Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 70: Yona n’Eyisu Enene

Olhughano 70: Yona n’Eyisu Enene

SAMALIRA omulhume oyuli omw’amaghetse. Ali omwa butsibu obw’amani, kwa kithe? Eyisu eyo yikisiya iya mumera! Wunasi omulhume oyu nga nindi? Erina liwe ya Yona. Thuthalebya ngoku abya ayisangire omwa butsibu bungi obu.

Yona ni muminyereri wa Yehova. Sihali halhaba mughulhu muli enyuma w’olhuholho lhw’omuminyereri Elisa indi Yehova akabwira Yona athi: ‘Ghenda omwa muyi munene owe Ninawi. Obubi bw’abandu eyo bwa biribya bungi, kandi nganza wubabwire okwa bubi obwo.’

Yona n’eyisu nene

Aliriryo Yona syanzire erighenda. Lithya akasambira omwa bwathu obukaghenda omwa kindi kitsweka isiye Ninawe. Yehova syathatsemera Yona busana n’erithibitha. Busana n’eki akaletha ekihunga kinene. Ni kibi kutsibu indi obwathu buli omwa kabi ak’eriyithulika n’eridikira. Abasokya bakakwa obuba bunene, n’erilhakira kutsibu esya nyamuhanga syabu sibawathikaye.

Erighunzerera Yona akababwira athi: ‘Ngaramaya Yehova, Nyamuhanga oyuwakolha olhubulha n’ekihugho. Na lino nga thibitha ingaghana erikolha omubiiri owa Yehova ambwira athi nga kole.’ Neryo abasokya bakamubulhaya bathi: ‘Thukukolere ki erihunia ekihunga?’

Yona akabugha athi: ‘Munguse omwa ngetse, n’engetse yikendi thekana kandi.’ Abasokya sibanzire erikolha eki, aliriryo ekihunga kikabya kikaghenda kikayongera bakaghunzerera n’erighusa Yona y’omwa ngetse. Neryo-neryo ekihunga kikalekeraho, n’engetse yikathekana kandi.

Yona akabya adikira omw’amaghetse, eyisu enene yikamumera. Aliriryo syali holha. Ahabw’ebiro bisathu ekiro n’erithungi ane omw’ibunda ly’eyisu eyo. Yona akayikubaya bwomo busana n’erithendi owa Yehova n’erighenda e Ninawe. Neryo ibbwa wunasi eky’akakolha?

Yona akasaba Yehova y’obuwathikya. Neryo Yehova akaleka eyisu iyasalira Yona y’okwa kithaka ekyumire. Enyuma waho, Yona akaghenda e Ninawe. Eki sikiri thukangiriraya ngokwa ni ky’omubongo erikolha ekyosi-kyosi ekya Yehova akabugha?

Ekitabu kya Yona omwa Biblia.



Ebibulyo

  • Yona nindi, na Yehova akamubwira athi akole ki?
  • Kusangwa syanzire erighenda aha Yehova akamubwira athi aghende, Yona akakolha ki?
  • Yona akabwira abasokya erikolha ki ekihunga kyanga thekana?
  • Ngokwa wanamalhangira omwa kisasani, Yona akabya adikira omw’amaghetse ekikabya niki?
  • Yona akaghunza omwanda y’eyisu mwa mughulhu mungahi, kandi akakolha mwaki?
  • Yona akabya alhua omw’isu nene akaya hi, n’eki kikathukangiriraya ki?

Ebibulyo eby’eryongerako

  • Soma Yona 1:1-17.

    Omwa kwenene, Yona mwayowa athi okwa mubiiri wiwe ow’erithulhughania engulhu okw’abanya Ninawe? (Yona 1:2, 3; Emi. 3:7; Omu. 8:12)

  • Soma Yona 2:1, 2, 10.

    Ekyahika oku Yona kikathuha kithi eriyikethera thuthi Yehova akendi subirya emisabe yethu? (Esy. 22:24; 34:6; 1 Yn. 5:14)

  • Soma Yona 3:1-10.

    Ni himbwa ki erya thukabana thukalhangira thuthi Yehova mwa lholya embere erikolesya Yona nomwakine mwalemwa eriberererya olhukwamirwa lhwiwe olhw’erimbere? (Esy. 103:14; 1 Pet. 5:10)

    Eky’erireberyako kya Yona okw’abandu be Ninawe kikathukangiriraya ki okw’itswera abandu balhuba omwa bitsweka byethu? (Yona 3:6-9; Omu. 11:6; Emib. 13:48)