Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 51: Ruta na Naomi

Olhughano 51: Ruta na Naomi

OMWA Biblia wukendi bana mw’ekitabu ekikahulhawa mwa Ruta. Ni lhughano olhuhambire okw’ihiika eryabyaho omwa buthuku Abaisraeli babya n’abatsweri. Ruta ni mukali mulere erilhua omwa kihugho ekye Moabu; si w’okw’ihanga erye Israeli. Aliriryo Ruta akabya igha oku Yehova Nyamuhanga ow’ekwenene, neryo akamwanza kutsibu-tsibu. Naomi ni mukali mukulhu oyuwa wathikaya Ruta erigha oku Yehova.

Naomi ni mukali omu Israeli. Iyo na mwira wiwe n’abaghalha biwe babiri mubahumira omwa kihugho ekye Moabu omwa buthuku habya byalya bike eby’erirya omwa Israeli. Neryo kiro kighuma mwira wa Naomi mwaholha. Enyuma waho baghalha ba Naomi mubathahya abambesa Abamoabu babiri abakahulhawa mwa Ruta na Oripa. Aliriryo enyuma w’ebirimo nga 10, baghalha ba Naomi ababiri mubaholha. Kamubwabya bulighe oku Naomi n’abambesa babiri aba! Ibbwa hathya Naomi angakolire ki?

Kiro kighuma Naomi akathwamu erighenda olhughendo lhuli olhw’erisuba eka eyiri abandu biwe. Ruta na Oripa bakanza erikalha haghuma nayu, neryo bakaghenda nayu. Aliriryo bakabya babiri ghenda ahabw’akathuku omwanzira, Naomi akabinduka n’eribugha n’abambesa athi: ‘Musube eka kandi muyikale n’aba.

Naomi akahereraya abambesa b’obuholho n’eribugha athi bukyaghe. Busana n’ekyo bakatsuka eririra, kundi banzire Naomi ya kutsibu. Bakabugha bathi: ‘Eyihi! Thukendi ghenda haghuma nawu eyiri abandu bawu.’ Aliriryo Naomi akasubiraya athi: ‘Bali baghe, mutholere imwasuba eka. Mukendibya ndeke ewenyu.’ Neryo Oripa akatsuka olhughendo lhwiwe olhw’erisuba ewabu. Aliriryo Ruta syatha ghenda. mama benyu.’

Naomi akabinduka n’eribugha athi: ‘Oripa abiri ghenda. Nawu ghenda ewenyu haghuma nayu.’ Aliriryo Ruta akasubiraya athi: ‘Siwuleke nga kusighania! Leka nga ghende haghuma nawu. Aho wukendi ghenda naghe ngendi ghenda, n’aho wasy’ikalha naghe nasy’ikalha aho. Abandu bawu basyabya bandu baghe, na Nyamuhanga wawu asyabya Nyamuhanga waghe. Aho wasyaholera naghe nasyaholera n’eritsikwa aho.’ Ruta akabya abiribugha ebi, Naomi akaleka erithasya lengesya eribugha athi aghende ewabu.

Erighunzerera abakali babiri bakahika e Israeli. Hano habakikalha. Neryo Ruta akatsukiraho erikolera omwa malima, kusangwa ni buthuku obw’erighesa ekisusu. Omulhume oyukahulhawa mwa Boazi akamuleka aghese ekisusu omwa malima iwe. Wunasi mama wa Boazi ngabya inindi? Abya ini Rahabu ow’omwa muyi we Yeriko.

Kiro kighuma Boazi akabwira Ruta athi: ‘Nabirikwowako bingi kutsibu, kandi ngoku wulhwe w’olhukeri oku Naomi. Nganasi ngoku wasigha thatha wawu na mama wawu n’ekihugho kyenyu kandi ngoku muwasa erisy’ikalha haghuma n’abandu abo wabya wuthasi enyuma. Anguli Yehova akutsumule!’

Ruta akasubirya athi: ‘Wamanyikangania olhukeri, musyakulhu. Wamaleka ingayowa ndeke erilhabira omwa mukania mubuya wamanyikaniryamo.’ Boazi akanza Ruta ya kutsibu, kandi sihathalhaba buthuku buli bathali bathahania. Kino ka kyamatsemesya Naomi ya kutsibu! Aliriryo ibbwa Naomi akathasya tsema kutsibu Ruta na Boazi bakabutha omwana w’erimbere, oyukahulhawa mwa Obedi. Enyuma waho Obedi akabya sukulhu wa Daudi, oyo thukendi igha kwa bingi embere.

Ruta na Naomi

Ekitabu ekye Biblia ekya Ruta.



Ebibulyo

  • Naomi akahika athi omwa kihugho kye Moabu?
  • Ruta na Oripa ni bahi?
  • Naomi akabya abwira Ruta na Oripa athi basube eyiri abandu babu, obuli mughuma akasubiraya athi?
  • Boazi nindi, kandi akawathikaya athi Ruta na Naomi?
  • Omwana Boazi na Ruta babutha yandi, kandi busana naki thutholere ithwa mw’ibuka?

Ebibulyo eby’eryongerako

  • Soma Ruta 1:1-17.

    Olhwanzo olhuthaleghulha olhuwene olhwa Ruta akanganaya ni lhwahi? (Ruta 1:16, 17)

    Ebirengekanio bibuya ebya Ruta akanganaya bikakanganaya bithi emibere “ey’esindi mbuli” okw’abahakabibwa abali okwa kihugho munabwire? (Yn. 10:16; Zek. 8:23)

  • Soma Ruta 2:1-23.

    Ruta akabya athi ky’erireberyako okw’abambesa munabwere? (Ruta 2:17, 18; Emi. 23:22; 31:15)

  • Soma Ruta 3:5-13.

    Boazi mwalhangira athi erianza lya Ruta erithahibwa nayu kwilhaba erithahibwa n’omulhume mulere?

    Emibere ya Ruta yikathukangiriraya ki okwa lhwanzo olhuthaleghulha? (Ruta 3:10; 1 Kor. 13:4, 5)

  • Soma Ruta 4:7-17.

    Abalhume Abakristayo munabwire bangabya bathi nga Boazi? (Ruta 4:9, 10; 1 Tim. 3:1, 12, 13; 5:8)