Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 56: Saulo—Omwami w’Erimbere owe Israeli

Olhughano 56: Saulo—Omwami w’Erimbere owe Israeli
Samweli akahakabaya Saulo ng’omwami

LEBAYA Samweli akutha okwa muthwe w’omulhume kw’amaghutha. Eki kyababya bakakolha okwa mundu erikangania indi abirisombolhwa eribya mwami. Yehova akabwira Samweli eryutha amaghutha w’okwa muthwe wa Saulo. Ni maghutha aw’embaghane awakakumba ndeke.

Saulo mwathalengekania athi angabya inyatholere eribya mwami. Akabwira Samweli athi: ‘Ngali w’okwa kihanda kya Benyamini, ekihanda ekike Omuisraeli yosi. Busana naki iwabugha wuthi ngendibya mwami?’ Yehova anzire Saulo kundi syali yithwalha mwa munene kandi muw’ekitsumbi. Kyakikaleka Inya musombolha eribya mwami.

Aliriryo Saulo si munakwa kutse si mulhume muke. Akalhua omw’ihiika ery’obughuda, kandi ni mulhume muli, mubuya kutsibu omwa meso. Ni muli omwa Israeli yosi erilhaba obuli mundu futi nguma! Kandi Saulo ni muthibithi nyakabara, kandi ni mulhume ow’akaghalha kanene. Abandu bamatsema kundi Yehova abirisombolha Saulo eribya mwami. Neryo bakatsuka eryutha obwogho: ‘Wubyeho emighulhu yosi iwe mwami!’

Esyanzighu sya Baisraeli sikina kalire nga kera. Sikina lyambaya Abaisraeli ba kutsibu. Hathe halhaba buthuku buli Saulo ayirirwe mwa mwami, ab’Amoni bakasyalhwa nabu. Neryo Saulo akakuma-kuma abasirikali bangi, n’erisinga ab’Amoni. Kino kikaleka abandu ibatsemera Saulo eribya mwami.

Ebirimo bine mughenda bikalhaba, Saulo akasondolha Abaisraeli b’okw’isingura lingi esyanzighu syabu. Saulo kandi awithe mughalha wiwe embangi oyukahulhawa mwa Yonatani. Nayu akawathikaya Abaisraeli erisingura nyuhi nyingi. Abafilisitini babakine nzighu syakabi eyiri Abaisraeli. Kiro kighuma esyankumi n’esyankumi esy’Abafilisitini bakasyalhwa n’Abaisraeli.

Samweli akabwira Saulo athi amulinde erihika ahakendiasira n’eriha ekihongo, kutse ekihembo, oku Yehova. Aliriryo Samweli syatha subulha lhuba. Saulo akasagha athi Abafilisitini bakendi tsuka amalhwa, neryo akalholhaya embere n’eriha ekihongo iyo iyuwene-wene. Neryo Samweli akabya asa, akabwira Saulo athi sialithabya mwowa. Samweli akabugha athi: ‘Yehova akendi sombolha owundi mundu eribya mwami we Israeli.’

Enyuma waho, Saulo kandi akathasyaghana eriowa. Neryo Samweli akamubwira athi: ‘Kyuwene eriowa Yehova kwilhaba erimuha ekihembo eky’embuli eyuwene. Kusangwa si wuthowa Yehova, siendi kuleka mwa mwami we Israeli.’

Thwangan’igha erisomo eryuwene omw’eki. Kikathukanganaya omubongo owali omwi owa Yehova mughulhu wosi. Kandi, kikakanganaya kithi omundu mubuya, nga Saulo kwabya, angana hinduka inyabya mubi. Si thuli anza nahake eribya babi, kwa kithe?

1 Samweli esya sura 9 erihika 11; 13:5-14; 14:47-52; 15:1-35; 2 Samweli 1:23.



Ebibulyo

  • Omwa kisasani, Samweli akakolha ki, kandi busana naki?
  • Ekikaleka Yehova inyanza Saulo niki, kandi ni mulhume asosire athi?
  • Erina lya mughalha wa Saulo yandi, kandi mughalha wiwe akakolha ki?
  • Ekikaleka Saulo inyaha obuhere omwa mwanya w’erilinda Samweli akakolha kyo niki?
  • Thuk’igha isomo ki omwa mwatsi awahambire oku Saulo?

Ebibulyo eby’eryongerako

  • Soma 1 Samweli 9:15-21 na 10:17-27.

    Emibere ya Saulo ey’eriyibombeka muya muwathikya yithi erithendi anguha erikolha kindu kibi omughulhu abalhume bamubwira ebinywe by’erithendi muha kitsumbi? (1 Sam. 9:21; 10:21, 22, 27; Emi. 17:27)

  • Soma 1 Samweli 13:5-14.

    Saulo mwakolha kibi ki e Gilgali? (1 Sam. 10:8; 13:8, 9, 13)

  • Soma 1 Samweli 15:1-35.

    Ni kibi ki ekikalire ekya Saulo akolha ekihambangene na Agagi, omwami we Amaleki? (1 Sam. 15:2, 3, 8, 9, 22)

    Saulo mwalengesya eryuwanirirya athi ebikorwa biwe n’eriyiha kw’ekihemu? (1 Sam. 15:24)

    Ni kunga ki erya thutholere ithwowa omughulhu thukahanawa? (1 Sam. 15:19-21; Esy. 141:5; Emi. 9:8, 9; 11:2)