Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 59: Busana Naki Dawudi Atholere Inyathibitha

Olhughano 59: Busana Naki Dawudi Atholere Inyathibitha

DAWUDI akabya abir’itha Goliata, mukulhu wa basirikali abe Israeli ya Abineri akaletha Dawudi eyiri Saulo. Saulo akatsemera Dawudi ya kutsibu. Neryo akamukolha mwa mukulhu w’amahe iwe n’erimuthwalha eriyikalha omwa nyumba y’omwami.

Enyuma waho, abasirikali bakabya basubulha okw’ilhwa n’Abafilistini, abakali bak’imba bathi: ‘Saulo abir’itha esyankumi, aliriryo Dawudi esyankumi sy’amakumi.’ Kino kikaleka Saulo inyakwa obuha, kusangwa Dawudi amahebwa erisikibwa erilengire eriwe. Aliriryo mughalha wa Saulo ya Yonatana iyo syakwire obuha. Anzire Dawudi ya kutsibu, kandi na Dawudi anzire Yonatana. Busana n’eki ababiri bakalhaghana bathi mughulhu wosi bakendi syikalha ibane banywani.

Omwami Saulo akaghusa erithumo

Dawudi ni muwathi mubuya ow’enanga, kandi Saulo anzire omuziki ow’akawatha. Aliriryo kiro kighuma erihali rya Saulo likaleka inyakolha ekindu kibi. Dawudi akabya anamuwatha enanga, Saulo akahamba erithumo liwe n’eriritsungya, inyane mubugha athi: ‘Ngendi tsimithira Dawudi y’okwa lhuhimbo!’ Aliriryo Dawudi akayihengeka, n’erithumo lika taruka. Enyuma waho, kandi Dawudi akabalha erithumo lya Saulo omurundi owakabiri. Eki kikaleka Dawudi inyaminya athi atholere inya yikengemerera kutsibu.

Wukin’ibukire erilhaghana lya Saulo akolha? Mwabugha athi angahere mwali wiwe eribya mukali w’omulhume oyuwang’ithire Goliata. Erighunzerera Saulo akabwira Dawudi athi anganathwalha mwali wiwe Mikali, aliriryo atsuke eritha esyanzighu siwe Abafilisitini 100. Thalengekania okw’ekyo! Saulo kwenene awithe amaha athi Abafilisitini bakend’itha Dawudi. Aliriryo bakalemawa, neryo Saulo akahereraya Dawudi ya mwali wiwe eribya mukali wiwe.

Kiro kighuma Saulo akabwira Yonatana n’abaghombe biwe abosi ngokw’anzire eritha Dawudi. Aliriryo Yonatana akabwira thatha wiwe athi: ‘Wulikikolha Dawudi yanabi. Siali athakukolera kindu kibi. Kulhusyako, obuli kindu ekyalhwe akakolha kilhwe kika kuwathikya. Mwahira engebe yiwe y’omwa kabi omughulhu itha Goliata, kandi omughulhu walhangira wuthya muwasima.’

Dawudi akawepa erithumo

Saulo akahulikirira mughalha wiwe, kandi akalhaghana ngokwa siendi huthalya Dawudi. Bakasubulhaya Dawudi, kandi akakolera Saulo omwa nyumba yiwe ngokw’anabya akakolha. Aliriryo, kiro kighuma, Dawudi akabya anemwimba, Saulo kandi akaghusa oku Dawudi kw’erithumo. Dawudi akayihengeka, n’erithumo lika swiraya olhuhimbo. Ono w’omurundi owa kasathu! Ibbwa lero Dawudi amaminya athi atholere inyathibithira ighuma!

Omw’ithumbi eryo Dawudi akaghenda eka wiwe. Aliriryo Saulo akatsindika abalhume eriya mwitha. Mikali amaminya ekya thatha wiwe akatheka-theka erikolha. Busana n’ekyo akabwira mwira wiwe athi: ‘Wamathendi ghenda omwa kiro, omwa ngyakya wukendi syabya kinda.’ Omwa kiro omo Mikali akawathikya Dawudi eritswa akalhaba omw’idirisa. Habw’ebirimo ng’irinda Dawudi atholere inya bisama hanu na halya nuku Saulo sya mubane.

1 Samweli 18:1-30; 19:1-18.



Ebibulyo

  • Busana naki Saulo akwire erihali oku Dawudi, aliriryo mughalha wa Saulo ya Yonatana ni wambaghane athi?
  • Kiro kighuma Dawudi akabya anamuwathira Saulo y’enanga, ekikabya niki?
  • Saulo akabwira Dawudi athi atholere inyatsuka erikolha ki imwathwalha mwali wiwe ya Mikali nga mukali wiwe, kandi ekikaleka Saulo inyabugha eki niki?
  • Ngokwa ekisasani kikakanganaya, Dawudi akabya awathira Saulo y’enanga, niki ekikabya omurundi owakasathu?
  • Mikali akawathikaya athi erilhamya engebe ya Dawudi, kandi Dawudi atholere inyakolha ki ahabw’ebirimo irinda?

Ebibulyo eby’eryongerako

  • Soma 1 Samweli 18:1-30.

    Olhwanzo olhuthe thwika olhwabya ahakathi-kathi ka Dawudi na Yonatana lhuka kanganaya lhuthi olhwanzo olhuli ahakathi-kathi “k’esindi mbuli” “n’endeko nge”? (1 Sam. 18:1; Yn. 10:16; Luka 12:32; Zek. 8:23)

    Nomwakine indi Yonatana yuwangabere muwetwa wa Saulo, 1 Samweli 18:4 akakanganaya athi erisikya erilhabirirye erya Yonatana awithe okw’omwami oyuwasombolhawa?

    Eky’erireberyako kya Saulo kikakanganaya kithi ngokwa erihali lyangana kolya okwa kibi kinene, kandi eki kikathukunga kithi? (1 Sam. 18:7-9, 25; Yak. 3:14-16)

  • Soma 1 Samweli 19:1-17.

    Yonatana mwahira athi engebe yiwe y’omwa kabi omughulhu akanaya ebinywe ibisakangire omu 1 Samweli 19:4, 5? (1 Sam. 19:1, 6)