Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 61: Dawudi Akayirawa mw’Omwami

Olhughano 61: Dawudi Akayirawa mw’Omwami

SAULO kandi akalengesaya erihamba Dawudi. Akimaya abasirikali biwe 3,000 abuwene neryo akaya murondaya. Dawudi akabya aminya eki, akatsindika abalingi eriyaminya aho Saulo n’abalhume biwe balhalirire omwa kiro. Neryo Dawudi akabulhaya ababiri okwa balhume biwe athi: ‘Nindi okwinywe oyukendi ghenda naghe omwa kilhaliriro kya Saulo?’

Dawudi akabirikira Omwami Saulo

Abisai akasubiraya athi: ‘Nigye.’ Abisai ni mughalha wa Seruya mwali wabu Dawudi. Saulo n’abalhume biwe bakabya bana ghotsere, Dawudi na Abisai bakasoba lhyolho-lhyolho n’eringira omwa kilhaliriro ibana hunire. Bakimaya erithumo lya Saulo n’olhuthehi lhwiwe olhw’amaghetse, ebyabya hakuhi n’omuthwe wiwe. Sihali na mughuma oyuwamabalhangira kutse oyuwamabowa kusangwa abosi babiri hwera omwa thulho.

Thalebya Dawudi na Abisai hathya. Bamabirighenda, kandi bamabirihika okwa kasweswe ak’ekithwa kwa buholho. Dawudi akabirikira okwa mukulhu w’abasirikali abe Israeli athi: ‘Iwe Abineri kikaleka iwuthatheya mukama wawu, omwami niki? Thalebya! Erithumo n’olhuthehi lhwiwe olhw’amaghetse birihi?’

Saulo akabuka. Akaminyerera omulenge wa Dawudi, n’eribulya athi: ‘Oyu niwe, Dawudi?’ Wunalhangire Saulo na Abineri eyikwa erya?

‘Inga, mukama waghe,’ Dawudi amasubirya Saulo. Na Dawudi akabulhaya athi: ‘Busana naki wukarondekanaya erimbamba? Ni kibi ki ekyanakolire? Erithumo lyawu lya lino, mukama. Leka omughuma w’okwinywe balhume ase alimaye.’

Omwami Saulo na Abineri

‘Nabiri kolha nabi,’ Saulo akaligha. ‘Nabiri kolha lhukiru-kiru.’ Neryo Dawudi amayighendera nzira siwe, na Saulo amasuba eka. Aliriryo Dawudi amayibwira athi: ‘Kiro kighuma omwa biro bino Saulo akendi nyitha. Nga thibithe omwa kihugho ky’Abafilisitini.’ N’ekyo kya Dawudi akakolha. Dawudi akathoka eritheba Abafilisitini erikirirya bathi lino ali okwa lhuhandi lhwabu.

Omughulhu akabya alhaba Abafilisitini bakayalhwa n’Abaisraeli. Saulo na Yonatana, abosi bakaholera omwa lhuhi. Kino kik’itha Dawudi ya bulighe, n’erisaka olhwimbo olhuwene, akimba athi: ‘Namakwa bulighe busana nawu, mughalha wethu Yonatana. Kawulhwe munywani waghe kutsibu!’

Enyuma w’eki Dawudi akasuba e Israeli omwa muyi owe Heburoni. N’amalhwa akabuthuka ahakathi-kathi k’abalhume abakasombolha mughalha wa Saulo ya Isiboseti eribya mwami n’abandi balhume abakanza Dawudi abye mwami. Aliriryo erighunzerera abalhume ba Dawudi bakakinda. Dawudi awithe birimo 30 eby’obukulhu akayirwa mwa mwami. Akathabalira e Heburoni ahabw’ebirimo irinda n’engegha. Abaghuma okw’abana b’obulhume ababuthirawa eyo mubalhukwa mwa Amnoni, Abusaloma, n’Adoniya.

Endambi yikahika omughulhu Dawudi n’abalhume biwe bakaghenda eriyahamba omuyi mubuya ow’akahulhawa mwa Yerusalemu. Yoabu, owundi mughalha wa Seruya mwali wabu Dawudi, akasondolha amalhwa. Neryo Dawudi akahemba Yoabu, akamukolha mwa mukulhu w’abasirikali biwe. Lithya Dawudi akatsuka erithabalira omwa muyi we Yerusalemu.

1 Samweli 26:1-25; 27:1-7; 31:1-6; 2 Samweli 1:26; 3:1-21; 5:1-10; 1 Emyatsi y’Emigulu 11:1-9.



Ebibulyo

  • Saulo abere anaghotsere omwa kilhaliriro kiwe, Dawudi na Abisai mubakolha ki?
  • Ni bibulyo ki ebya Dawudi akabulhaya Saulo?
  • Akabya abirisigha Saulo, Dawudi akaya hayi?
  • Ekikitha Dawudi ya bulighe niki, erimuhikya okwi sakanga olhwimbo olhuwene?
  • Dawudi ni wa birimo bingahi akayirwa mwa mwami e Heburoni, n’amena w’okwa baghuma b’okw’abaghalha biwe ni ahi?
  • Dawudi akathasya thabalira hayi ng’omwami?

Ebibulyo eby’eryongerako

  • Soma 1 Samweli 26:1-25.

    Ebinywe bya Dawudi ebiri omu 1 Samweli 26:11 bikakanganaya eribya na mubere ki okwa buyithondeke obwe kitiokrasi? (Esy. 37:7; Abar. 13:2)

    Thwama hiraho akaghalha erikangania olhwanzo olhuthaleghulha neryo abandi bakathendi thusima, ebinywe bya Dawudi ebiri omu 1 Samweli 26:23 byanga thuwathikya bithi eribya n’ebirengekanio ebyuwene? (1 Bam. 8:32; Esy. 18:20)

  • Soma 2 Samweli 1:26.

    Abakristayo munabwire banga kulha-kulhania bathi olhwanzo ‘olhw’erianzana kutsibu’ olhuli ng’olhwa Dawudi na Yonatana babya nalhu? (1 Pet. 4:8; Kol. 3:14; 1 Yn. 4:12)

  • Soma 2 Samweli 5:1-10.

    Dawudi mwathabalha ahabw’ebirimo bingahi ng’omwami, kandi obuthuku obu bughabirwe buthi? (2 Sam. 5:4, 5)

    Obukulhu bwa Dawudi buli busana naki, kandi eki kika thw’ibukaya ki munabwire? (2 Sam. 5:10; 1 Sam. 16:13; 1 Kor. 1:31; Fil. 4:13)