Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 36: Ekyana ky’Ende eky’Esy’Amaghetse

Olhughano 36: Ekyana ky’Ende eky’Esy’Amaghetse

ILHOLHOO! Abandu bakakolha ki lino? Bakaramaya ekyana ky’ende! Busana naki ibakolha eki?

Musa akabya abirisiba okwa kithwa kwa mughulhu mungi, abandu bakabugha bathi: ‘Sithwasi ekya hikire oku Musa. Kwesi thuyikolere enyamuhanga eyikendi thusondolha erilhua omwa kihugho kino.’

Musa akaghusa ebisayi bibiri by’amabwe bya hisi

Mughalha wabu Musa ya Haruni akabugha athi: ‘Kale kyuwene. Mulhusaye amaningita enyu aw’esy’amaghetse, mundetheregho.’ Abandu bakabya babiri kolha bathya, Haruni akahesagho mw’ekyana ky’ende eky’esy’amaghetse. Neryo abandu bakabugha bathi: ‘Oyu ni Nyamuhanga wethu, oyuwathusondolha erilhua e Misiri!’ Neryo Abaisraeli bakabya n’obugheni bunene, n’eriramya ekyana ky’ende eky’esy’amaghetse.

Yehova akabya alhangira eki, akahithana kutsibu. Neryo akabugha na Musa athi: ‘Anguha wandaghalire eyikwa. Abandu banamukolha nabi. Babiribirirwa ebihano byaghe kandi bakunamira ekyana ky’ende eky’esy’amaghetse.’

Abandu bakaramaya ekyana ky’ende eky’esy’amaghetse

Musa akanguha n’erikimira eyikwa sy’ekithwa. Neryo akabya akahika hakuhi, eki ky’akalhangira. Abandu banamwimba n’erihotholha bakathimba-thimba okwa kyana ky’ende eky’esy’amaghetse! Musa akahithana kutsibu n’erihika okw’ighusa ahisi ebisayi bibiri bw’amabwe awasakirwe kw’ebihano, n’erithulhangika mwa bihandi-bihandi bingi. Neryo akathwalha ekyana ky’ende eky’esy’amaghetse n’erikihisya. Neryo akakiswa mw’isyano.

Abandu babirikolha ekindu kibi kutsibu. Neryo Musa akabwira abaghuma b’okw’abalhume athi bimaye emiyali yabu. Musa akabugha athi: ‘Abandu babi abalyaramaya ekyana ky’ende eky’esy’amaghetse batholere ibaholha.’ Neryo abalhume bak’itha abandu 3,000! Eki sikirikanganaya kithi thutholere ithwayitheya, ithwaramya Yehova musa butsira esyanyamuhanga syosi-syosi esy’amabehi?

Eriluayo 32:1-35.



Ebibulyo

  • Omwa kisasani, abandu bakakolha ki, kandi busana naki?
  • Busana naki Yehova ahithene, kandi Musa akakolha ki akalhangira eby’abandu bakakolha?
  • Musa akabwira abaghuma b’okw’abalhume athi bakole ki?
  • Olhughano lhuno lhutholere ilhwa thukangirirya isomo ki?

Ebibulyo eby’eryongerako

  • Soma Eriluayo 32:1-35.

    Omwatsi oyu akakanganaya athi ebirengekanio bya Yehova okw’ithulhungania edini ey’amabehi n’eriramya ery’ekwenene? (Eri. 32:4-6, 10; 1 Kor. 10:7, 11)

    Abakristayo batholere ibayitheya bathi okwi sombolha emyatsi y’eriyitsemesya, ng’eriimba n’erihotholha? (Eri. 32:18, 19; Efe. 5:15, 16; 1 Yn. 2:15-17)

    Ekihanda eky’Abalawi mukyaha kithi eky’erireberyako kibuya omwi kangania erithunganene? (Eri. 32:25-28; Esy. 18:25)