Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 80: Abandu ba Nyamuhanga Bakalhua e Babiloni

Olhughano 80: Abandu ba Nyamuhanga Bakalhua e Babiloni

HAKUHI ebirimo bibiri byamabiri lhaba e Babiloni ya hambirwe n’Abamedi n’Abapersia. Kandi thungerera ekikabya lino! Inga, Abaisraeli bakalhua e Babiloni. Muba boholhwa bathi? Oyuwaleka ibaghenda nindi?

Kiro, omwami we Persia, yuwabahamulha. Kera Kiro athalya buthwa, Yehova mwalhaghira omuminyereri wiwe Isaya athi asakange ebimuhambireko: ‘Wasyakolha ebyo nganzire iwa kolha. Esyongyo sikendi syasighalha isina kyungwirwe busana nawu erihamba omuyi.’ Na Kiro yuwasondolha bakahamba omuyi we Babiloni. Abamedi n’Abapersia mubasa omwa muyi omw’ithumbi erilhaba omwa syongyo esyasighalha isina kyungukere.

Aliriryo omuminyereri wa Yehova ya Isaya mwabugha athi Kiro anga lhaghire athi e Yerusalemu n’ehekalu yayu bihimbawe kandi. Kiro mwana lhaghira eki? Inga, mwalhaghira. Eki kya Kiro akabwira Abaisraeli: ‘Mughende, lino, e Yerusalemu n’erihimba ehekalhu ya Yehova, Nyamuhanga wenyu.’ N’eki ky’Abaisraeli aba bakayakolha.

Abaisraeli bakalhua e Babiloni

Aliriryo ibbwa si b’Abaisraeli abosi abali e Babiloni indi bangana thoka erighenda olhughendo lhuli-lhuli olhw’erisuba e Yerusalemu. Ni lhughendo lhuli-lhuli olhw’esyamayiru nga 500 (kilomita 800) kandi abangi ni basyakulhu kutsibu kutse balhwere kutsibu erighenda olhughendu olhwosi olhwo. Kandi hane n’esindi nzumwa isikaleka abandi bandu ibatha ghenda. Aliriryo Kiro akabwira abathe thaghenda athi: ‘Muhe ebitsipa n’esyamaghetse n’ebindi bihembo okw’abo abakaghenda eriyahimba e Yerusalemu n’ehekalu yayu.’

Neryo, Abaisraeli abali okwa lhughendo lhwabu olhw’erisuba e Yerusalemu bakahebwa ebihembo bingi. Kandi, Kiro akabaha ebibindi n’esyondehi eby’Omwami Nebukadeneza alhusaya omwa hekalu ya Yehova omughulhu athoghothaya e Yerusalemu. Abandu bawithe bindu bingi eby’eriheka n’erighenda nabyo.

Enyuma w’emikera ng’ini bane mughenda, Abaisraeli bakahika e Yerusalemu okwa buthuku obutholere. Hamathahwa birimo 70 omuyi athoghothibirwe, n’ekihugho mukya sighalha isimuli n’omundu. Aliriryo n’omwakine indi Abaisraeli lino bali omwa kihugho kyabu, bakendi bana ebitsibu, ngoku thukendi igha omwa bika kwamako.

Isaya 44:28; 45:1-4; Ezera 1:1-11.



Ebibulyo

  • Ngokwa kikanganibwe omwa kisasani, Abaisraeli bakakolha ki?
  • Kiro mwa berererya athi obuminyereri bwa Yehova erilhabira omu Isaya?
  • Kiro akabwira Abaisraeli abathe banga suba e Yerusalemu baki?
  • Kiro akaha abandu abaka suba e Yerusalemu baki?
  • Kikathwalira Abaisraeli ba mughulhu mungahi erihika e Yerusalemu?
  • Hamathalhaba birimo bingahi ekihugho kya sighere isimuli mundu wosi-wosi?

Ebibulyo eby’eryongerako

  • Soma Isaya 44:28 na 45:1-4.

    Yehova mwahira athi omuwatho okw’ibererera ly’obuminyereri obuhambire oku Kiro? (Isa. 55:10, 11; Abar. 4:17)

    Obuminyereri bwa Isaya obuhambire oku Kiro bukakanganaya buthi Yehova kwawithe obuthoki bw’eriminyerera omughulhu owakasa? (Isa. 42:9; 45:21; 46:10, 11; 2 Pet. 1:20)

  • Soma Ezera 1:1-11.

    Erikwama eky’erireberyako eky’abathathoka erisuba e Yerusalemu, n’ethu munabwire ‘thwanga wathikya’ thuthi abo abangathoka eringira omwa mubiiri ow’erithulhughania engulhu mughulhu wosi? (Ezr. 1:4, 6; Abar. 12:13; Kol. 4:12)