Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 38: Abalingi 12

Olhughano 38: Abalingi 12
Abalingi Abaisraeli banahekire ebighuma

THASAMALIRA ebighuma eby’abalhume aba bahekire. Thasamalira ekikuthu eky’ebighuma ngokwa ni kinene. Kikathwalha balhume babiri erikiheka okwa muthi. Kandi thalebya omitini n’amakomamanga. Ebighuma ebyuwene kutsibu ebi byalhwahi? Byalhua omwa kihugho kye Kanana. Wibuke Abrahamu, Isaka, na Yakobo muban’ikalha e Kanana. Aliriryo busana n’enzalha omwa kihugho ekyo, Yakobo n’amaka iwe, mubahumira e Misiri. Hathya, enyuma w’ebirimo nga 216, Musa akasondolha Abaisraeli erisuba e Kanana. Bamabirihika omwa mbwarara omwa kitsweka ekikahulhawa mwa Kadese.

Omwa kihugho ekya Kanana mwikere abandu babi. Neryo Musa akathuma abalingi 12, n’eribwirabo athi: ‘Mulebaye nga yikere bandu bangahi, kandi ng’abawithe kaghalha kangahi. Mulebaye ekithaka nga nina kibuya okwihera ebyalya. Kandi mulebaye muthi mukaletha okwa bighuma byakyo.’

Abalingi bakabya basuba e Kadese, bakabwira Musa bathi: ‘Kwenene ni kihugho kibuya kutsibu.’ Kandi erikangania ekya bakabugha, bakakanganaya Musa y’ebighuma ebikalhuayo. Aliriryo 10 okwa balingi bakabugha bathi: ‘Abandu abikeremo ni banene-banene kandi bawithe akaghalha. Ithukendi ithibwa thwamalengesya erihamba ekihugho kyabu.’

Abaisraeli bakubaha bakowa eki. Bakabugha bathi: ‘Kyangabere kibuya thulya holera e Misiri kutse hano omwa mbwarara. Thukendi kwira omwa lhuhi, kandi abakali bethu n’abana bethu bakendi hambwa. Thusombole omusondoli muhya-muhya omwa mwanya wa Musa, kandi thusube e Misiri!’

Aliriryo ababiri okwa balingi bakayikethera Yehova, kandi bakalengesaya erihumulikania abandu. Amena abo ni Yosua na Kalebu. Bakabugha bathi: ‘Simubahe. Yehova ane haghuma nethu. Erimya ekihugho likendibya lyolho.’ Aliriryo abandu sibali hulikirira. Bakanza n’eritha Yosua na Kalebu.

Kino kikaleka Yehova inyahithana kutsibu, n’eribwira Musa athi: ‘Sihali mundu oyuwithe ebirimo 20 eby’obukulhu n’erilholya embere oyuwa sy’ingira omwa kihugho ekya Kanana. Babirilhangira ebithiko-thiko ebyo n’akolera e Misiri n’omwa mbwarara, aliriryo sibali nyiyikethera. Busana nekyo bakendi ghanga-ghanga omwa mbwarara ahabw’ebirimo 40 erihika aho omundu ow’erighunzerera asyaholera. Yosua na Kalebu basa baba sy’ingira omwa kihugho ekye Kanana.’

Emiganzo 13:1-33; 14:1-38.



Ebibulyo

  • Niki ekya wukayitheghereraya okwa kikuthu eky’ebighuma ebiri omwa kisasani, kandi kyalhua hi?
  • Ekikaleka Musa inyathuma abalingi 12 omwa kihugho ekye Kanana niki?
  • Abalingi ikumi bakabya babirisuba eyiri Musa bakabugha bathiki?
  • Abalingi ababiri bakakanganaya bathi ngokwa bayikethere Yehova, kandi amena abu ni wahi?
  • Busana naki Yehova ahithene, kandi akabwira Musa yaki?

Ebibulyo eby’eryongerako

  • Soma Emiganzo 13:1-33.

    Abasombolhawa eriyalinga ekihugho ni bahi, kandi babya bawithe omughisa ki? (Emig. 13:2, 3, 18-20)

    Ekyaleka ebirengekanio bya Yosua na Kalebu ebyabya bya mbaghane okwa by’abandi balingi niki, kandi eki kikathukangiriraya ki? (Emig. 13:28-30; Mt. 17:20; 2 Kor. 5:7)

  • Soma Emiganzo 14:1-38.

    Ni kunga ki erihambire okw’iyineghenia eyiri abimaniri ba Yehova abali okwa kihugho erya thutholere ithwayitheya ko? (Emig. 14:2, 3, 27; Mt. 25:40, 45; 1 Kor. 10:10)

    Emiganzo 14:24 akakanganaya athi ngoku Yehova akatsomana obuli mughombe wiwe? (1 Bam. 19:18; Emi. 15:3)