Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 48: Abagibeoni ab’Amenge

Olhughano 48: Abagibeoni ab’Amenge

EMIYI mingi omwa Kanana hathya yikayithegheka erilhwa n’Abaisraeli. Bakalengekanaya bathi bangana singa. Aliriryo abandu abali omwa muyi owe Gibeoni owali hakuhi sibali lengekanaya bathya. Bakikiriraya bathi Nyamuhanga akawathikaya Abaisraeli, neryo sibanzire erilhwa na Nyamuhanga. Neryo ibbwa, wunasi eky’Abagibeoni bakakolha?

Bakathwamu eriyisosekania kilhangirike nga bakalhua omwa bitsweka ebya hali. Neryo abaghuma ab’okw’abalhume bakambalha emisarandwa n’esyangendero esikulha-kulire. Bakahekaya esyapunda syabu sy’esyagutiha esikulha-kulire, n’eriheka emiggati eyumire eyabiriwunza biro bingi. Neryo bakaghenda eyiri Yosua n’erimubwira bathi: ‘Thukalhua omwa kihugho ekya hali, kusangwa muthwowa oku Nyamuhanga wenyu ow’obuthoki, ya Yehova. Muthwowa ebindu byosi aby’abakolera e Misiri. Busana n’ekyo abasondoli bethu muba kathubwira bathi thuthegheke ebyalya ebya thukendiasa thukalira omwanzira n’erisyabwira thuthi: “Thuli baghombe benyu. Muthulhaghanisaye muthi simwendi lhwa nethu.” Mwanganalhangira ngoku esyangimba syethu syabiri kulha busana n’olhughendo lhuli n’emiggati yethu yabiri wunza biro bingi n’eryuma.’

Yosua n’abandi basondoli bak’ikirirya eby’Abagibeoni. Neryo bakakolha endaghano nabu ngoku sibendi lhwa nabu. Aliriryo enyuma w’ebiro bisathu bakaminya Abagibeoni ngoku bikere hakuhi-kuhi.

Yosua akababulhaya athi: ‘Busana naki mumwathubwire muthi mwalhua omwa kihugho ekya hali?’

Abagibeoni bakasubiraya bathi: ‘Thwakolha thuthya kusangwa muthwabwirwa ambu Nyamuhanga wenyu Yehova abiri balhaghanisya eribaha ekihugho kyosi ekye Kanana. Neryo muthubaha thuthi mukendi thw’itha.’ Aliriryo Abaisraeli bakaberereraya erilhaghana lyabu, sibath’itha Abagibeoni. Neryo bakabakolha mw’abaghombe babu.

Omwami we Yerusalemu amahithana kusangwa Abagibeoni babirikolha endaghano y’obuholho n’Abaisraeli. Neryo akabugha n’abandi bakama bani athi: ‘Mwase mungwathikaye thwanga lhwa n’Abagibeoni.’ N’eki ky’abami bathanu banu bakakolha. Abagibeoni banabya b’amenge erikolha endaghano ey’obuholho n’Abaisraeli, ekikaleka hathya abami aba ibasa erisyalhwa nabu? Thukendi lebya.

Yosua 9:1-27; 10:1-5.

Yosua n’Abagibeoni


Ebibulyo

  • Abandu be Gibeoni ni bambaghane bathi okw’abanya Kanana abali omwa miyi ya hakuhi?
  • Ngokwa kikanganibwe omwa kisasani, Abagibeoni bakakolha ki, kandi busana naki?
  • Yosua n’abasondoli Abaisraeli bakalhaghanisaya Abagibeoni baki, aliriryo enyuma w’ebiro bisathu bakaminya ki?
  • Abami ab’omwa yindi miyi bakabya bowa indi Abagibeoni babiri rondekania obuholho n’Abaisraeli, niki ekikabya?

Ebibulyo eby’eryongerako

  • Soma Yosua 9:1-27.

    Kundi Yehova abya inyabiri lhaghira erihanga lya Israeli ‘erihwerekererya esyandulhani syosi esye kihugho,’ iyo erilhamya Abagibeoni mulya kangania mibere ki? (Yos. 9:22, 24; Mt. 9:13; Emib. 10:34, 35; 2 Pet. 3:9)

    Omwi berererya endaghane eya kolha n’Abagibeoni, Yosua mwakangania eky’erireberyako ki kibuya eyiri Abakristayo munabwire? (Yos. 9:18, 19; Mt. 5:37; Efe. 4:25)

  • Soma Yosua 10:1-5.

    Endeko nene munabwire yika gherereraya yithi Abagibeoni, n’eki kikaleka ibahika kwaki? (Yos. 10:4; Zek. 8:23; Mt. 25:35-40; Erib. 12:17)