Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 40: Musa Akaswiraya Olhukuka

Olhughano 40: Musa Akaswiraya Olhukuka

EBIRIMO bikaghenda bikalhaba—ebirimo 10, ebirimo 20, ebirimo 30, ebirimo 39! N’Abaisraeli bakine omwa mbwarara. Aliriryo ebirimo byosi ebi Yehova anemutheya abandu biwe. Akabalisya amana. Inyabasondolha omwa musibo omwa nduyi y’ekithu, n’omwakiro omwa nduyi y’omuliro. N’omwa birimo ebyosi ebi esyangimba syabu sisiri bakulirako n’ebisandu byabu sibiri bimba-bimba.

Hathya ni mukera ow’erimbere omwa kirimo ekya 40 Abaisraeli balhwire e Misiri. Abaisraeli kandi bakalhalirira Ekadese. Hano hababya omughulhu abalingi 12 bathumawa eriyalinga ekihugho ekye Kanana ebirimo 40 ebilhabire. Miriamu mwali wabu Musa akaholera e Kadese. Kandi ng’enyuma, hano hali ekitsibu.

Abandu sibanga bana amaghetse. Neryo bakayineghenaya oku Musa bathi: ‘Kyangabere kibuya thulya holha. Ekyaleka iwathwiha e Misiri n’erithuletha omwa bitsweka eby’akabi ahathelhasa kindu kyosi-kyosi niki? Sihali engano, sihali omitini, sihali ebighuma eby’ebinyu, sihali n’amakomamanga. Sihali n’amaghetse aw’erinywa nibya.’

Musa akaswiraya olhukuka

Musa na Haruni bakabya baghenda omwa hema eriyasaba, Yehova akabwira Musa athi: ‘Hindanaya abandu ba haghuma. Neryo embere sy’abosi wubughe n’olhukuka lhulya. Lhukendilhua mw’amaghetse awakaghunza abandu n’ebisoro byabu.’

Neryo Musa akahindanaya abandu, n’eribugha athi: ‘Muhulikirere, inywe mutha yikethera omu Nyamuhanga! Ni Haruni naghe abangabalhusirya amaghetse w’omwa lhukuka lhuno?’ Neryo Musa akaswirya olhukuka lhwa kabiri omwa mutso, n’ekisalhalha kinene eky’amaghetse kikalhua omwa lhukuka. Hali amaghetse awakaghunza erinywibwa abandu bosi n’ebisoro.

Aliriryo Yehova amahithana oku Musa na Haruni. Wunasi ngani busana naki? Kusangwa Musa na Haruni mubakabugha bathi bakaya lhusaya amaghetse w’omwa lhukuka. Kandi kunu Yehova iyulyakikolha. Neryo kusangwa Musa na Haruni mubatha bugha ekwenene okw’eki, Yehova akabugha athi akaya basuyira. Amabugha athi: ‘Si mwendi syasondolha abandu baghe eringira e Kanana.’

Neryo buthuku buke Abaisraeli bakalhua e Kadese. Hakabya hahwa akathuku kake bakahika okwa Kithwa Hori. Hano, endatha okwa kithwa, Haruni akaholha. Ni w’ebirimo 123 eby’obukulhu akahika okw’iholha lhwiwe. Abaisraeli bali n’obulighe bunene, busana n’ekyo abandu abosi bakalira Haruni ahabw’ebiro 30. Neryo mughalha wiwe Eleazari yuwamathasyabya muhereri mukulhu ow’erihanga erye Israeli.

Emiganzo 20:1-13, 22-29; Eryibuka Ebihano 29:5.



Ebibulyo

  • Yehova akatsomana athi Abaisraeli ibane omwa mbwarara?
  • Abaisraeli bakayineghenaya bathiki balhalirira e Kadese?
  • Yehova akaha athi abandu n’ebisoro byabu by’amaghetse?
  • Omwa kisasani, omulhume oyukayikanganaya omunwe nindi, kandi akakolha athya busana naki?
  • Busana naki Yehova ahithene oku Musa na Haruni, kandi bakasuyirawa bathi?
  • Ekikabya okwa Kithwa Hori niki, kandi oyukabya muhereri mukulhu wa Israeli nindi?

Ebibulyo eby’eryongerako

  • Soma Emiganzo 20:1-13, 22-29 n’Eryibuka Ebihano 29:5.

    Thuk’igha ki omwanzira Yehova atsomaniramu Abaisraeli omwa mbwarara? (Ebi. 29:5; Mt. 6:31; Ebr. 13:5; Yak. 1:17)

    Erilemwa lya Musa na Haruni erihalhamba Yehova mwa mubuyirire embere sye Israeli, mukyalhangirika kithi embere sya Yehova? (Emig. 20:12; 1 Kor. 10:12; Erib. 4:11)

    Thwang’igha ki omwanzira eya Musa ayithwalhamu akabana erisuyira erialhua eyiri Yehova? (Emig. 12:3; 20:12, 27, 28; Ebi. 32:4; Ebr. 12:7-11)