Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 49: Eryuba Likimana

Olhughano 49: Eryuba Likimana

THATHUNGERERA Yosua. Akabugha athi: ‘Ryuba, imana!’ Neryo eryuba lik’imana. Likasiba ahakathi-kathi k’olhubulha ekiro ekyosi. Yehova akaleka eki kibye! Aliriryo thutha lebya ekikaleka Yosua inyanza athi eryuba libye irinemwaka.

Eryuba

Abami bathanu ababi ab’omwa kihugho ekye Kanana bakabya batsuka erilhwa n’Abagibeoni, Abagibeoni bakathuma omulhume eriyasaba Yosua y’obuwathikya. Akabugha athi: ‘Wase lhuba-lhuba eyathuli! Wuthulhamaye! Abami abosi ab’omwa kihugho eky’ebithwa babiri syalhwa n’abaghombe bawu.’

Neryo-neryo Yosua n’abalhume biwe abosi abalhwi bakaghenda. Bakaghenda erithumbi lyosi. Bakabya bahika okw’Abagibeoni, abasirikali ab’abami bathanu bakubaha n’eritsuka erithibitha. Neryo Yehova akawisaya amathu manene-manene erilhua omwakyanya, n’abasirikali bangi bakatsuka eriholha busana n’eriswiribwa n’amathu kwilhaba abak’ithibwa n’abalhume abalhwi aba Yosua.

Yosua

Yosua akalhangira athi eryuba likayalenga. Bukendibya mwirima, n’abangi okw’abasirikali ab’abami babi abathanu bakendi thibitha. Neryo kyakikaleka Yosua inyasaba Yehova n’eribugha athi: ‘Ryuba imana!’ Neryo eryuba lyamabya lina mukolha, Abaisraeli bamathoka erisinga amalhwa.

Yikine abandi abami bangi ababi e Kanana abaponire abandu ba Nyamuhanga. Kikathwalira Yosua n’abalhwi biwe ebirimo mukagha erikinda abami 31 ab’omwa kihugho ekyo. Ekyo kikabya kyabiri kolhwa, Yosua akalhangira athi ekihugho ekye Kanana kikaghabawa okwa bindi bihanda ebikayithagha ebitsweka.

Ebirimo bingi bikalhaba, n’erighunzerera Yosua akaholha inyawithe ebirimo 110 eby’obukulhu. Iyo n’abanywani biwe bakabya bakineho, abandu bakowa Yehova. Aliriryo abalhume babuya aba bakabya babiriholha, abandu bakatsuka erikolha bindu bibi n’eringira omwa butsibu. Buno ibbwa bw’obuthuku obwa bakayithaghira mw’obuwathikya bwa Nyamuhanga.

Yosua 10:6-15; 12:7-24; 14:1-5; Abatsweri 2:8-13.



Ebibulyo

  • Omwa kisasani, Yosua akabugha athiki, kandi busana naki?
  • Yehova akawathikaya athi Yosua n’abalhume biwe abalhwi?
  • Yosua akasinga abami bangahi, kandi kikathwalha mughulhu mungahi?
  • Ekikaleka Yosua inyaghaba ekihugho kye Kanana niki?
  • Yosua awithe birimo bingahi akaholha, kandi ekikabya okw’abandu enyuma waho niki?

Ebibulyo eby’eryongerako

  • Soma Yosua 10:6-15.

    Eriminya thuthi Yehova mw’imania eryuba n’omwezi okw’Abaisraeli, thuwithe eriyikethera ki munabwire? (Yos. 10:8, 10, 12, 13; Esy. 18:3; Emi. 18:10)

  • Soma Yosua 12:7-24.

    Oyuwabya n’olhukwamirwa olhw’erikinda abami 31 abe Kanana nindi, kandi busana naki eki ni kikulhu okw’ithwe munabwire? (Yos. 12:7; 24:11-13; Ebi. 31:8; Luka 21:9, 25-28)

  • Soma Yosua 14:1-5.

    Ekihugho mukyaghabwa kithi okwa bihanda bye Israeli, kandi eki kikakanganaya ki erikwamana n’emyandu omwa Paradiso? (Yos. 14:2; Isa. 65:21; Eze. 47:21-23; 1 Kor. 14:33)

  • Soma Abatsweri 2:8-13.

    Nga Yosua e Israeli, ni bahi munabwire abaka kakiraya engangirirya ey’amabehi? (Abat. 2:8, 10, 11; Mt. 24:45-47; 2 Tes. 2:3-6; Tito 1:7-9; Erib. 1:1; 2:1, 2)