Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 79: Danieli Omwa Kyuna eky’Esyandale

Olhughano 79: Danieli Omwa Kyuna eky’Esyandale

EEE! Kikalhangirika Danieli ng’ali omwa bitsibu bingi. Aliriryo esyandale sisiri muhuthalhaya! Wunasi nga ni busana naki? Oyulyahira Danieli ya hano ahali esyandale syosi esi nindi? Leka thulebaye.

Omwami we Babiloni hathya y’omulhume oyukahulhawa mwa Dario. Anzire Danieli ya kutsibu kusangwa Danieli ni w’olhukeri kandi ni w’amenge. Dario akasombolha Danieli eribya muthabali mukulhu omw’obwami bwiwe. Kino kikaleka abandi balhume omwa bwami ibakwa erihali oku Danieli, neryo kino kya bakakolha.

Dario

Bakaghenda eyiri Dario n’eribugha bathi: ‘Mwami, Thwabiri thwamu thuthi wukole ekiraghiro ekikabugha kithi ahabw’ebiro 30 sihabye mundu wosi-wosi oyuka ramaya eyindi nyamuhanga kutse omundu athe ini we, mwami. Omundu wosi-wosi amathendi owa, neryo atholere inyawuswa omwa syandale.’ Dario syasi ekikaleka abalhume aba ibanza erikolha ekiraghiro eki. Aliriryo akalengekanaya athi ni kirengekanio kibuya, neryo akahira ekiraghiro ekyo ky’omwa busakangi. Hathya ekiraghiro sikya nga thasya bindulhua.

Danieli akabya abiriminya okwa kiraghiro eki, akaghenda eka wiwe n’erisaba, ngokw’akanakolha buli kiro. Abalhume babi babya ibanasi bathi Danieli syangaleka erisaba Yehova. Bali n’obutseme, kusangwa kikalhangirika kithi endegheka yabu ey’erilhusyaho Danieli yikakolha.

Omwami Dario amabya aminya ekyaleka abalhume aba ibanza erikolha ekiraghiro eki, amayikubya byomo. Aliriryo syanga bindulha ekiraghiro, neryo obo atholere erihamulha athi Danieli awusawe omwa kyuna eky’esyandale. Aliriryo omwami akabwira Danieli athi: ‘Ngawithe amaha indi Nyamuhanga wawu, oyuwukakolera, akendi kulhamya.’

Dario amayibulha-bulha erihika okw’ithendi ghotsera omw’ithumbi eryo. Engyakya eya kwamako akathibitha eyiri ekyuna ky’esyandale. Wangana mulhangira erya. Akabirikira: ‘Danieli, omughombe wa Nyamuhanga oyuliho! Nyamuhanga wawu oyuwukakolera anakulhamirye okwa syandale?’

Danieli omwa kyuna ky’esyondale

Danieli akasubiraya athi: ‘Nyamuhanga mwaka thuma malaika wiwe, n’erikumba amuno w’esyandale sisinyilhume.’

Omwami akatsema kutsibu. Akalhaghira athi Danieli alhusibawe omwa kyuna. Neryo akalhaghira athi abalhume babi abalengesaya erighoberya Danieli bawusawe omwa kyuna ky’esyandale. Nibya bathe bahika ahisi sy’ekyuna, esyandale sikabahamba n’eritsutsanga amakuha wabu wosi.

Neryo Omwami Dario akasakangira abandu bosi ab’omwa bwami biwe athi: ‘Nga lhaghira indi obuli mundu atholere inyasikya Nyamuhanga wa Danieli. Akakolha ebithiko-thiko ebikalha-kalire. Mwakalhamya Danieli okw’iribwa n’esyandale.’

Danieli 6:1-28.



Ebibulyo

  • Dario nindi, kandi akalhangira athi Danieli?
  • Abalhume ab’erihali bakaleka Dario inyakolha ki?
  • Danieli akabya abiriminya ekiraghiro kihya-kihya, akakolha ki?
  • Ekikaleka Dario inyayibulha-bulha indi syangathoka n’erighotsera niki, kandi engyakya akakolha ki?
  • Danieli akasubiraya athi Dario?
  • Niki ekikahika okw’abalhume babi abalengesaya eritha Danieli, na Dario akasakangira abandu abosi ab’omwa bwami bwiwe athiki?

Ebibulyo eby’eryongerako

  • Soma Danieli 6:1-28.

    Eriya embitha oku Danieli yika thw’ibukaya yithi eby’abahakani bakakolha erilengesya erikakirya omubiiri w’Abema ba Yehova munabwire? (Dan. 6:7; Esy. 94:20; Isa. 10:1; Abar. 8:31)

    Abaghombe ba Nyamuhanga munabwire banga gherererya bathi Danieli eribya ibanasikirye ‘abathabali b’ekihugho’? (Dan. 6:5, 10; Abar. 13:1; Emib. 5:29)

    Thwanga gherererya thuthi eky’erireberyako kya Danieli akakolera Yehova ‘obuthusa’? (Dan. 6:16, 20; Fil. 3:16; Erib. 7:15)