Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 57: Nyamuhanga Akasombolha Dawudi

Olhughano 57: Nyamuhanga Akasombolha Dawudi
Dawudi akalhamaya ekyana ky’embuli

WUNALHANGIRE ekyamabiribya? Omulhwana amabirilhamya ekyana ky’embuli ky’okwa dubu. Edubu muyasa n’eriheka ekyana ky’embuli kandi yanza eriyakirya. Aliriryo omulhwana mwa thibitha kuyo, n’erilhamya ekyana ky’embuli ky’omwa bunu bw’edubu. Neryo edubu yabere yimuka, omulhwana mwahambayo n’eriswiryayo n’eriholeraho! Okwa wundi mughulhu mwalhamya enguma okwa syambuli erilhua okwa ndale. Oyu si mulhwana embangi? Wunasi nga nindi?

Ono ni Dawudi omulhwana mulere. Ikire omwa muyi we Betelehemu. Sukulhu wiwe yuwabya Obedi, mughalha wa Ruta na Boazi. Wunabibukire? Na thatha wa Dawudi ya Yese. Dawudi akatheghaya esyambuli sya thatha wiwe. Dawudi abuthawa enyuma w’ebirimo ikumi Yehova asombwere Saulo eribya mwami.

Endambi yikahika neryo Yehova akabwira Samweli athi: ‘Imaya amaghutha aw’embaghane wughende omwa nyumba ya Yese e Betelehemu. Nabiri sombolha omughuma w’oku baghalha biwe eribya mwami.’ Samweli akabya alhangira mughalha wa Yese omukulhu omw’abosi ya Eriabu, akayibwira athi: ‘Ono kwenene ya Yehova abirisombolha.’ Aliriryo Yehova akamubwira athi: ‘Si wuthungerere obuli bwiwe n’obubuya bwiwe. Sindi thamusombolha eribya mwami.’

Neryo Yese akabirikira mughalha wiwe Abinadabu n’erimulethera Samweli. Aliriryo Samweli akabugha athi: ‘Eyihi n’oyu Nyamuhanga syathamusombolha.’ Kandi, Yese akathasya letha mughalha wiwe Sama. Samweli athi: ‘Eyihi n’oyu nayu Nyamuhanga syathamusombolha.’ Yese akalethera Samweli y’abaghalha biwe irinda, aliriryo Yehova syatha sombolhamu n’omughuma. Samweli akabulhaya athi: ‘Aba b’abalhwana abosi?’

Yese akasubiraya athi: ‘Yikine omulere omwa bosi. Aliriryo ane omwa bwerere akalisaya esyambuli.’ Bakabya babiri letha Dawudi, Samweli akalhangira athi ni mulhwana mubuya okw’ameso. Yehova akabugha athi: ‘Yono. Muthe kw’amaghutha.’ Na Samweli kw’akakolha athya. Endambi yikendi syahika omughulhu Dawudi asyabya mwami we Israeli.

1 Samweli 17:34, 35; 16:1-13.



Ebibulyo

  • Omulhwana oyuli omwa kisasani yandi, kandi thukaminya thuthi ngokwa ni mbangi?
  • Dawudi ikere hayi, n’amena wa thatha wiwe na sukulhu wiwe ni ahi?
  • Ekikaleka Yehova inyabwira Samweli athi aghende okwa nyumba ya Yese e Betelehemu niki?
  • Yese akabya aletha baghalha biwe irinda eyiri Samweli, ekikabya niki?
  • Bakabya baletha Dawudi, Yehova akabwira Samweli yaki?

Ebibulyo eby’eryongerako

  • Soma 1 Samweli 17:34, 35.

    Ebyabya ebi bikakanganaya bithi obuthubaha bwa Dawudi n’eriyeghemerya Yehova? (1 Sam. 17:37)

  • Soma 1 Samweli 16:1-14.

    Ebinywe bya Yehova ebiri omu 1 Samweli 16:7 bikathuwathikaya bithi erithendibya n’akasolholho n’eriyihighulha okw’itswera omundu ngokw’alhangirikire okwa mubiri? (Emib. 10:34, 35; 1 Tim. 2:4)

    Eky’erireberyako kya Saulo kikakanganaya kithi ngokwa omughulhu Yehova anga lhusya omulimu abuyirire wiwe w’okwa mundu, inyanganasa kw’omulimu omubi, kutse engumbu ey’erikolha ebibi? (1 Sam. 16:14; Mt. 12:43-45; Gal. 5:16)