Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 46: Esyombimbo sye Yeriko

Olhughano 46: Esyombimbo sye Yeriko

EKIKATHERAYA esyambimbo sye Yeriko esi niki? Yikabya ngani bbomu nene eyamasiswirya. Aliriryo omwabiro ebyo sibabya bawithe bbomu; sibabya bawithe n’esyambundu. Ni kindi kithiko-thiko kya Yehova! Leka thw’ighe ngoku kyabya kyabere.

Esyombimbo sye Yeriko sikathera

Hulikirira ebya Yehova akabwira Yosua: ‘Iwe n’abalhume bawu abakalhwa muli b’erithimba okwa muyi. Muthimbe okwa muyi murundi mughuma obuli kiro ahabw’ebiro mukagha. Mubye imunehekire esanduko ey’endaghano. Abahereri irinda batholere ibabya embere syayu ibane mubuha esyangubi syabu.

‘Okwa kiro kye irinda mutholere imwathimba okwa muyi mirundi irinda. Neryo mubuhe esyangubi sya kutsibu, kandi buli mundu alhake n’omulenge munene ow’amalhwa. N’esyambimbo sikendi kwama ky’awa ahisi!’

Yosua n’abandu bamakolha ngoku Yehova akabugha. Bakathimba, buli mundu anahunire. Sihali mundu oyukabugha. Ebikowibawa yen’emirenge ey’esyangubi n’ebikindu. Esyanzighu sy’abandu ba Nyamuhanga omwa Yeriko syangabya imusyubaha. Wanamalhangira omughuha olya ow’engulha kw’alerembire omw’idirisa? Eryo ni dirisa lyandi? Kwenene, Rahabu abirikolha ekyo abalingi babiri bamubwira bathi akole. Abosi ab’eka yiwe bane haghuma nayu omwa nyumba yiwe bakalebya ekikakoleka.

Yosua

Erighunzerera, okwa kiro ky’eb’irinda, bamabya babiri ghunza erithimba okwa muyi mirundi irinda, esyangubi syamabugha, abalhume abalhwi bamalhaka, n’esyombimbo syamathera. Neryo Yosua akabugha athi: ‘Mwithe buli mundu omwa muyi kandi muhisayegho. Muhisaye buli kindu. Mulhamaye esy’ebitsipa, esy’amaghetse, omulinga n’ekyuma bisa, kandi muhebyo okwa ngunza ey’ehema ya Yehova.’

Okw’abalingi babiri, Yosua akabugha athi: ‘Mughende omwa nyumba ya Rahabu, kandi mumulethe n’abahughu biwe bosi.’ Rahabu n’eka yiwe bamalhamibwa, ngoku abalingi babya ibabiri mulhaghanisya.

Yosua 6:1-25.



Ebibulyo

  • Yehova akabwira abalhume abalhwi n’abahereri athi bakole ki ahabw’ebiro mukagha?
  • Abalhume batholere erikolha ki okwa kiro ky’irinda?
  • Ngokwa wulhangire omwa kisasani, ekikahika okwa syombimbo sye Yeriko niki?
  • Busana naki omwidirisa mulerembire omughuha ow’engulha?
  • Yosua akabwira abalhwi athi bakole bathi abandu n’omuyi, aliriryo ibbwa, ebitsipa, esy’amaghetse, omulinga, n’ekyuma bikolhawe bithi?
  • Abalingi babiri bakabwirawa indi bakole ki?

Ebibulyo eby’eryongerako

  • Soma Yosua 6:1-25.

    Erithimba ly’Abaisraeli okwa muyi we Yeriko okwa kiro ky’irinda lisosene lithi n’omubiiri w’erithulhughania engulhu ow’Abema ba Yehova omwa biro by’enyuma-nyuma bino? (Yos. 6:15, 16; Isa. 60:22; Mt. 24:14; 1 Kor. 9:16)

    Obuminyereri obusakangire omwa kitabu kya Yosua 6:26, mubwa bererera buthi omwa birimo nga 500 embere, kandi eki kikathukangiriraya ki okwa kinywe kya Yehova? (1 Bam. 16:34; Isa. 55:11)