Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 55: Omulhwana Mulere Akakolera Nyamuhanga

Olhughano 55: Omulhwana Mulere Akakolera Nyamuhanga

OMULHWANA omulere oyu si mubuya? Erina liwe ya Samweli. N’omulhume oyu hambire okwa muthwe wa Samweli ni Eli omuhereri mukulhu owe Israeli. Olya ni thatha wa Samweli ya Erikana na mama wa Samweli ya Hana abakaletha Samweli eyiri Eli.

Samweli akabandana omuhereri mukulhu Eli

Samweli ni w’ebirimo nga bbini kutse bithano bisa eby’obukulhu. Aliriryo akendi ikalha omwa hema ya Yehova mwa hano na Eli n’abandi bahereri. Ekyangalekire Erikana na Hana ibaha omwana oyu kine mulere nga Samweli erikolera omwa hema ya Yehova niki? Leka thulebaye.

Ebirimo bike ebilhabire eki kithali kyabya, Hana abya n’obulighe bunene. Enzumwa yiri yithi abya isyanga butha omwana, kandi aby’anzire omwana ya kutsibu-tsibu. Neryo kiro kighuma omughulhu Hana abalhamira ehekalhu ya Yehova, mwasaba athi: ‘Yehova, si wunyibirirawe! Wamamba omwana w’obulhume, nga kulhaghanisaya indi ngendi syakuhayo akukolere omwa engebe yiwe yosi.’

Yehova mwasubirya omusabe wa Hana, n’emikera mike enyuma waho mwabutha Samweli. Hana mwanza omwana wiwe ow’obulhume oyu, kandi mwatsuka erimukangirirya oku Yehova inyakine lhumekeke. Mwabwira mwira wiwe athi: ‘Samweli akendisyabya ana biri kulha isyakitholere erilemberwa, ngendisya muthwalha omwa hema ey’erihindaniramu eriyakolera Yehova.’

Eki kya thukalhangira Hana na Erikana bakakolha omwa kisasani. Kandi kusangwa Samweli abiri kangiriribwa ndeke n’ababuthi biwe, amatsema erisya kolera Yehova ya hano omwa hema ey’erihindanamu. Obuli kirimo Hana na Erikana bakasa erisyaramirya omwa hema ey’embaghane eyi, n’eribalhamira omulhwana wabu. Kandi obuli kirimo Hana akaletha ekanzu nyihya-nyihya eyithe kwa mikono eyo abiri lhukira Samweli.

Ebirimo binemulhaba, Samweli akalholha embere erikolera omwa hema ya Yehova, neryo Yehova n’abandu bama mwanza. Aliriryo baghalha ba Eli omuhereri mukulhu ya Hofuni na Finehasi sibalikolha ebibuya. Bakakolha bindu bingi ebithuwene, kandi nibya bakaleka abandi ibathowa Yehova. Eli atholere inyabalhusya okwibya bahereri, aliriryo syali kolha athya.

Samweli n’omwane mulere syalireka ebindu bibi ebikakolhawa omwa hema bikaleka akathendi kolera Yehova. Aliriryo kusangwa ni bandu bake abanzire Yehova, hamabirilhaba buthuku buli Yehova isyakikanaya na mundu wosi-wosi. Samweli akabya abirikulha ekikabya kya kino:

Samweli anaghotsere omwa hema omulenge akamutsumbukya. Akasubirya athi: ‘Ngye yono hano.’ Neryo akahangana n’erithibitha eyiri Eli, n’eribugha athi: ‘Mwawukanyibirikira, ngye yono hano.’

Aliriryo Eli akasubiraya athi: ‘Sindithakubirikira; suba omwa ngyingo.’ Neryo Samweli akasuba omwa ngyingo.

Neryo omulenge owakabiri akathasya birikira: ‘Samweli!’ Neryo Samweli akahangana n’erithibitha kandi eyiri Eli. Akabugha athi: ‘Wukabirinyibirikira, ka ngye yono hano.’ Aliriryo Eli akasubirya athi: ‘Sindithakubirikira, mughalha waghe. Kesaya kandi.’ Neryo Samweli akasuba omwa ngyingo yiwe.

‘Samweli!’ omulenge akabirikira omurundi owakasathu. Neryo Samweli akathibitha eyiri Eli. Akabugha athi: ‘Ngye yono hano, lero endambi eno wangabya iwamambirikira.’ Lino Eli amaminya athi atholere inyabya ini Yehova oyukabirikira. Neryo akabwira Samweli athi: ‘Ghenda wuthasya kesaya, kandi amathasya birikira, wutholere iwabugha wuthi: “Kanaya, Yehova, omughombe wawu anahulikirire.”’

Eki kya Samweli akabugha Yehova akathasya mubirikira. Neryo Yehova akabwira Samweli ngokw’akayasuyira Eli n’abaghalha biwe. Enyuma waho, Hofuni na Finehasi baka holera omwa lhuhi bakalhwa n’Abafilistini, na Eli akabya owa ekyamahika oku baghalha biwe, akayithinira ahisi, n’ebikya biwe bikathwika n’eriholha. Neryo ekinywe kya Yehova kikahikerera.

Samweli akakulha, n’eribya mutsweri w’erighunzerera e Israeli. Akabya abiribya musyakulhu, abandu bakamusaba bathi: ‘Sombolha omwami athuthabaleko.’ Samweli syanzire erikolha eki, kusangwa Yehova ya mwami wabu. Aliriryo Yehova akamubwira athi ahulikirire eby’abakabugha.

1 Samweli 1:1-28; 2:11-36; 4:16-18; 8:4-9.



Ebibulyo

  • Omulhwana mulere oyuli omwa kisasani, erina liwe yandi, n’abali nayu ni bahi?
  • Ni musabe ki owa Hana akasaba omughulhu akaghenda omwa hema ya Yehova ey’erihindaniramu, kandi Yehova akamusubiraya athi?
  • Samweli awithe birimo bingahi bakamuthwalha eriyakolera omwa hema ya Yehova, kandi mama wiwe akamukolera ki buli kirimo?
  • Amena w’abaghalha ba Eli ni ahi, kandi ni bandu abasosire bathi?
  • Yehova akabirikira athi Samweli, kandi ni mwatsi ki ow’akamuha?
  • Samweli akabya abirikulha akabya ki, kandi akabya abiribya musyakulhu, ekikabya niki?

Ebibulyo eby’eryongerako

  • Soma 1 Samweli 1:1-28.

    Ni ky’erireberyako ki kibuya ekya Elkana akaha abakulhu b’eka omughulhu bakathwalha obusondoli bw’omw’iramya ery’ekwenene? (1 Sam. 1:3, 21; Mt. 6:33; Fil. 1:10)

    Ni somo ki erya thwang’igha omwa ky’erireberyako kya Hana omughulhu thwangabana ebitsibu ebikalire? (1 Sam. 1:10, 11; Esy. 55:22; Abar. 12:12)

  • Soma 1 Samweli 2:11-36.

    Eli mwasikya athi baghalha biwe kwilhaba Yehova, n’eki kyangabya kithi ikunga eyathuli? (1 Sam. 2:22-24, 27, 29; Ebi. 21:18-21; Mt. 10:36, 37)

  • Soma 1 Samweli 4:16-18.

    Ni mwatsi ki ow’obulighe owali mw’ebitsweka bbini owakalhua eyabakalhwira olhuhi, kandi akahamba athi oku Eli?

  • Soma 1 Samweli 8:4-9.

    E Israeli muyahithania yithi Yehova, kandi thwanga sighika thuthi Obwami omwa buthaleghulha munabwire? (1 Sam. 8:5, 7; Yn. 17:16; Yak. 4:4)