Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 43: Yosua Akabya Musondoli

Olhughano 43: Yosua Akabya Musondoli

MUSA anzire erighenda e Kanana n’Abaisraeli. Neryo akabulhaya: ‘Yehova, leka ngasoke Olhusi Yorodani, n’erilhangira ekihugho kibuya.’ Aliriryo Yehova akabugha athi: ‘Ekyo kikaghunza! Siwusasya kanaya okwa mwatsi oyu kandi!’ Wunasi ekyaleka Yehova inyabugha athya?

Ni busana n’ekyabya omughulhu Musa aswiraya olhukuka. Wibuke, iyo na Haruni mubatha sikya Yehova. Mubatha bwira abandu ngoku ni Yehova yuwaletha amaghetse erilhua omwalhukuka. Ahabw’enzumwa eyi Yehova mwabugha athi syendi syalighirabo eringira e Kanana.

Neryo emikera mike enyuma w’eribiriholha lya Haruni, Yehova akabwira Musa athi: ‘Thwalha Yosua, wumw’imanaye embere sy’omuhereri Eleazari n’abandu. N’eyo embere sy’abosi, wubwire buli mundu wuthi Yosua ya musondoli muhya-muhya.’ Musa akakolha ngoku Yehova amabugha, ngoku wanamalhangira omwa kisasani.

Musa akaranga Yosua ng’omwami

Neryo Yehova akabwira Yosua athi: ‘Ibya n’akaghalha, kandi si wubahe. Wukendi sondolha Abaisraeli erihika omwa kihugho ekya Kanana ekyo nalhaghanisaya bo, kandi ngendibya haghuma nawu.’

Enyuma waho, Yehova akabwira Musa erisambira okwa kasweswe ak’Ekithwa Nebo omwa kihugho kye Moabu. Endatha eyo Musa akasamalira eyisirya w’Olhusi Yorodani n’erilhangira ekihugho ekyuwene ekya Kanana. Yehova akabugha athi: ‘Eki ky’ekihugho ekyo nalhaghanisaya eriha abana ba Abrahamu, Isaka na Yakobo. Namabiri kukangyakyo, aliriryo si ngendi kulighira eringira mukyo.’

Okwa Kithwa Nebo kw’endatha eyo Musa akaholha. Abya withe ebirimo 120 eby’obukulhu. Abya inyakina withe akaghalha, n’ameso iwe inyakina lhangira ndeke. Abandu bakabya n’obulighe bunene n’erilira kusangwa Musa abiriholha. Aliriryo ibbwa bakatsema Yosua eribya musondoli wabu muhya-muhya.

Emiganzo 27:12-23; Eryibuka Ebihano 3:23-29; 31:1-8, 14-23; 32:45-52; 34:1-12.



Ebibulyo

  • Omwa kisasani, abalhume babiri abimene na Musa ni bahi?
  • Yehova akabwira Yosua yaki?
  • Ekikaleka Musa inyahethukira okw’akasweswe k’Ekithwa Nebo niki, kandi Yehova akamubwira athiki?
  • Musa awithe birimo bingahi akaholha?
  • Busana naki abandu bali n’obulighe, aliriryo ni nzumwa yahi eyikaleka ibabya n’etseme?

Ebibulyo eby’eryongerako

  • Soma Emiganzo 27:12-23.

    Ni mubiiri ki owalithohire owa Yehova aha Yosua, kandi Yehova eritsomana abandu biwe likakanganibawa lithi munabwire? (Emig. 27:15-19; Emib. 20:28; Ebr. 13:7)

  • Soma Eryibuka Ebihano 3:23-29.

    Ekyaleka Yehova inyathalighira Musa na Haruni erisokera omwa kihugho eky’endaghane niki, kandi thwang’igha isomo ki omw’eki? (Ebi. 3:25-27; Emig. 20:12, 13)

  • Soma Eryibuka Ebihano 31:1-8, 14-23.

    Ebinywe bya Musa akalhagha Israeli, bikakanganaya bithi ngokwa mw’ikirirya omwa bwolho erisuyira lya Yehova? (Ebi. 31:6-8, 23)

  • Soma Eryibuka Ebihano 32:45-52.

    Ekinywe kya Nyamuhanga kitholere ikyahamba kithi okwa syangebe syethu? (Ebi. 32:47; Law. 18:5; Ebr. 4:12)

  • Soma Eryibuka Ebihano 34:1-12.

    Nomwakine indi Musa mwathalhangira Yehova okwa mubiri, Eryibuka Ebihano 34:10 akakanganaya athi engolangana yiwe na Yehova? (Eri. 33:11, 20; Emig. 12:8)