Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 62: Obutsibu Omwa Nyumba ya Dawudi

Olhughano 62: Obutsibu Omwa Nyumba ya Dawudi

DAWUDI akabya abiritsuka erithabalira e Yerusalemu, Yehova akaha abasirikali biwe b’erikinda lingi esyanzighu syabu. Yehova abya inyabiri lhagha erisyahererya Abaisraeli b’ekihugho ky’Ekanani. Na lino, busana n’obuwathikya bwa Yehova, ekihugho kyosi ekya balhaghanisibawa erighunzerera kikabya kyabu.

Dawudi ni muthabali mubuya. Anzire Yehova. Neryo ekindu ky’erimbere ekyakatsuka erikolha abiri hamba e Yerusalemu ly’erirethayo esanduko y’endaghano eya Yehova. Kandi anzire erihimba e Hekalu ey’erihira y’omo.

Dawudi akabya abirikulha, akahalhaya kutsibu. Dawudi anasi ngokwa ni kibi erithwalha ekindu kyabene. Aliriryo erigholho-gholho lighuma, akabya ane okwa nyumba yiwe ey’obwami kw’eyighulhu, akathungerera eyikwa n’erilhangira omukali mubuya. Erina liwe ya Batiseba, kandi mwira wiwe ni mughuma w’okwa basirikali biwe oyukahulhawa mwa Uria.

Dawudi akanza Batiseba ya kutsibu indi akamuletha omwa kikali kiwe. Mwira wiwe syaliyo ane omw’amalhwa. Neryo, Dawudi akaghotsera nayu n’enyuma waho akayibana inyabiriheka obukule. Dawudi akayilhalikirira n’erithuma omulenge eyiri mukulhu w’abasirikali ya Yoabu athi ahire Uria yahali olhuhi olhukalire ah’angakwira. Uria akabya abiriholha, Dawudi akathwalha Batiseba mwa mukali wiwe.

Yehova akahithana kutsibu oku Dawudi. Busana n’ekyo akathuma omughombe wiwe ya Nasani erimubwira okw’ilholho liwe. Lhangira Nasani, yolya anamukania na Dawudi. Dawudi akayikubaya bwomo busana n’eky’abirikolha, kandi Yehova syatha mwitha. Aliriryo Yehova akabugha athi: ‘Kusangwa w’abirikolha bindu bibi ebi, wukendibana bitsibu bingi omwa nyumba yawu.’ Kandi ebitsibu ni bingahi ebya Dawudi akabana!

Natana akahabulha Dawudi

Eky’erimbere, mughalha wa Batiseba akaholha. N’enyuma waho, mughalha akambere ka Dawudi ya Amnoni akabana mwali wabu ya Tamari inyane iyuwene neryo akamukaka emyatsi y’engingo n’erikesya nayu. Mughalha wa Dawudi ya Abusaloma akahithana kutsibu busana n’eki, neryo ak’itha Amnoni. Enyuma waho, Abusaloma akasigikawa n’abandu bangi, n’eriyiyira mwa mwami. Erighunzerera, Dawudi akasinga Abusaloma, oyuwamithibwa. Kwenene, Dawudi awithe bitsibu bingi.

Ahakathi-kathi k’ebyosi ebyo, Batiseba akabutha omwana w’obulhume erina iya Solomona. Dawudi akabya abiribya musyakulhu kandi inyana lhwere, mughalha wiwe Adoniya akalengesaya eriyikolha mwa mwami. Neryo Dawudi akabirikira omuhereri erina liwe ya Zadoki eryutha amaghutha w’okwa muthwe wa Solomona erikangania athi Solomona yukendibya mwami. Hathali hahwa buthuku bungi, Dawudi akaholha inyawithe birimo 70 eby’obukulhu. Mwathabalha habw’ebirimo 40, aliriryo hathya Solomona ya mwami we Israeli.

2 Samweli 11:1-27; 12:1-18; 1 Abami 1:1-48.



Ebibulyo

  • Busana n’obuwathikya bwa Yehova, erighunzerera niki ekikabya okwa kihugho kye Kanana?
  • Erigholho-gholho ighuma Dawudi ane okwa lhuthwe lhw’ekikali kiwe, ekikabya niki?
  • Busana naki Yehova ahithene kutsibu oku Dawudi?
  • Omwa kisasani, Yehova akathuma ndi eriyabwira Dawudi y’ebibi biwe, kandi omulhume oyo akabwira Dawudi athi ekikendi muhikako niki?
  • Dawudi awithe kitsibu ki?
  • Nindi oyukabya mwami we Israeli enyuma wa Dawudi?

Ebibulyo eby’eryongerako

  • Soma 2 Samweli 11:1-27.

    Erisurusutha omwa mubiiri wa Yehova, ni butheya buthi eyathuli?

    Dawudi mwawa athi omwa kibi, kandi eki kikakunga kithi abaghombe ba Yehova munabwire? (2 Sam. 11:2; Mt. 5:27-29; 1 Kor. 10:12; Yak. 1:14, 15)

  • Soma 2 Samweli 12:1-18.

    Abasyakulhu b’ekithunga n’ababuthi bang’igha isomo ki erilhua okwa mibere ya Nasani ahikira oku Dawudi akaya mukangania erilholho liwe? (2 Sam. 12:1-4; Emi. 12:18; Mt. 13:34)

    Ekyaleka Yehova inya ghanyira Dawudi niki? (2 Sam. 12:13; Esy. 32:5; 2 Kor. 7:9, 10)