Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 68: Abalhwana Babiri Abakasuba

Olhughano 68: Abalhwana Babiri Abakasuba

WULYAHOLHA, mama wawu anga yowa athi wulyathasyasuba okwa ngebe? Angabya n’obutseme bungi! Aliriryo omundu oyuwabiri holha angana thasyasuba okwa ngebe kandi? Kine kyathabyaho?

Thathungerera omulhume hano, n’omukali n’omulhwana mulere. Omulhume y’omuminyereri Eliya. Omukali ni mukwakali ow’omwa muyi owe Zarefati, n’omulhwana ni mughalha wiwe. Neryo ibbwa, kiro kighuma omulhwana akalhwalha. Akaghenda akathoha n’erighunzerera akaholha. Eliya neryo akabwira omukali athi: ‘Nyihe omulhwana.’

Eliya iniane n’omukwakali na mughalha wiwe oyuwabirilhubuka

Eliya akathwalha omwana oyuholire omwa kisenge eky’eyighulhu n’erimulhalya okwa ngyingo. Neryo akasaba athi: ‘Eee Yehova, leka omulhwana asube kandi.’ Neryo omulhwana akatsuka erihumulha! Neryo enyuma w’ekyo, Eliya akamusubaya eyikwa erilhua omwa kisenge ky’endatha, n’eribwira omukali athi: ‘Lebaya, mughalha wawu abiri suba!’ Kyakilekire mama wiwe inyabya n’obutseme.

N’owundi muminyereri mukulhu wa Yehova akahulhawa mwa Elisa. Akakolha nga muwathikya wa Eliya. Aliriryo omughulhu akahika, Yehova akakolesaya Elisa nayu erikolha ebithiko-thiko. Kiro kighuma, Elisa akaya okwa muyi owe Sunemu, ey’omukali akamukwira olhukeri. Enyuma waho, omukali ono akabutha omwana ow’obulhume.

Engyakya nguma, omwana inyamabiri kulha, akaya eyiri thatha wiwe inyane omwirima akakolha. Omwa butsumbukirania omulhwana akatsuka erilhaka athi: ‘Omuthwe waghe akalhuma!’ Bamabya babirimuthwalhwa eka, omulhwana akaholha. Bwabya bulighe bungahi oku mama wiwe! Neryo-neryo akaghenda n’eriyarondya Elisa.

Elisa akabya ahika, akaya omwa kisenge ekiri mw’omwana oyuholire. Akasaba Yehova, neryo akathulhama okwa kinda. Lhuba neryo omubiri w’omulhwana akahuha, n’erithwa esyatsihya mirundi irinda. Ni butseme bungahi obwa mama wiwe alinabu omughulhu ak’ingira n’erisanga omulhwana wiwe inyaneho!

Abandu bangi kutsibu babiriholha. Eki kyabirileka amahiika abo n’abanywani babu ibakwa bulighe. Sithuwithe obuthoki obw’erilhubukya abaholi. Aliriryo Yehova abuwithe. Embere, thukendi igha ngokw’akendi syasubya obukekulhu bungi obw’abandu okwa ngebe.

1 Abami 17:8-24; 2 Abami 4:8-37.


Ebibulyo

  • Abandu basathu abali omwa kisasani nibahi, n’ekikabya okwa mulhwana mulere niki?
  • Eliya akasabira omulhwana yaki, n’ekikakwamako niki?
  • Omuwathikya wa Eliya yandi?
  • Ekikaleka Elisa inyabirikirwa omwa nyumba y’omukali e Sunemu niki?
  • Elisa akakolha ki, n’ekikabya okwa mulhwana oyuholire niki?
  • Yehova awithe obuthoki ki, ngokwa kikanganibwe erilhabira omu Eliya na Elisa?

Ebibulyo eby’eryongerako

  • Soma 1 Abami 17:8-24.

    Eliya eribya mwowa, n’erikirirya liwe, mubya lengwako lithi? (1 Bam. 17:9; 19:1-4, 10)

    Erikirirya ly’omukwakali owe Zarefati lyabya lilengethukire lithi? (1 Bam. 17:12-16; Luka 4:25, 26)

    Ekyahika okwa mukwakali owe Zarefati, kikakanganaya kithi ekwenene eyiri omwa binywe bya Yesu ebiri omu Matayo 10:41, 42? (1 Bam. 17:10-12, 17, 23, 24)

  • Soma 2 Abami 4:8-37.

    Omukali owe Sunemu akathukangiriraya ki okw’ibya bakokya b’abagheni? (2 Bam. 4:8; Luka 6:38; Abar. 12:13; 1 Yn. 3:17)

    Munabwire, abaghombe ba Nyamuhanga thwanga bakangania thuthi ebikorwa eby’olhukeri? (Emib. 20:35; 28:1, 2; Gal. 6:9, 10; Ebr. 6:10)