Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano: Ebilhotho bya Farao

Olhughano: Ebilhotho bya Farao

EBIRIMO bibiri bya malhaba, Yozefu akine omwa muliki. Omuthengi syali athamwibuka. Neryo erithumbi ighuma Farao amalhotha bilhotho bibiri ebiri mbaghane, neryo amabulha nga bikamanyisaya ki. Wanama mulhangira aho ngokw’ane ghotsere? Engyakya Farao akabirikira abalhume biwe ab’amenge n’eribabwira ebindu eby’alhothire. Aliriryo sibatha thoka erimubwira ebilhotho nga bika manyisaya ki.

Lino ibbwa omuthengi ak’ibuka Yozefu. Akabwira Farao athi: ‘Omughulhu nabya omwa muliki, mwabya mulhume mughuma oyuwabya akathusoborera ebilhotho nga bikamanyisaya ki.’ Neryo Farao amalhuaho inya lhaghira athi Yozefu alhwe omwa muliki.

Farao amabwira Yozefu y’ebilhotho biwe: ‘Mwanga lhangira esyande irinda esinenehire, kandi esyuwene. Kandi namathasyalhangira esyande irinda esinyalire. Neryo esyande esinyalire syamalya esinenehire.

Farao akalhotha

‘Omw’ilhotha lya kabiri mungalhangira amakundu irinda aw’engano awuwene awali okwa lhububa lhughuma. Neryo kandi n’amalhangira amakundu irinda aw’engano awanyalire kandi awumire. N’amakundu w’engano awanyalire mwakamera amakundu irinda aw’engano eyuwene.’

Neryo Yozefu akabwira Farao athi: ‘Ebilhotho bibiri bikamanyisaya kindu kighuma. Esyande irinda esinenehire n’amakundu irinda w’engano yuwene bika manyisaya ebirimo irinda, n’esyande irinda esinyalire n’amakundu irinda aw’engano yinyalire bikamanyisaya ebirimo bindi irinda. Hakendibya ebyalya bingi ebikendi era omwa Misiri ahabw’ebirimo irinda. Neryo ihathasyabya birimo irinda ebikendi erya byalya bike.’

Neryo Yozefu akabwira Farao athi: ‘Wurondaye omulhume ow’amenge oyukenditheya erisorokya ly’ebyalya omwa birimo irinda ebyuwene. Neryo abandu isibendi syakwa nzalha omwa birimo bindi irinda ebibi ebikendi erya byalya bike.’

Farao amanza amalengekania aya. Neryo amasombolha Yozefu erisorokya ebyalya, n’eribihira omwa bighona. Yozefu amabya mundu mukulhu e Misiri, amabya wakabiri oku Farao.

Enyuma w’ebirimo munani, omwa mughulhu w’enzalha, Yozefu akalhangira abalhume bakasa eyali. Wunasi nga ni bahi? Lebaya, ni baghalha babu abakulhu biwe 10! Yakobo thatha wabu abathumire e Misiri kusangwa ebyalya bya bakehere ewabu e Kanana. Yozefu amaminyerera baghalha babu, aliriryo sibatha muminyerera. Wunasi nga ni busana naki? Ni busana Yozefu abiribya mulhume mukulhu, kandi ambithe esyangimba esiri mbaghane.

Yosefu ak’ibuka ngokw’omughulhu abya mulhwana mwalhotha baghalha babu ibane munama embere siwe. Wanam’ibuka wukasoma okw’ekyo? Neryo Yozefu amathoka erikilhangira ngoku ni Nyamuhanga oyu wamuthuma e Misiri, kandi ahabw’enzumwa mbuya. Wuka lengekanaya Yozefu akakolha athi? Leka thulebaye.

Enzuko 41:1-57; 42:1-8; 50:20.



Ebibulyo

  • Niki ekikabya oku Farao erithumbi ighuma?
  • Ekikaleka okw’ighunzerera omuthengi iny’ibuka Yozefu niki?
  • Ngokwa kikanganibwe omwa kisasani, ni bilhotho ki ebibiri ebya Farao akalhotha?
  • Yozefu akabugha athi ebilhotho bikamanyisaya ki?
  • Yozefu akabya athi mulhume w’ekitsumbi owa kabiri oku Farao e Misiri?
  • Ekikaleka baghalha babu Yozefu ibasa e Misiri niki, kandi busana naki ibathamuminyerera?
  • Yozefu ak’ibuka kilhotho ki, kandi kikamuwathikaya eriyitheghererya ki?

Ebibulyo eby’eryongerako

  • Soma Enzuko 41:1-57.

    Yozefu mwahererya athi Yehova ye kitsumbi, kandi Abakristayo abamunabwire banga gherererya bathi eky’erireberyako kiwe? (Enz. 41:16, 25, 28; Mt. 5:16; 1 Pet. 2:12)

    Ebirimo by’erighesa lingi e Misiri erikwamyako n’ebirimo by’enzalha, bikakanganaya bithi embaghane eyiri ahakathi-kathi k’emibere ey’obunyakirimu obw’abandu ba Yehova n’abakayahulha mw’Abakristayo? (Enz. 41:29, 30; Amo 8:11, 12)

  • Soma Enzuko 42:1-8 na 50:20.

    Nina kibi abaramya ba Yehova eryunamira omundu bakamusikya ahabw’ekitsumbi kiwe yamabya ini mibere ey’ekihugho ekyo? (Enz. 42:6)