Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 65: Obwami Bukayighaba

Olhughano 65: Obwami Bukayighaba

WUNASI ekikaleka omulhume ono inyasathangya ekanzu yiwe mwa miserembu? Yehova mwamubwira athi akole athya. Omulhume ono ni Ahiya omuminyereri wa Nyamuhanga. Wunasi omuminyereri nga niki? Y’omundu oyu Nyamuhanga akabwira ebikayabya obuthuku bwabyo isibuli bwayahika.

Ahiya na Yeroboamu

Ahiya ali hano anemukania na Yeroboamu. Yeroboamu y’omulhume oyo Solomona aha omubiiri ow’erikolha okwa mibiiri ey’obuhimbe bwiwe. Ahiya akabya asangana Yeroboamu y’omwanzira, akakolha ekindu ky’erithikya. Akalhusaya ekanzu nyihya-nyihya eyambere n’erisathangyayo mwa bihandi 12. Akabwira Yeroboamu athi: ‘Yithwalire ebihandi 10.’ Wunasi nga ni busana naki Ahiya akaha Yeroboamu y’ebihandi 10?

Ahiya akasoborera athi Yehova akayalhusaya oku Solomona kw’obwami. Akabugha athi Yehova akayaha Yeroboamu y’ebihanda 10. Eki kikamanyisaya kithi ebihanda bibiri bisa bya bikendi sighalira mughalha wa Solomona ya Rehoboamu erithabalha.

Solomona akabya owa ekya Ahiya abwira Yeroboamu, akahithana kutsibu. Akalengesaya eritha Yeroboamu. Aliriryo Yeroboamu akathibitha e Misiri. Sihathalhaba mughulhu muli Solomona athaholire. Mwabya mwami erighunza birimo 40, aliriryo ibbwa hathya mughalha wiwe ya Rehoboamu akayirawa mwa mwami. Akabya ane e Misiri, Yeroboamu akowa athi Solomona abiriholha, neryo akasuba e Israeli.

Rehoboamu si mwami mubuya. Akabya na mubi kutsibu eyiri abandu kwilhaba na thatha wiwe Solomona kw’alhwe. Yeroboamu n’abandi balhume b’ebitsumbi bakaghendera Omwami Rehoboamu n’erimusaba athwale abandu bandeke. Aliriryo Rehoboamu syathowa. Erithwalira haghuma ibbwa, akabya mubi erilhabirirya. Neryo abandu bakakolha Yeroboamu mwa mwami ow’ebihanda 10, aliriryo ebihanda bibiri ekya Benyamini n’ekya Yuda bikasighalha na Rehoboamu ng’omwami wabyo.

Yeroboamu sy’anzire abandu biwe bakaya e Yerusalemu eriyaramirya omwa hekalu ya Yehova. Busana n’eki akakolha esya nyana ibiri omwa sy’amaghetse n’eriletha abandu bw’obwami obw’ebihanda 10 erisiramya. Buthuku buke ekihugho kikusulha mw’erithwa ebihano n’ebikorwa by’obwithi.

omwami we Misiri akasyalhwa ne Yerusalemu. Akathwalha eby’obughuda bingi erilhua omwa hekalu ya Yehova. Busana n’ekyo e hekalu yikabya ngokwa yanahimbawa ahabw’akathambi kake.

1 Abami 11:26-43; 12:1-33; 14:21-31.



Ebibulyo

  • Abalhume babiri abali omwa kisasani, amena abu ni ahi, kandi ni bahi?
  • Ahiya akakolha athi ekanzu ey’ambithe, n’ekikorwa ekyo kikamanyisaya ki?
  • Solomona akalengesaya erikolera Yeroboamu yaki?
  • Ekikaleka abandu ibakolha Yeroboamu mw’omwami w’ebihanda ikumi niki?
  • Ekikaleka Yeroboamu inyakolha esya nyana ibiri sy’esy’amaghetse niki, n’enyuma waho ekihugho kikabya kithi?
  • Ekikabya okw’obwami bw’ebihanda bibiri n’ehekalu ya Yehova eyiri e Yerusalemu niki?

Ebibulyo eby’eryongerako

  • Soma 1 Abami 11:26-43.

    Yeroboamu abya mundu asosire athi, kandi Yehova mwa mulhaghanisya ki kwatheya ebihano biwe? (1 Bam. 11:28, 38)

  • Soma 1 Abami 12:1-33.

    Erilhua okwa ky’erireberyako kibi kya Rehoboamu, ababuthi n’abasyakulhu b’ekithunga bang’igha ki okw’ikolesya obuthoki bwa nabi? (1 Bam. 12:13; Omu. 7:7; 1 Pet. 5:2, 3)

    Eminyetho munabwire yitholere eya kwama obusondoli bwa ndi omughulhu bangabya n’erithwamu omwa syangebe syabu? (1 Bam. 12:6, 7; Emi. 1:8, 9; 2 Tim. 3:16, 17; Ebr. 13:7)

    Ekya sukuma Yeroboamu erikolha ebitsweka bibiri eby’eriramirya mw’esya nyana ibiri esy’esy’amaghetse niki, kandi eki mukyakangania kithi erithendibya n’erikirirya omu Yehova? (1 Bam. 11:37; 12:26-28)

    Oyuwaleka abandu ab’omwa bwami bw’ebihanda bibiri ibayisamambulha okw’iramya ery’ekwenene nindi? (1 Bam. 12:32, 33)