakuhi abandu nga 6,000 bakabugha bathi bakendi ghenda. Bawithe esy’ebitsipa n’esy’amaghetse n’ebindi bindu bingi eby’obughuli eby’eriheka.

Ezira ali n’obuba, kusangwa omwanzira muli abalhume babi. Abalhume aba banganimya esy’ebitsipa n’esyamaghetse syabu, n’eribitha. Neryo Ezira akabirikira abandu bahaghuma, ngoku wanamalhangira omwa kisasani. Neryo bakasaba Yehova eribatheya omwa lhughendo lhwabu lhuli-lhuli olhw’erisuba e Yerusalemu.

Ezira n’abandu bakasaba

Yehova akabatheghaya. Neryo enyuma w’emikera ini yahwere banemughenda, bakahika buholho e Yerusalemu. Eki sikirikanganaya kithi Yehova anganatheya abo abakamuyikethera eribawathikya?

Ezera sura 2 erihika 8.



Ebibulyo

  • Ni bandu bangahi abakaghenda olhughendo lhuli erilhua e Babiloni erihika e Yerusalemu, aliriryo bakabana ki bahika?
  • Abaisraeli bakatsuka erihimba ki bahika, aliriryo esyanzighu syabu sika kolhaki?
  • Hagai na Zekaria nibahi, kandi bakabwira abandu baki?
  • Ekikaleka Tatenai inyathuma enyawaliho ye Babiloni niki, kandi akabana isubirya ki?
  • Ezera akakolha ki aminya okwa kiyithawa ky’eryuwania e hekalu ya Nyamuhanga?
  • Omwa kisasani Ezera akasaba ki, n’omusabe wiwe akasubiribawa athi, kandi eki kikathukangiriraya ki?

Ebibulyo eby’eryongerako

  • Soma Ezera 3:1-13.

    Thwamayisanga omwa kitsweka ekithe mw’ekithunga ky’abandu ba Nyamuhanga, thutholere ithwa lholha embere n’erikolha ki? (Ezr. 3:3, 6; Emib. 17:16, 17; Ebr. 13:15)

  • Soma Ezera 4:1-7.

    Zerubabeli mwaha ky’erireberyako ki okw’abandu ba Yehova erisighikira n’erithulhungania eny’ikirirya? (Eri. 34:12; 1 Kor. 15:33; 2 Kor. 6:14-17)

  • Soma Ezera 5:1-5, 17 na 6:1-22.

    Ekyaleka abahakani ibatha thoka erimania omubiiri w’erihimba e hekalu niki? (Ezr. 5:5; Isa. 54:17)

    Ebikorwa eby’abasyakulhu Abayuda bika himba bithi abasyakulhu Abakristayo b’ekithunga erirondekania obusondoli bwa Yehova omughulhu banga sanga-sangana n’abahakani? (Ezr. 6:14; Esy. 32:8; Abar. 8:31; Yak. 1:5)

  • Soma Ezera 8:21-23, 28-36.

    Thuthali thw’akolha omwatsi wosi-wosi, ni ky’erireberyako kibuya ki ekya Ezera, ekya thwanga gherererya? (Ezr. 8:23; Esy. 127:1; Emi. 10:22; Yak. 4:13-15)