Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 41: Enzoka ey’Omulinga

Olhughano 41: Enzoka ey’Omulinga
Musa n’enzoka ey’omulinga

KIRYA kina sosire ng’enzoka hene-hene eyiyiringire okwa kikondo? Siyo hene-hene. Ni nzoka eyikolirwe omwa mulinga. Yehova mwabwira Musa athi ahire y’okwa kikondo nuku abandu banga samalireyo neryo ibabyaho. Aliriryo esindi esiri okwa kithaka ni nzoka hene-hene. Syabiri lhuma abandu n’eribalhwalya. Wunasi ngani busana naki?

Ni kusangwa Abaisraeli babiri kania nabi oku Nyamuhanga na Musa. Bakaneghena bathi: ‘Ekyaleka imwathwiha e Misiri erisyaholera omwa mbwarara niki? Hano sihali byalya n’amaghetse. Kandi thwabiritamwa erirya amana.’

Aliriryo amana ni byalya bibuya. Yehova abahereyo erilhabira omwa kithiko-thiko. Kandi erilhabira omwa kithiko-thiko abiri baha n’amaghetse. Aliriryo abandu sibali sima emibere eya Nyamuhanga abiri batsomaniramo. Busana n’ekyo Yehova akathuma esyanzoka esy’obusewa erisuyira Abaisraeli. Esyanzoka sikabalhuma, n’abangi ab’okubo bakaholha.

Abaisraeli ababirilhumwa n’esyanzoka

Erighunzerera abandu bakasa eyiri Musa n’eribugha bathi: ‘Thwabirihalya, kusangwa thwabirikania nabi oku Yehova n’okwiwe. Lino wusabe Yehova alhusayeho esyanzoka esi.’

Neryo Musa akasabira abandu. Na Yehova akabwira Musa akole enzoka ey’omulinga eyi. Akabugha athi ahire y’okwa kikondo, kandi athi obuli mundu oyuka lhumawa n’enzoka asamalire yo. Musa akakolha ekya Nyamuhanga akabugha. N’abandu abalya lhumawa bakasamalira enzoka ey’omulinga neryo bakalhama.

Omw’eki muli erisomo ery’er’igha. Ithwe abosi, thuli omwanzira eyisosire ng’ey’Abaisraeli abalhumawa n’esyanzoka esyo. Ithwe abosi thuli omwa mibere ey’eriholha. Thathimbya ameso, wukendi lhangira wuthi abandu baka kekelhuha, ibalhwalha, n’eriholha. Ni kusangwa omulhume n’omukali ab’erimbere, Adamu na Eva, mubalhua oku Yehova, kandi ithwe abosi thuli bana babu. Aliriryo Yehova abirithuhiriraho enzira eyanga thuthokesya eribyaho kera na kera.

Yehova mwathuma Mughalha wiwe, Yesu Kristo, okwa kihugho. Yesu mwahanikwa okwa muthi, kusangwa abandu bangi muba lengekania bathi abya mubi. Aliriryo Yehova mwathuha Yesu erithulhamya. Thwama muyisigha, thuka mukwama, ithwanganabana engebe ey’erikotha. Aliriryo thukendi igha bingi okw’eki embere.

Emiganzo 21:4-9; Yoane 3:14, 15.



Ebibulyo

  • Omwa kisasani, ekiyiringire okwa kikondo niki, kandi ekyaleka Yehova inyabwira Musa athi ahire yoko niki?
  • Abandu sibali sima bathi ebyosi ebya Nyamuhanga abiribakolera?
  • Abandu bakasaba Musa bathi akole ki enyuma wa Yehova erithuma esyanzoka esy’obusewa akabasuyira?
  • Ekikaleka Yehova inyabwira Musa athi akole enzoka y’omulinga niki?
  • Ni somo ki erya thwang’igha omwa lhughano lhuno?

Ebibulyo eby’eryongerako

  • Soma Emiganzo 21:4-9.

    Eriyineghenia lye Israeli likathuha ikunga ki busana n’ebya Yehova akathuha? (Emig. 21:5, 6; Abar. 2:4)

    Omwa bighonye ebya kwamako, Abaisraeli mubakolesya bathi enzoka y’omulinga, n’Omwami Hezekia mwakolha ki? (Emig. 21:9; 2 Bam. 18:1-4)

  • Soma Yoane 3:14, 15.

    Erihira enzoka y’omulinga y’okwa kikondo, yakanganaya yithi erihanikwa lya Yesu Kristo? (Gal. 3:13; 1 Pet. 2:24)