Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 78: Ebyalha Bikasakanga Okwa Lhuhimbo

Olhughano 78: Ebyalha Bikasakanga Okwa Lhuhimbo
Ebisakango okw’olhuhimbo

NIKI ekiri hanu? Abandu bali n’obugheni bunene. Omwami we Babiloni abirikokya abagheni ab’ebitsumbi rukumi. Bakakolesaya esyondehi sy’esy’amaghetse n’esy’ebitsipa n’ebibindi ebya lhusibawa omwa hekalu ya Yehova mwe Yerusalemu. Neryo bane aho, eminwe ey’ebyalha by’omundu yikabanika omwa mwanya n’eritsuka erisakanga okw’olhuhimbo. Obuli mundu amubaha.

Belsasari na bagheni biwe

Belsasari, mwitsikulhu wa Nebukadeneza, ya mwami lino. Akalhakira abalhume biwe ab’amenge athi babalethe. Omwami akasumbira athi: ‘Omundu wosi-wosi oyu wanga soma ebisakirwe ebi n’erimbwira ekya bikamanyisaya, akendi hembwa ebindu bingi n’eriyirwa mwa muthabali ow’ekitsumbi n’eribya owakasathu omwa bwami.’ Aliriryo sihali n’omughuma okw’abandu ab’amenge oyuwanga soma ebisakirwe okw’olhuhimbo, kutse erithulha ekya bikamanyisaya.

Mama w’omwami amowa obwogho n’eriasa omwa diro enene. Akabwira omwami athi: ‘Si wubahe. Omw’obwami bwawu muli omulhume oyo wasi esyanyamuhanga esibuyirire. Omughulhu sukulhu wawu Nebukadeneza abya mwami mwa mukolha mwa mukulhu w’abalhume biwe bosi ab’amenge. Erina liwe ya Danieli. Muthumireko, kandi akendi kubwira ebyosi ebi nga bikamanyisaya ki.’

Neryo-neryo bakaletha Danieli y’omwa nyumba. Akabya abirighana erimya ebihembo byosi-byosi, Danieli akatsuka eribugha ekyaleka Yehova inyiha sukulhu wa Belsasari ya Nebukadeneza okw’ibya mwami. Danieli akabugha athi: ‘Abya w’emiyiheko kutsibu. Na Yehova mwa musuyira.’

Danieli akabwira Belsasari athi: ‘Aliriryo iwe, wabya iwunasi ebyosi ebyahika okw’iyo, kandi nawu kuthya wukayiheka nga Nebukadeneza kwabya. Wabiri letha esyondehi n’ebibindi erilhua omwa hekalu ya Yehova n’erinywira mubyo. Wabiri pipa esyanyamuhanga esikolire omwa muthi n’amabwe, kandi siwutha sikya Omuhangiki wethu Mukulhu. Kyakyalekire Nyamuhanga inya thuma ebyalha erisakanga ebinywe ebi.’

Danieli akabugha athi: ‘Ebisakangire by’ebi, MENE, MENE, TEKELI ne PARSINI.’

‘MENE kikamanyisaya kithi Nyamuhanga abirighanza ebiro byawu eby’obwami n’erighunzabwo. TEKELI kikamanyisaya kithi w’abirilengwa okwa munzani, n’eribanwa kwa wuthe mubuya. PARSINI kikamanyisa kithi obwami bwawu bwabirihebwa okw’Abamedi n’Abapersia.’

Na Danieli akabugha ebi, Abamedi n’Abapersia ibabiri tsuka kera erighothera e Babiloni. Bakahamba omuyi n’eritha Balsasari. Eby’omunwe alyasakanga okwa lhuhimbo bikahikerera erigholho-gholho eryo! Aliriryo niki ekikendi hika okwa Abaisraeli? Thukendi kiminya bolho, aliriryo thutsuke eriminya ekikahika oku Danieli.

Danieli 5:1-31.



Ebibulyo

  • Omwami we Babiloni amabya akolha bugheni bunene n’erikolesya esyondehi n’ebibindi ebya lhusibawa omwa hekalu ya Yehova mwe Yerusalemu, ekikabya niki?
  • Balsasari akabwira abalhume biwe ab’amenge baki, aliriryo sibangathoka erikolha ki?
  • Mama w’omwami akamubwira athi akole ki?
  • Erikwamana n’ebya Danieli akabwira omwami, ekyalekire Nyamuhanga inyathuma ebyalha erisakanga okwa lhuhimbo niki?
  • Danieli akasoborera athi ebinywe ebisakangire okwa lhuhimbo?
  • Danieli akabya anamukania, niki ekikabya?

Ebibulyo eby’eryongerako

  • Soma Danieli 5:1-31.

    Kanaya okwa mbaghane eyiri ahakathi-kathi ak’eryubaha Nyamuhanga n’eryubaha erya Balsasari abya nalyo omughulhu alhangira ebisakangire okwa lhuhimbo. (Dan. 5:6, 7; Esy. 19:9; Abar. 8:35-39)

    Danieli mwakangania athi obuthubaha akakania na Balsasari n’abandi bandu biwe ab’ekitsumbi? (Dan. 5:17, 18, 22, 26-28; Emib. 4:29)

    Danieli sura 5 yikahira yithi omuwathu w’okwa buthabali bwa Yehova obw’obuhangwa bwosi? (Dan. 4:17, 25; 5:21)