Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 31: Musa na Haruni Bakabana Farao

Olhughano 31: Musa na Haruni Bakabana Farao

MUSA abere asuba e Misiri, mwabwira Haruni mughalha wabu okwa bithiko-thiko ebyosi. N’omughulhu Musa na Haruni bakanganaya ebithiko-thiko ebi by’Abaisraeli, abandu abosi mubikirirya bathi Yehova ane haghuma nabu.

Neryo Musa na Haruni mubaghenda eriya bana Farao. Muba mubwira bathi: ‘Yehova Nyamuhanga w’Abaisraeli akabugha athi, “Leka abandu baghe baghende ahabw’ebiro bisathu, banganyiramya omwa mbwarara.”’ Aliriryo Farao mwasubirya athi: ‘Sindi ikiriraya omu Yehova. Kandi si ngendi lhwika Abaisraeli bakaghenda.’

Farao mwahithana, kusangwa abandu babya banzire bahebawe obuthuku erilhua okwa mibiiri yabu bangaya ramya Yehova. Neryo mwabakaka bakole kutsibu kwilhaba naho. Abaisraeli mubatsweba Musa ahabw’eribakolha nabi, na Musa mwayowa nabi. Aliriryo Yehova mwamubwira athi syayilhalikirire. Yehova mwabugha athi: ‘Farao akendi lhwika abandu baghe ibaghenda.’

Musa na Haruni embere sya Farao

Musa na Haruni mubaghenda eriya bana Farao kandi. Lero okwa buthuku obo mubakolha ekithiko-thiko. Haruni mwaswira ahisi h’omutso wiwe, neryo mwahinduka nzoka nene. Aliriryo abanya menge ba Farao nabu mubaswira ahisi h’emyutso yabu, n’esyanzoka musya buthuka. Aliriryo, lhangira! Enzoka ya Haruni yina mumera esyanzoka esy’abalhume abanya menge. Nomwabine Farao mwatha lighira Abaisraeli bakaghenda.

Neryo obuthuku mubwahika Yehova erikangirirya Farao y’erisomo. Wunasi ngokw’abya akikolire? Lyabya iry’eriletha ebihunzo 10, kutse ebitsibu bingi, okwa Misiri.

Enyuma w’ebihunzo bingi, Farao mwathumira oku Musa, n’eribugha athi: ‘Imanaya ekihunzo, naghe ngendi lhwika Abaisraeli banga ghenda.’ Aliriryo ekihunzo kyanabya kyamahwa, Farao inyaka hindulha ebirengekanio biwe. Isyali lhwika abandu bakaghenda. Aliriryo, okw’ighunzerera, enyuma w’ekihunzo ekye 10, Farao mwa lhwika Abaisraeli athi baghende.

Wunasi ebihunzo 10 mwa kighuma-kighuma? Leka thub’ighe ko.

Eriluayo 4:27-31; 5:1-23; 6:1-13, 26-30; 7:1-13.



Ebibulyo

  • Ebithiko-thiko ebya Musa na Haruni bakolha mubyahamba bithi okw’Abaisraeli?
  • Musa na Haruni mubabwira Farao yaki, kandi Farao mwasubirya athiki?
  • Ngokwa kikanganibwe omwa kisasani, niki ekyabya kyabere Haruni akaghusa omutso wiwe w’ahisi?
  • Yehova mwakangirirya athi Farao y’erisomo, kandi Farao mwasubirya athi?
  • Ekyabya kyabere enyuma w’ekithiko-thiko ky’erikumi niki?

Ebibulyo eby’eryongerako

  • Soma Eriluayo 4:27-31 na 5:1-23.

    Farao amanyisaya ki akabugha athi: ‘Singasi Yehova nahake’? (Eri. 5:2, NW; 1 Sam. 2:12; Abar. 1:21)

  • Soma Eriluayo 6:1-13, 26-30.

    Yehova mwathayiminyikalya oku Abrahamu, Isaka, na Yakobo omu nzira ki? (Eri. 3:13, 14; 6:3; Enz. 12:8)

    Thukayowa thuthi thukaminya indi Yehova mwalholya embere n’erikolesya Musa, nomwakine indi Musa mwayowa nga syatholere erikolha omubiiri owa bamuha? (Eri. 6:12, 30; Luka 21:13-15)

  • Soma Eriluayo 7:1-13.

    Musa na Haruni babere bayabwira Farao eritswera lya Yehova buthubaha, mubabya ky’erireberyako bathi eyiri abaghombe ba Nyamuhanga munabwire? (Eri. 7:2, 3, 6; Emib. 4:29-31)

    Yehova mwakangania athi obuthoki bwiwe okwa syanyamuhanga sye Misiri? (Eri. 7:12; 1 Emy. 29:12)