Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 58: Dawudi na Goliata

Olhughano 58: Dawudi na Goliata

ABAFILISITINI kandi bakasyalhwa n’Abaisraeli. Baghalha babu Dawudi abasathu abakulhu okwiyo lino ni baghuma okwa basirikali ba Saulo. Neryo kiro kighuma Yese akabwira Dawudi athi: ‘Thwalira baghalha benyu b’engano eno n’emiggati. Kandi wulebaye ngabali bathi.’

Goliata

Dawudi akabya ahika okwa kilhaliriro eky’abasirikali, akaghenda omwa kitsweka hene-hene ekiri mw’olhuhi eriyarondya baghalha babu. Goliata Omufilisitini ow’omukaka akalhuayo erisyasekererya Abaisraeli. Kwanamukolha athya omwa ngyakya n’erigholho erighunza ebiro 40. Akabugha athi: ‘Musombole omw’inywe mw’omulhume mughuma anyirwanisaye. Amanyisinga kandi akanyitha, ithukendibya bakobe benyu. Aliriryo namamusinga kandi nga mwitha, imukendibya bakobe bethu. Ngabugha nyithi musombole omundu oyukendi nyirwanisya.’

Dawudi akabulhaya abaghuma-baghuma okw’abasirikali athi: ‘Omulhume oyuwangitha Omufilisitini ono n’erilhusya okw’Abaisraeli kw’ekihemu kino anga hebwa ki?’

Omusirikali athi: ‘Saulo inyakendiha omulhume oyo y’eby’obughuda bingi. Kandi inyakendi muhererya mwali wiwe eribya mukali wiwe.’

Aliriryo Abaisraeli bosi bakasagha Goliata kusangwa ni munene kutsibu. Ni muli futi 9 n’erilhabamu (hakuhi metere 3), kandi ali n’oghundi musirikali oyukamuhekera engabo yiwe.

Abaghuma b’okw’abasirikali bamayabwira Omwami Saulo bathi Dawudi anzire erilhwa na Goliata. Aliriryo Saulo akabwira Dawudi athi: ‘Si wangalhwa n’Omufilisitini ono. Iwe wuli mulhwana, kandi iyo ebiro eby’engebe yiwe ebyosi alhwe inyane musirikali.’ Dawudi athi: ‘Mun’itha edubu n’endali ebyaheka esyambuli sya thatha. N’Omufilisitini ono akendibya ng’ibyo. Yehova akendi ngwathikya.’ Neryo Saulo athi: ‘Ghenda, kandi Yehova abye nawu.’

Dawudi akandaghalira eyikwa omwa lhusi n’erihayo amabwe athano awathenderere, n’erihirawo omwa ngunza yiwe. Neryo akahamba omunzeledi wiwe n’eriyasanga-sangana n’ow’omukaka. Goliata akabya mulhangira, akasweka. Akalengekanaya athi kikendibya kyolho eritha Dawudi.

Dawudi akaghusa eribwe

Goliata akamubwira athi: ‘Asa eyangali, nangahererya omubiri wawu w’ebinyonyi n’ebisoro.’ Aliriryo Dawudi athi: ‘Wukanyasira n’omuyali n’erithumo n’omuhunda, aliriryo ngasa eyawuli omwa lina lya Yehova. Munabwire Yehova akendi kuhira omwa byalha byaghe kandi ngendi kw’itha.’

Neryo-neryo Dawudi akathibitha eyiri Goliata. Akalhusaya eribwe ly’omwa ngunza yiwe, n’eririhira omwa munzeledi wiwe, n’eririghusa n’akaghalha kiwe kosi. Eribwe likaghulhuka n’eriyingira omwa muthwe wa Goliata, n’eriwa ahisi n’eriholeraho! Abafilisitini bakabya balhangira embangi yabu iyamabiriwa, abosi bakabinduka n’erithibitha. Neryo Abaisraeli bakabathibithako n’erisinga olhuhi.

1 Samweli 17:1-54.



Ebibulyo

  • Goliata mwapuma athi abasirikali be Israeli?
  • Goliata ni mungahi, kandi ni kihembo ki eky’Omwami Saulo akalhaghanisaya omundu oyuwang’itha Goliata?
  • Dawudi akabugha athiki Saulo abirimubwira athi syangathoka erilhwa na Goliata kusangwa Dawudi ni mulhwana?
  • Akasubirya Goliata, Dawudi akakanganaya athi eriyikethera liwe omu Yehova?
  • Ngokwa wunalhangire omwa kisasani, Dawudi akakolesaya ki eritha Goliata, kandi niki ekikabya okw’Abafilisitini enyuma w’eki?

Ebibulyo eby’eryongerako

  • Soma 1 Samweli 17:1-54.

    Embiitha eyiri enyuma w’erithendi ubaha lya Dawudi niki, kandi thwanga gherererya thuthi obuthubaha bwiwe? (1 Sam. 17:37, 45; Efe. 6:10, 11)

    Busana naki Abakristayo batholere ibayihighulha okwa kirimu eky’amalingwatha ng’ekya Goliata omughulhu bali omwa misathu kutse eby’eriyitsemesya? (1 Sam. 17:8; Gal. 5:26; 1 Tim. 4:8)

    Ebinywe bya Dawudi bikakanganaya bithi indi abya awithe erikirirya omwa buwathikya bwa Nyamuhanga? (1 Sam. 17:45-47; 2 Emy. 20:15)

    Omwa mwanya w’erikwama kya kania okwa mahe abiri aw’akalhwa, omwatsi ono akakanganaya athi ngoku kwenene amalhwa abya ahakathi-kathi k’esyanyamuhanga esy’amabehi na Nyamuhanga ow’ekwenene, Yehova? (1 Sam. 17:43, 46, 47)

    Emisighalira ey’abahakabibwa yika gherereraya yithi eky’erireberyako kya Dawudi omwi yikethera Yehova? (1 Sam. 17:37; Yer. 1:17-19; Erib. 12:17)