Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 60: Abigaili na Dawudi

Olhughano 60: Abigaili na Dawudi

WUNASI omukali mubuya oyukasya sanga-sangana na Dawudi? Erina liwe ya Abigaili. Ni w’amenge, kandi akathanga Dawudi erikolha ekindu kibi. Aliriryo thuthe thwaminya okw’ekyo, thutsuke erilebya ebilhwe bikahika oku Dawudi.

Dawudi akabya abirisagha Saulo, akabisama omwa mwangalhu. Baghalha babu n’abandi ab’omwaka yiwe bakamuyiyungako. Abalhume nga 400 bakasa eyali, na Dawudi akabya musondoli wabu. Neryo Dawudi akaya okwa mwami we Mowabu n’erimubwira athi: ‘Ngakusaba wikiriraye thatha waghe na mama waghe babye hano erihika ahangendi minyira ebikambikako.’ Enyuma waho, Dawudi n’abalhume biwe bakatsuka eribisama omwa bithwa.

Y’enyuma wa kino Dawudi akasanga-sangana na Abigaili. Mwira wiwe ya Nabali ni mughuda oyuwithe ekithaka kiwe ahabwiwe. Awithe esyambuli 3,000 n’esyambene 1,000. Nabali ni mulhume mubi. Aliriryo mukali wiwe Abigaili ni mubuya kutsibu. Kandi anasi erikolha ekitholere. Kiro kighuma nibya mwanalhamya erihiika liwe. Thuthalebya ngani munzira ki.

Dawudi n’abalhume biwe balhwe b’olhukeri oku Nabali. Babiri wathikya eritheya esyambuli siwe. Neryo kiro kighuma Dawudi akathuma abaghuma okw’abalhume biwe eriyasaba Nabali y’obuwathikya. Abalhume ba Dawudi bakasa eyiri Nabali, iyo n’abawathikya biwe ibanemusara obweya bw’esyambuli. Ni kiro eky’obugheni, na Nabali awithe bindu ebyuwene bingi eby’erirya. Neryo abalhume ba Dawudi bakabugha bathi: ‘Thwabiribya ab’olhukeri eyawuli. Sithwe thiba okwa syambuli syawu kwa n’enguma, erilhusyako eriwathikya erisitheya. Lino, thuka kusaba wuthuhereraye okwa byalya.’

Nabali akabugha athi: ‘Sinangaha ebyalya byaghe by’abalhume abali ng’inywe.’ Amakania nabi, kandi amakania bindu bibi oku Dawudi. Abalhume bamabya basubulha n’eribwira Dawudi y’ebindu ebi, Dawudi akahithana kutsibu. Dawudi akabwira abalhume biwe athi: ‘Mwimaye emiyali yenyu!’ Bakatsuka enzira yabu ey’eriyitha Nabali n’abalhume biwe.

Omughuma w’okwa balhume ba Nabali, oyuwowa ebinywe bibi ebya Nabali abugha, akabwira Abigaili y’ekyabya kyabere. Neryo-neryo Abigaili akatheka-theka ebyalya. Akabihekaya esyapunda n’eritsuka olhuyira lhwiwe. Akabya sanga-sangana na Dawudi, akalhua okwa punda yiwe, akunama ahisi n’eribugha athi: ‘Kisi-kisi, mwami, si wuhulikirire mwira waghe Nabali. Ni mukiru, kandi akakolha ebindu by’obukiru. Ekihembo kyakino. Kisi-kisi kithwale, kandi thughanyire busana n’ebyabiri banika.’

Abigaili akalethera Dawudi y’ebindu

Na Dawudi athi: ‘Wuli mukali w’amenge. Wamaleka inga th’itha Nabali erimulihisya emibere yiwe mibi. Lino suba eka ya buholho.’ Enyuma waho, Nabali akabya abiriholha, Abigaili akabya mughuma w’okwa bakali ba Dawudi.

1 Samweli 22:1-4; 25:1-43.



Ebibulyo

  • Erina ly’omukali oyuka syasanga-sangana Dawudi omwa kisasani yandi, kandi ni mundu ali athi?
  • Nabali nindi?
  • Ekikaleka Dawudi inyathuma abaghuma b’okwa balhume biwe eriyasaba Nabali y’obuwathikya niki?
  • Nabali akabwira abalhume ba Dawudi baki, kandi Dawudi akasubiraya athi?
  • Abigaili akakanganaya athi ngokwa ni mukali w’amenge?

Ebibulyo eby’eryongerako

  • Soma 1 Samweli 22:1-4.

    Erihiika lya Dawudi mulyabya lithi ky’erireberyako kibuya ngokwa thutholere ithwa wathikania omwa kithunga eky’Ekikrisitayo? (Emi. 17:17; 1 Tes. 5:14)

  • Soma 1 Samweli 25:1-43.

    Busana naki Nabali akakanibawa kwa nabi? (1 Sam. 25:2-5, 10, 14, 21, 25)

    Abakali Abakristayo abamunabwire bang’igha ki okwa ky’erireberyako kya Abigaili? (1 Sam. 25:32, 33; Emi. 31:26; Efe. 5:24)

    Abigaili mwakakirya Dawudi okw’ikolha bindu ki ebibiri ebibi? (1 Sam. 25:31, 33; Abar. 12:19; Efe. 4:26)

    Erisubirya lya Dawudi okwa binywe bya Abigaili, likawathikaya lithi abalhume erilhangira abakali ngoku Yehova akabalhangira? (Emib. 21:8, 9; Abar. 2:11; 1 Pet. 3:7)

Thasyaminya Bingyi

GHERERERAYA ERIKIRIRYA LYABU

Abigaili Mwakolha Omwa Menge

Emibere eyikalire eyabya omwa butheke bwa Abigaili yikathweghesayaki?